ਸਿੱਖ ਲੱਖ ਕਹਿਣ 'ਵਖਰੀ ਕੌਮ' ਪਰ ਵੱਡੀ ਗਿਣਤੀ ਸਿੱਖ ਲੀਡਰਸ਼ਿਪ ਭਾਜਪਾ ਦੀ ਝੋਲੀ ਚੁੱਕ ਬਣੀ
ਚੰਡੀਗੜ੍ਹ (ਨੀਲ ਭਲਿੰਦਰ ਸਿੰਘ): ਸ਼੍ਰੋਮਣੀ ਅਕਾਲੀ ਦਲ ਦੀ ਇਕ ਦਹਾਕਾ ਪੁਰਾਣੀ ਸਿਆਸਤ ਅਫ਼ਸੋਸਜਨਕ ਦੌਰ 'ਚ ਪਹੁੰਚ ਚੁੱਕੀ ਹੈ, ਕਿਉਂਕਿ ਇਸ ਵੇਲੇ ਅਸਲ ਤੇ ਸਫ਼ਲ ਅਕਾਲੀ ਦਲ ਹੋਣ ਦਾ ਪੈਮਾਨਾ ਇਹ ਰਹਿ ਗਿਆ ਹੈ ਕਿ ਕੌਣ ਭਾਰਤੀ ਜਨਤਾ ਪਾਰਟੀ ਜਾਂ ਰਾਸ਼ਟਰੀ ਸਵੈਮ ਸੇਵਕ ਸੰਘ (ਆਰਐਸਐਸ) ਦਾ ਵੱਡਾ ਥਾਪੜਾ ਅਪਣੀ ਪਿੱਠ 'ਤੇ ਲਗਵਾ ਸਕਦਾ ਹੈ।
Photo
ਇਹਨੀਂ ਦਿਨੀਂ ਇਸ ਗੱਲ ਦੀ ਪ੍ਰਤੱਖ ਮਿਸਾਲ ਅਕਾਲੀ ਹੋਣ ਦੇ ਝੰਡਾ ਬਰਦਾਰ ਬਣੇ ਹੋਏ ਮੋਹਰੀ ਸਿੱਖ ਸਿਆਸੀ ਆਗੂਆਂ ਦੇ 'ਚਾਲ ਚੱਲਣ' 'ਚ ਵੇਖੀ ਜਾ ਸਕਦੀ ਹੈ। ਦਿੱਲੀ ਚੋਣਾਂ ਨੂੰ ਲੈ ਕੇ ਭਾਜਪਾ ਵਲੋਂ ਸ਼੍ਰੋਮਣੀ ਅਕਾਲੀ ਦਲ ਨੂੰ ਸ਼ਰੇਆਮ ਛਣਕਣਾ ਵਿਖਾ ਦਿਤਾ ਗਿਆ ਹੋਣ ਤੋਂ ਬਾਅਦ ਅਕਾਲੀ ਲਿਖਾਈ ਫਿਰਦੇ ਲਗਭਗ ਸਾਰੇ ਦਲ ਇਸ ਦੌੜ 'ਚ ਪੈ ਗਏ ਹਨ ਕਿ ਭਾਜਪਾ ਦਾ ਕਿਹੜਾ ਅਕਾਲੀ ਦਲ ਚਹੇਤਾ ਹੈ?
Photo
ਜਿਉਂ ਹੀ ਬਾਦਲ ਅਗਵਾਈ ਵਾਲੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਭਾਜਪਾ ਨੇ ਦਿੱਲੀ ਚੋਣਾਂ ਲਈ ਇੱਕ ਵੀ ਸੀਟ ਦੇਣ ਤੋਂ ਕੋਰਾ ਇਨਕਾਰ ਕਰ ਦਿਤਾ ਤਾਂ ਸੱਭ ਤੋਂ ਪਹਿਲਾਂ ਪਦਮਸ੍ਰੀ ਰਾਜ ਸਭਾ ਮੈਂਬਰ ਤੇ ਸਾਬਕਾ ਕੇਂਦਰੀ ਵਜ਼ੀਰ ਤੇ ਅੱਜ ਕੱਲ੍ਹ ਟਕਸਾਲੀ ਦਲ ਦੇ ਪ੍ਰਾਹੁਣੇ ਬਣੇ ਹੋਏ ਸੁਖਦੇਵ ਸਿੰਘ ਢੀਂਡਸਾ ਗੱਜ-ਵੱਜ ਕੇ ਨਵ ਨਿਯੁਕਤ ਭਾਜਪਾ ਕੌਮੀ ਪ੍ਰਧਾਨ ਜੇਪੀ ਨੱਡਾ ਨੂੰ ਵਧਾਈ ਦੇਣ ਪੁੱਜੇ।
Photo
ਇਸ਼ਾਰਾ ਸਿੱਧਾ ਸੀ ਕਿ ਜਿਵੇਂ ਕਿ ਢੀਂਡਸਾ ਬਾਰੇ ਕਿਹਾ ਜਾਂਦਾ ਹੈ ਕਿ ਉਹ ਸ਼੍ਰੋਮਣੀ ਅਕਾਲੀ ਦਲ ਵਿਚ ਭਾਜਪਾ ਦੇ ਸੱਭ ਤੋਂ ਕਰੀਬੀ ਤੇ ਅੰਦਰੂਨੀ ਨੇਤਾ ਮੰਨੇ ਜਾਂਦੇ ਹਨ, ਸ਼ਾਇਦ ਇਸੇ ਗੱਲ ਦੀ ਠੁੱਕ ਵਜਾਉਣ ਵਾਸਤੇ ਢੀਂਡਸਾ ਨੇ ਨੱਡਾ ਨਾਲ ਗਲਵੱਕੜੀ ਪਾਈ।
Photo
ਇਨ੍ਹਾਂ ਸਤਰਾਂ ਅਤੇ ਕਾਲਮ ਤਹਿਤ ਹੀ ਬੀਤੇ ਦਿਨ ਸਪੋਕਸਮੈਨ ਨੇ ਦਸਿਆ ਸੀ ਕਿ ਇਸ ਗੱਲ ਤੋਂ ਖੌਫ਼ਜ਼ਦਾ ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਸੀਨੀਅਰ ਲੀਡਰਸ਼ਿਪ ਮੰਗਲਵਾਰ ਰਾਤ ਹੀ ਦਿੱਲੀ ਸੱਦ ਲਈ ਹੈ ਬਿਲਕੁਲ ਇਹ ਗੱਲ ਸੱਚ ਸਾਬਤ ਹੋਈ, ਕਿਉਂਕਿ ਸੁਖਬੀਰ ਸਿੰਘ ਬਾਦਲ ਲਾਮ ਲਸ਼ਕਰ ਲੈ ਕੇ ਪਹਿਲਾਂ ਨੱਡਾ ਦੇ ਕੋਲ ਪੁੱਜੇ ਉਨ੍ਹਾਂ ਨੂੰ ਵਧਾਈ ਦਿਤੀ।
Photo
ਫਿਰ ਨੱਡਾ ਸੁਖਬੀਰ ਦੀ ਰਿਹਾਇਸ਼ ਪੁੱਜੇ ਜਿੱਥੇ ਆ ਕੇ ਸੁਖਬੀਰ ਨੇ ਕਿਹਾ ਕਿ ਭਾਵੇਂ ਉਨ੍ਹਾਂ ਨੂੰ ਦਿੱਲੀ ਚੋਣਾਂ 'ਚ ਭਾਜਪਾ ਨੇ ਠੁਠ ਵਿਖਾਇਆ, ਪਰ ਸਾਨੂੰ ਕੋਈ ਫ਼ਰਕ ਨਹੀਂ ਪੈਂਦਾ ਤੇ ਅਸੀਂ ਬਿਨਾਂ ਸ਼ਰਤ ਦਿੱਲੀ ਚੋਣਾਂ 'ਚ ਭਾਜਪਾ ਨੂੰ ਹਮਾਇਤ ਦਿੰਦੇ ਹਾਂ। (ਮੰਨਿਆ ਜੂਨੀਅਰ ਬਾਦਲ ਨੇ ਇਸ ਭਾਸ਼ਾ ਸ਼ੈਲੀ ਚ ਇਹ ਭਾਵ ਪ੍ਰਗਟ ਨਹੀਂ ਕੀਤੇ ਪਰ ਸਿਆਸੀ ਮੰਸ਼ਾ ਇਹੀ ਰਹੀ ਹੋਣ ਤੋਂ ਕੋਈ ਇਨਕਾਰ ਨਹੀਂ ਕਰ ਸਕਦਾ)।
Photo
ਇਸੇ ਦੌਰਾਨ ਸੁਖਬੀਰ ਦੇ ਬੇਹੱਦ ਕਰੀਬੀ ਰਹਿ ਚੁੱਕੇ ਤੇ ਪੰਜਾਬ 'ਚ ਅਕਾਲੀਆਂ 'ਤੇ ਲੱਗੇ ਬਹਿਬਲ ਕਲਾਂ ਤੇ ਬਰਗਾੜੀ ਦੇ ਧੱਬੇ ਕਰ ਕੇ ਵਿਦੇਸ਼ 'ਚ ਜੁੱਤੀਆਂ ਖਾ ਕੇ ਆਏ ਦਿੱਲੀ ਗੁਰਦੁਆਰਾ ਸਿੱਖ ਮੈਨੇਜਮੈਂਟ ਕਮੇਟੀ ਦੇ ਸਾਬਕਾ ਪ੍ਰਧਾਨ ਮਨਜੀਤ ਸਿੰਘ ਜੀ ਕੇ ਵਲੋਂ ਬਣਾਈ ਗਈ ਨਵੀਂ ਪਾਰਟੀ 'ਜਾਗੋ' ਨੇ ਵੀ ਬਿਨਾਂ ਸ਼ਰਤ ਬਿਨਾਂ ਕਿਸੇ ਸੀਟ ਦੇ ਲੈਣ-ਦੇਣ ਤੋਂ ਭਾਜਪਾ ਨੂੰ ਹੀ ਦਿੱਲੀ ਚੋਣਾਂ 'ਚ ਹਮਾਇਤ ਦੇਣ ਦਾ ਐਲਾਨ ਵੀ ਕੀਤਾ ਜਾ ਚੁੱਕਾ ਹੈ।
Photo
ਇਸ ਸੱਭ ਵਰਤਾਰੇ ਤੋਂ ਇਹ ਮਹਿਸੂਸ ਹੋ ਰਿਹਾ ਹੈ ਕਿ ਸਿੱਖ ਭਾਵੇਂ ਅਪਣੇ ਆਪ ਨੂੰ ਇੱਕ ਵੱਖਰੀ ਕੌਮ ਹੋਣ ਦੀ ਲੱਖ ਦੁਹਾਈ ਪਾਉਂਦੇ ਰਹਿਣ ਪਰ ਸਿੱਖਾਂ ਦੇ ਨੇਤਾ ਹੁਣ ਭਾਜਪਾ ਦੇ ਝੋਲੀ ਚੁੱਕ ਬਣੇ ਹੋਣ ਦਾ ਠੱਪਾ ਲਵਾਉਣ ਲਈ ਇੱਕ ਦੂਜੇ ਤੋਂ ਅੱਗੇ ਵਧ ਵਧ ਕੇ ਭਾਜਪਾ ਦੇ ਦਰਬਾਰ ਚ 'ਚੌਕੀਆਂ' ਭਰ ਰਹੇ ਹਨ।
Photo
ਜਿਸ ਤੋਂ ਸਪੱਸ਼ਟ ਹੈ ਕਿ ਪੰਜਾਬ ਵਿਚ 117 ਚੋਂ ਸਿਰਫ਼ 23 ਸੀਟਾਂ 'ਤੇ ਚੋਣ ਲੜਨ ਲਈ ਪਿਛਲੇ ਦੋ ਢਾਈ ਦਹਾਕਿਆਂ ਤੋਂ ਮਜਬੂਰ ਹੋਈ ਭਾਜਪਾ ਸੂਬੇ ਵਿਚ ਭਾਵੇਂ ਕਮਜ਼ੋਰ ਮੰਨੀ ਜਾਂਦੀ ਹੈ ਪਰ ਕੇਂਦਰ 'ਚ ਭਾਜਪਾ ਦੇ ਦਬਦਬੇ ਨੇ ਸਿੱਖ ਸਿਆਸੀ ਜਮਾਤਾਂ ਨੂੰ ਬੁਰੀ ਤਰ੍ਹਾਂ ਲਤਾੜ ਪਛਾੜ ਦਿਤਾ ਹੈ ਜਿਸ ਤੋਂ ਇਕ ਗੱਲ ਪ੍ਰਤੱਖ ਹੈ ਕਿ ਸਿੱਖ ਰਾਜਨੀਤੀ ਅਤੇ ਧਰਮ ਹੁਣ ਅਪਣੀ ਲੀਡਰਸ਼ਿਪ ਸਦਕਾ ਆਰਐਸਐਸ ਕੋਲ 'ਗਿਰਵੀ' ਹੋਣ ਜਾ ਰਿਹਾ ਹੈ।
