ਅਧਿਕਾਰੀਆਂ ਨੇ ਇਸ ਨੂੰ 'ਗੈਰ-ਕਾਨੂੰਨੀ' ਅਭਿਆਸ ਕਰਾਰ ਦਿੱਤਾ ਅਤੇ ਏਐਨਆਈ ਟੈਕਨਾਲੋਜੀਜ਼ ਨੂੰ ਨੋਟਿਸ ਜਾਰੀ ਕੀਤਾ
ਬੰਗਲੁਰੂ: ਉਬੇਰ ਅਤੇ ਓਲਾ ਵਰਗੇ ਐਪ-ਅਧਾਰਿਤ ਐਗਰੀਗੇਟਰਾਂ ਵੱਲੋਂ ਆਟੋ ਰਿਕਸ਼ਾ ਸਵਾਰੀਆਂ ਲਈ ਕਿਰਾਏ ਵਿਚ ਵਾਧੇ ਦੀਆਂ ਸ਼ਿਕਾਇਤਾਂ ਮਿਲਣ ਤੋਂ ਬਾਅਦ, ਕਰਨਾਟਕ ਦੇ ਟਰਾਂਸਪੋਰਟ ਵਿਭਾਗ ਨੇ ਬੈਂਗਲੁਰੂ ਵਿਚ ਵੱਡੇ ਵਾਹਨ ਐਗਰੀਗੇਟਰਾਂ ਨੂੰ ਸ਼ਹਿਰ ਵਿਚ ਆਟੋ ਰਿਕਸ਼ਾ ਸੇਵਾ ਬੰਦ ਕਰਨ ਲਈ ਨੋਟਿਸ ਜਾਰੀ ਕੀਤਾ ਹੈ। ਅਧਿਕਾਰੀਆਂ ਨੇ ਇਸ ਨੂੰ 'ਗੈਰ-ਕਾਨੂੰਨੀ' ਅਭਿਆਸ ਕਰਾਰ ਦਿੱਤਾ ਅਤੇ ਏਐਨਆਈ ਟੈਕਨਾਲੋਜੀਜ਼ ਨੂੰ ਨੋਟਿਸ ਜਾਰੀ ਕੀਤਾ ਅਤੇ ਤਿੰਨ ਦਿਨਾਂ ਲਈ ਆਟੋ ਸੇਵਾਵਾਂ ਬੰਦ ਕਰਨ ਲਈ ਕਿਹਾ ਹੈ। ਵਿਭਾਗ ਨੇ ਉਹਨਾਂ ਨੂੰ ਪਾਲਣਾ ਰਿਪੋਰਟ ਦਾਇਰ ਕਰਨ ਲਈ ਵੀ ਕਿਹਾ ਹੈ।
ਕਈ ਯਾਤਰੀਆਂ ਨੇ ਟਰਾਂਸਪੋਰਟ ਵਿਭਾਗ ਨੂੰ ਸ਼ਿਕਾਇਤ ਕੀਤੀ ਹੈ ਕਿ ਓਲਾ ਅਤੇ ਉਬੇਰ ਐਗਰੀਗੇਟਰ ਘੱਟੋ-ਘੱਟ 100 ਰੁਪਏ ਲੈਂਦੇ ਹਨ ਭਾਵੇਂ ਦੂਰੀ ਦੋ ਕਿਲੋਮੀਟਰ ਤੋਂ ਘੱਟ ਹੋਵੇ। ਸ਼ਹਿਰ ਵਿਚ ਘੱਟੋ-ਘੱਟ ਆਟੋ ਦਾ ਕਿਰਾਇਆ ਪਹਿਲੇ 2 ਕਿਲੋਮੀਟਰ ਲਈ 30 ਰੁਪਏ ਅਤੇ ਉਸ ਤੋਂ ਬਾਅਦ ਹਰ ਕਿਲੋਮੀਟਰ ਲਈ 15 ਰੁਪਏ ਤੈਅ ਕੀਤਾ ਗਿਆ ਹੈ।
ਟਰਾਂਸਪੋਰਟ ਕਮਿਸ਼ਨਰ ਟੀਐਚਐਮ ਕੁਮਾਰ ਅਨੁਸਾਰ ਸੂਬੇ ਦੇ ਆਨ-ਡਿਮਾਂਡ ਟ੍ਰਾਂਸਪੋਰਟੇਸ਼ਨ ਟੈਕਨਾਲੋਜੀ ਐਗਰੀਗੇਟਰ ਨਿਯਮ ਇਹਨਾਂ ਕੰਪਨੀਆਂ ਨੂੰ ਆਟੋ-ਰਿਕਸ਼ਾ ਸੇਵਾਵਾਂ ਚਲਾਉਣ ਦੀ ਆਗਿਆ ਨਹੀਂ ਦਿੰਦੇ ਹਨ ਕਿਉਂਕਿ ਇਹ ਸਿਰਫ਼ ਟੈਕਸੀਆਂ ਤੱਕ ਸੀਮਤ ਸੀ। ਕਮਿਸ਼ਨਰ ਦੁਆਰਾ ਇਕ ਪੱਤਰ ਵਿਚ ਕਿਹਾ ਗਿਆ ਹੈ, "ਐਗਰੀਗੇਟਰ ਸਰਕਾਰੀ ਨਿਯਮਾਂ ਦੀ ਉਲੰਘਣਾ ਕਰਕੇ ਆਟੋ ਰਿਕਸ਼ਾ ਸੇਵਾਵਾਂ ਪ੍ਰਦਾਨ ਕਰ ਰਹੇ ਹਨ। ਇਸ ਦੇ ਨਾਲ ਹੀ ਇਹ ਵਿਭਾਗ ਦੇ ਧਿਆਨ ਵਿਚ ਆਇਆ ਹੈ ਕਿ ਗਾਹਕਾਂ ਤੋਂ ਸਰਕਾਰ ਦੁਆਰਾ ਨਿਰਧਾਰਤ ਦਰਾਂ ਨਾਲੋਂ ਵੱਧ ਰੇਟ ਵਸੂਲੇ ਜਾ ਰਹੇ ਹਨ।"
ਨੋਟਿਸ ਵਿਚ ਕੰਪਨੀਆਂ ਨੂੰ ਆਦੇਸ਼ ਦਿੱਤਾ ਗਿਆ ਹੈ ਕਿ ਆਟੋ ਸੇਵਾਵਾਂ ਨੂੰ ਜਲਦੀ ਤੋਂ ਜਲਦੀ ਬੰਦ ਕੀਤਾ ਜਾਵੇ ਅਤੇ ਨਾਲ ਹੀ ਟੈਕਸੀ ਵਿਚ ਯਾਤਰੀਆਂ ਤੋਂ ਸਰਕਾਰ ਦੁਆਰਾ ਨਿਰਧਾਰਤ ਕਿਰਾਏ ਤੋਂ ਵੱਧ ਕਿਰਾਏ ਨਾ ਲਏ ਜਾਣ। ਵਿਭਾਗ ਨੇ ਹੁਕਮਾਂ ਦੀ ਪਾਲਣਾ ਨਾ ਕਰਨ 'ਤੇ ਕਾਨੂੰਨੀ ਕਾਰਵਾਈ ਦੀ ਚਿਤਾਵਨੀ ਵੀ ਦਿੱਤੀ ਹੈ।
ਪਿਛਲੇ ਮਹੀਨੇ ਟਰਾਂਸਪੋਰਟ ਵਿਭਾਗ ਨੇ ਨਾਗਰਿਕਾਂ ਵੱਲੋਂ ਵੱਧ ਚਾਰਜ ਲੈਣ ਦੀਆਂ ਸ਼ਿਕਾਇਤਾਂ ਦੇ ਆਧਾਰ 'ਤੇ ਰਾਈਡ-ਹੇਲਿੰਗ ਐਪਸ 'ਤੇ 292 ਮਾਮਲੇ ਦਰਜ ਕੀਤੇ ਸਨ। ਯਾਤਰੀ ਇਸ ਮਾਮਲੇ ਵਿਚ ਮੁੱਖ ਮੰਤਰੀ ਦੇ ਨਾਲ-ਨਾਲ ਉੱਚ ਸਰਕਾਰੀ ਅਧਿਕਾਰੀਆਂ ਨੂੰ ਈਮੇਲ ਰਾਹੀਂ ਕਈ ਸ਼ਿਕਾਇਤਾਂ ਦਾਇਰ ਕਰ ਰਹੇ ਹਨ। ਵਿਭਾਗ ਨੇ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਅਜਿਹੇ ਐਗਰੀਗੇਟਰਾਂ ਅਤੇ ਡਰਾਈਵਰਾਂ ਦੀ ਪਛਾਣ ਕਰਨ ਲਈ ਨਿਰੀਖਣ ਮੁਹਿੰਮ ਵੀ ਚਲਾਈ।
