ਫ਼ਤਿਹਗੜ੍ਹ ਸਾਹਿਬ, 19 ਜਨਵਰੀ (ਸੁਰਜੀਤ ਸਿੰਘ ਸਾਹੀ): ਕੇਂਦਰੀ ਵਿੱਤ ਮੰਤਰੀ ਅਰੁਣ ਜੇਤਲੀ ਦੀ ਅਗਵਾਈ ਵਿਚ ਹੋਈ ਜੀ.ਐਸ.ਟੀ. ਕੌਂਸਲ ਦੀ ਮੀਟਿੰਗ ਵਿਚ ਭਾਵੇਂ 29 ਵਸਤਾਂ ਤੇ 54 ਸੇਵਾਵਾਂ ਤੋਂ ਜੀ.ਐਸ.ਟੀ. ਘਟਾ ਦਿਤਾ ਗਿਆ ਹੈ ਪਰ ਇਸ ਵਿਚ ਗੁਰੂ ਘਰਾਂ ਵਲੋਂ ਚਲਾਏ ਜਾ ਰਹੇ 'ਲੰਗਰ' ਦੀਆਂ ਵਸਤਾਂ 'ਤੇ ਜੀਐਸਟੀ ਘਟਾਉਣ ਵਲ ਧਿਆਨ ਹੀ ਨਹੀਂ ਦਿਤਾ ਗਿਆ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸ਼੍ਰੋਮਣੀ ਕਮੇਟੀ ਦੇ ਸਾਬਕਾ ਪ੍ਰਧਾਨ ਪ੍ਰੋ. ਕ੍ਰਿਪਾਲ ਸਿੰਘ ਬਡੂੰਗਰ ਨੇ ਫ਼ਤਿਹਗੜ੍ਹ ਸਾਹਿਬ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕੀਤਾ।
ਉਨ੍ਹਾਂ ਕਿਹਾ ਕਿ ਦਰਬਾਰ ਸਾਹਿਬ ਦੇ ਸ੍ਰੀ ਗੁਰੂ ਰਾਮ ਦਾਸ ਲੰਗਰ ਜਿਥੇ ਰੋਜ਼ਾਨਾਂ ਹੀ ਲੱਖਾ ਸ਼ਰਧਾਲੂ ਲੰਗਰ ਛਕਦੇ ਹਨ, ਉਸ ਲੰਗਰ ਤੋਂ ਜੀਐਸਟੀ ਨਾ ਘਟਾਇਆ ਗਿਆ ਅਤੇ ਨਾ ਹੀ ਹਟਾਇਆ ਗਿਆ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਪਹਿਲਾਂ ਵੀ ਕਈ ਵਾਰ ਗੁਰੂ ਘਰਾਂ ਦੇ ਲੰਗਰ ਦੇ ਸਾਮਾਨ ਤੇ ਲੱਗਣ ਵਾਲੀ ਜੀਐਸਟੀ ਹਟਾਉਣ ਦੀ ਕੇਂਦਰ ਕੋਲੋਂ ਮੰਗ ਕਰ ਚੁੱਕੀ ਹੈ। ਉਨ੍ਹਾਂ ਕਿਹਾ ਕਿ ਕੇਂਦਰੀ ਵਿੱਤ ਮੰਤਰੀ ਪੰਜਾਬ ਦੇ ਧਾਰਮਕ ਇਤਿਹਾਸ, ਸਭਿਆਚਾਰ ਤੇ ਸਿੱਖ ਇਤਿਹਾਸ ਬਾਰੇ ਜਾਣੂ ਹਨ ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਜੀਐਸਟੀ ਕੌਂਸਲ ਦੀਆਂ ਲਗਭਗ 25 ਮੀਟਿੰਗਾਂ ਹੋ ਜਾਣ ਉਪਰੰਤ ਵੀ ਸ਼੍ਰੋਮਣੀ ਕਮੇਟੀ ਦੀ ਮੰਗ 'ਤੇ ਕੋਈ ਧਿਆਨ ਨਹੀਂ ਦਿਤਾ ਗਿਆ।
