ਪੰਥਕ ਆਗੂ ਬਲਦੇਵ ਸਿੰਘ ਸਿਰਸਾ ਨੇ ਕਿਹਾ ਹੈ ਕਿ ਦਰਬਾਰ ਸਾਹਿਬ ਰੋਜ਼ਾਨਾ ਲਗਭਗ ਇਕ ਲੱਖ ਤੋਂ ਵੱਧ ਸੰਗਤ ਮੱਥਾ ਟੇਕਦੀ ਹੈ। ਅਕਾਲ ਤਖ਼ਤ ਦੇ ਸਾਹਮਣੇ ਦਰਸ਼ਨੀ ਡਿਊੜੀ ...

ਅੰਮ੍ਰਿਤਸਰ, : ਪੰਥਕ ਆਗੂ ਬਲਦੇਵ ਸਿੰਘ ਸਿਰਸਾ ਨੇ ਕਿਹਾ ਹੈ ਕਿ ਦਰਬਾਰ ਸਾਹਿਬ ਰੋਜ਼ਾਨਾ ਲਗਭਗ ਇਕ ਲੱਖ ਤੋਂ ਵੱਧ ਸੰਗਤ ਮੱਥਾ ਟੇਕਦੀ ਹੈ। ਅਕਾਲ ਤਖ਼ਤ ਦੇ ਸਾਹਮਣੇ ਦਰਸ਼ਨੀ ਡਿਊੜੀ ਵਿਖੇ ਸੰਗਤ ਦੀ ਗਿਣਤੀ ਜ਼ਿਆਦਾ ਹੋਣ ਕਰ ਕੇ ਬਜ਼ੁਰਗਾਂ, ਨੌਜਵਾਨ ਔਰਤਾਂ, ਬੱਚਿਆਂ ਤੇ ਅਪੰਗ ਸ਼ਰਧਾਲੂਆਂ ਦਾ ਗਰਮੀ ਵਿਚ ਬੁਰਾ ਹਾਲ ਹੁੰਦਾ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਦਰਬਾਰ ਸਾਹਿਬ ਵਿਖੇ ਮੱਥਾ ਟੇਕਣ ਲਈ ਔਰਤਾਂ, ਬਜ਼ੁਰਗਾਂ ਅਤੇ ਅਪੰਗਾਂ ਲਈ ਇਕ ਵਖਰੀ ਲਾਈਨ ਬਣਾਈ ਜਾਵੇ ਤਾਕਿ ਉਹ ਆਰਾਮ ਨਾਲ ਦਰਸ਼ਨ ਕਰ ਸਕਣ। ਦਰਸ਼ਨੀ ਡਿਉਢੀ ਸਥਿਤ ਪੁੱਲ ਤੋਂ ਦਰਬਾਰ ਸਾਹਿਬ ਵਿਖੇ ਮੱਥਾ ਟੇਕਣ ਜਾਣ ਲਈ ਤਿੰਨ ਲਾਈਨਾਂ ਹਨ। ਪਹਿਲੀਆਂ ਦੋ ਲਾਈਨਾਂ ਵਿਚ ਔਰਤਾਂ ਮਰਦ, ਬਜ਼ੁਰਗ, ਬੱਚੇ ਆਦਿ ਹੁੰਦੇ ਹਨ ਤੇ ਤੀਜੀ ਲਾਈਨ 'ਚ ਮੱਥਾ ਟੇਕ ਕੇ ਵਾਪਸ ਆਉਣ ਵਾਲੀ ਸੰਗਤ ਹੁੰਦੀ ਹੈ। 

Darbar Sahib

ਬਲਦੇਵ ਸਿੰਘ ਸਿਰਸਾ ਨੇ ਗੁਰੁ ਘਰ ਵਿਖੇ ਵੀ.ਆਈ.ਪੀ ਕਲਚਰ ਦੇ ਵੱਧ ਰਹੇ ਰੁਝਾਨ ਨੂੰ ਬੰਦ ਕਰਨ ਦੀ ਗੱਲ ਕਰਦਿਆਂ ਕਿਹਾ ਕਿ ਦਰਬਾਰ ਸਾਹਿਬ ਵਿਖੇ ਮੱਥਾ ਟੇਕਣ ਜਾਣ ਸਮੇਂ ਵਿਚਲੀ ਛੋਟੀ ਲਾਈਨ ਬਜ਼ੁਰਗਾਂ, ਬੱਚਿਆਂ ਵਾਲੀਆ ਔਰਤਾਂ ਤੇ ਅਪੰਗ ਸ਼ਰਧਾਲੂਆਂ ਲਈ ਰਾਖਵੀਂ ਕੀਤੀ ਜਾਵੇ। ਸਿਰਸਾ ਨੇ ਸ਼੍ਰੋਮਣੀ ਕਮੇਟੀ ਨੂੰ ਇਹ ਸੁਝਾਅ ਦਿਤਾ ਹੈ ਕਿ ਔਰਤਾਂ ਤੇ ਮਰਦਾਂ ਲਈ ਵਖਰੀਆਂ-ਵਖਰੀਆਂ ਲਾਈਨਾਂ ਬਣਾਈਆਂ ਜਾਣ। ਉਨਾਂ ਕਿਹਾ ਕਿ ਦਰਬਾਰ ਸਾਹਿਬ ਵਿਚ ਕੀਰਤਨ ਸੁਣਨ ਤੇ ਹੁਕਮਨਾਮਾ ਲੈਣ ਦੌਰਾਨ ਸਿਰਫ਼ ਸ਼੍ਰੋਮਣੀ ਕਮੇਟੀ ਦੇ ਮੈਂਬਰ ਜਾਂ ਅਧਿਕਾਰੀ ਹੀ ਬੈਠੇ ਹੁੰਦੇ ਹਨ ਜਿਸ ਕਾਰਨ ਸੰਗਤ ਨੂੰ ਬੈਠ ਕੇ ਬਾਣੀ ਸੁਣਨ ਦਾ ਮੌਕਾ ਨਹੀਂ ਮਿਲਦਾ।