ਪਿਤਰੋਦਾ ਨੂੰ ਅਹੁਦੇ ਤੋਂ ਹਟਾਏ ਬਿਨਾਂ ਰਾਹੁਲ ਗਾਂਧੀ ਦਾ ਅਫ਼ਸੋਸ ਜਿਤਾਉਣਾ ਸਿੱਖਾਂ ਦੇ ਰਿਸਦੇ ਜ਼ਖ਼ਮਾਂ 'ਤੇ ਲੂਣ
ਕਲਾਨੌਰ : 'ਸਤਿਆ ਨਾਰਾਇਣ ਸ਼ਰਮਾ ਜਿਨ ਕਾਰ ਕਰਿਆ ਕਰੇਗੀ' ਪੰਜਾਬ ਕਾਂਗਰਸ ਆਗੂ ਰਾਜਾ ਵੜਿੰਗ ਵਲੋਂ ਹਿੰਦੂ ਸਿੱਖਾਂ ਵਿਚ ਨਫ਼ਰਤ ਪੈਦਾ ਕਰਨ ਵਾਲੇ ਬੇਤੁਕੇ ਬਿਆਨ ਅਤੇ ਇੰਡੀਅਨ ਓਵਰਸੀਜ਼ ਕਾਂਗਰਸ ਦੇ ਪ੍ਰਧਾਨ ਸੈਮ ਪਿਤਰੋਦਾ ਵਲੋਂ '1984 ਮੇਂ ਜੋ ਹੂਆ ਸੋ ਹੁਆ' ਨੇ ਸਿੱਖ ਭਾਵਨਾਵਾਂ ਨੂੰ ਗਹਿਰੀ ਠੇਸ ਪਹੁੰਚਾਈ ਹੈ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਗੁਰਦਵਾਰਾ ਯਾਦਗਾਰ-ਏ-ਸ਼ਹੀਦਾਂ, ਪਿੰਡ- ਅਗਵਾਨ ਦੇ ਮੁੱਖ ਸੇਵਾਦਾਰ ਅਤੇ ਸ਼ਹੀਦ ਭਾਈ ਸਤਵੰਤ ਸਿੰਘ ਅਗਵਾਨ ਦੇ ਭਤੀਜਾ ਜਥੇ: ਭਾਈ ਸੁਖਵਿੰਦਰ ਸਿੰਘ ਅਗਵਾਨ ਨੇ ਕੀਤਾ।
Sam Pitroda
ਉਨ੍ਹਾਂ ਕਿਹਾ ਕਿ ਸਿੱਖ ਜਜ਼ਬਾਤਾਂ ਨੂੰ ਸੱਟ ਮਾਰਨ ਵਾਲੇ ਕਾਂਗਰਸੀ ਆਗੂਆਂ ਦੇ ਅਜਿਹੇ ਬਿਆਨ ਇਸ ਗੱਲ ਦਾ ਪ੍ਰਤੱਖ ਸਬੂਤ ਹਨ ਕਿ ਕਾਂਗਰਸ ਦੀ ਮਾਨਸਿਕਤਾ ਮੁਢ ਕਦੀਮ ਤੋਂ ਹੀ ਸਿੱਖਾਂ ਵਿਰੁਧ ਰਹੀ ਹੈ। ਕਾਂਗਰਸੀਆਂ ਦੀ ਭਾਸ਼ਾ ਦਸ ਰਹੀ ਹੈ ਕਿ ਕਾਂਗਰਸ ਦੇ ਚਰਿੱਤਰ ਵਿਚ ਜ਼ਿੰਦਗੀ ਦਾ ਕੋਈ ਮੁਲ ਨਹੀਂ ਹੈ।ਉਨ੍ਹਾਂ ਨੇ ਸੈਮ ਪਿਤਰੋਦਾ ਨੂੰ ਅਹੁਦੇ ਤੋਂ ਹਟਾਏ ਬਿਨਾਂ ਰਾਹੁਲ ਗਾਂਧੀ ਵਲੋਂ ਉਸ ਦੇ ਬਿਆਨ 'ਤੇ ਅਫ਼ਸੋਸ ਜਿਤਾਉਣ ਨੂੰ ਮਗਰਮੱਛ ਦੇ ਅੱਥਰੂ ਵਹਾਉਣ ਅਤੇ ਸਿੱਖਾਂ ਦੇ ਰਿਸਦੇ ਜ਼ਖ਼ਮਾਂ 'ਤੇ ਲੂਣ ਛਿੜਕਣ ਦੇ ਤੁਲ ਕਰਾਰ ਦਿਤਾ।
Raja Warring
ਉਨ੍ਹਾਂ ਕਿਹਾ ਕਿ ਸੈਮ ਦਾ ਬਿਆਨ ਰਾਜੀਵ ਗਾਂਧੀ ਦੇ ਉਸ ਬਿਆਨ ਦੀ ਤਰਜਮਾਨੀ ਹੈ ਜਿਸ ਵਿਚ ਉਸ ਨੇ ''ਜਬ ਕੋਈ ਬੜਾ ਪੇੜ ਗਿਰਤਾ ਹੈ ਤੋਂ ਧਰਤੀ ਹਿਲਤੀ ਹੈ'' ਕਿਹਾ ਸੀ। ਇਸ ਨਾਲ ਹੀ ਉਨ੍ਹਾਂ ਰਾਜਾ ਵੜਿੰਗ ਵਲੋਂ ਹਿੰਦੂ ਅਤੇ ਸਿੱਖ ਭਾਈਚਾਰਿਆਂ ਵਿਚ ਨਫ਼ਰਤ ਪੈਦਾ ਕਰਨ ਵਾਲੇ ਦਿਤੇ ਬਿਆਨਾਂ ਦੀ ਸਖ਼ਤ ਨਿਖੇਧੀ ਕੀਤੀ। ਉਨ੍ਹਾਂ ਸੰਵੇਦਨਸ਼ੀਲ ਮਾਮਲਿਆਂ ਵਿਚ 'ਸੋਚ ਸਮਝ' ਕੇ ਬੋਲਣ ਦੀ ਨਸੀਹਤ ਵੀ ਦਿਤੀ ਅਤੇ ਸਿੱਖ ਭਾਵਨਾਵਾਂ ਨਾਲ ਖੇਡਣ ਦੀ ਥਾਂ ਵੜਿੰਗ ਨੂੰ ਬੀਤੇ ਤੋਂ ਸਬਕ ਸਿਖਣ ਦੀ ਵੀ ਸਲਾਹ ਦਿਤੀ।
