ਰਾਜ ਸਭਾ ਦੇ ਸਾਂਸਦ ਰਾਘਵ ਚੱਢਾ ਨੇ ਸਹੀ ਫ਼ੁਰਮਾਇਆ ਕਿ ED ਦੀ ਮਿਹਰਬਾਨੀ ਕਾਰਨ ਮੋਦੀ ਪੱਖੀ 38 ਪਾਰਟੀਆਂ ਵੀ ਇਕੱਠੀਆਂ ਕਰ ਲਈਆਂ ਗਈਆਂ ਹਨ।
26 ਵਿਰੋਧੀ ਪਾਰਟੀਆਂ ਦਾ ਗਠਜੋੜ ਐਲਾਨਿਆ ਗਿਆ ਹੈ ਤੇ ਰਾਜ ਸਭਾ ਦੇ ਸਾਂਸਦ ਰਾਘਵ ਚੱਢਾ ਨੇ ਸਹੀ ਫ਼ੁਰਮਾਇਆ ਕਿ ਈਡੀ ਦੀ ਮਿਹਰਬਾਨੀ ਕਾਰਨ ਮੋਦੀ ਪੱਖੀ 38 ਪਾਰਟੀਆਂ ਵੀ ਇਕੱਠੀਆਂ ਕਰ ਲਈਆਂ ਗਈਆਂ ਹਨ। ਪੁਰਾਣੀ ਪ੍ਰਚਲਤ ਕਹਾਵਤ ਮੁੜ ਤੋਂ ਠੀਕ ਸਿੱਧ ਹੋਈ ਜੋ ਕਹਿੰਦੀ ਹੈ ਕਿ ਕਦੇ ਕਿਸੇ ਨੂੰ ਏਨਾ ਨਹੀਂ ਸਤਾਉਣਾ ਚਾਹੀਦਾ ਕਿ ਉਹ ਡਰਨਾ ਹੀ ਭੁੱਲ ਜਾਵੇ। ਵਿਰੋਧੀ ਧਿਰਾਂ ਕੋਲ ਈਡੀ ਤੋਂ ਬਚਣ ਦਾ ਇਕੋ ਰਾਹ ਛਡਿਆ ਗਿਆ ਸੀ ਪਰ ਹੁਣ ਮਜਬੂਰੀ ਵਿਚ ਵਿਰੋਧੀ ਧਿਰ ਨੇ ਇਕ ਹੋਰ ਰਾਹ ਕੱਢ ਲਿਆ ਹੈ। ਪਾਰਟੀ ਬਦਲਣ ਦੀ ਬਜਾਏ ਇਨ੍ਹਾਂ ਨੇ ਅਪਣੀਆਂ ਦੁਸ਼ਮਣੀਆਂ ਨੂੰ ਹੀ ਅਪਣੀ ਤਾਕਤ ਬਣਾ ਲਿਆ ਹੈ।
ਪ੍ਰਧਾਨ ਮੰਤਰੀ ਮੋਦੀ ਦਾ, ਪਲਾਂ ਵਿਚ ‘ਇੰਡੀਆ’ ਗਠਜੋੜ ਉਤੇ ਹਮਲਾਵਰ ਹੋ ਜਾਣ ਦਾ ਮਤਲਬ ਸਾਫ਼ ਹੈ ਕਿ ਇਹ ਗਠਜੋੜ ਭਾਜਪਾ ਵਾਸਤੇ ਖ਼ਤਰੇ ਦੀ ਘੰਟੀ ਹੈ। ਭਾਵੇਂ ਮਾਹਰਾਂ ਦੇ ਅੰਕੜੇ ਇਹ ਅਨੁਮਾਨ ਲਗਾਉਣ ਵਿਚ ਜੁਟੇ ਹੋਏ ਹਨ ਕਿ ਇਹ ਸਾਰੇ ਮਿਲ ਕੇ ਅੱਜ ਵੀ ਭਾਜਪਾ ਦੇ ਸਾਹਮਣੇ ਕਮਜ਼ੋਰ ਪੈ ਜਾਂਦੇ ਹਨ ਪਰ 2024 ਵਿਚ ਇਹ ਗਠਜੋੜ ਬਹੁਤ ਵਖਰੇ ਰੂਪ ਵਿਚ ਸਾਹਮਣੇ ਆ ਸਕਦਾ ਹੈ। ਜਦ ਲੋਕਾਂ ਕੋਲ ਸਿਰਫ਼ ਦੋ ਹੀ ਵਿਕਲਪ ਹੋਣਗੇ, ਸੂਬਾ ਪਧਰੀ ਪਾਰਟੀਆਂ ਵੀ ਐਨ.ਡੀ.ਏ. ਜਾਂ ‘ਇੰਡੀਆ’ ਗਠਜੋੜ ਵਿਚ ਸ਼ਾਮਲ ਹੋ ਗਈਆਂ ਤਾਂ ਨਤੀਜੇ ਬਦਲ ਵੀ ਸਕਦੇ ਹਨ।
ਪਰ ਕੀ ਇਹ ਪਹਿਲਾ ਕਦਮ ਤੇ ਪਹਿਲੀ ਜਿੱਤ ਸਿਰਫ਼ ਵਿਰੋਧੀ ਧਿਰ ਦੇ ਸਤਾਏ ਹੋਏ ਸਿਆਸਤਦਾਨਾਂ ਦੀ ਜਿੱਤ ਹੈ? ਨਹੀਂ, ਇਨ੍ਹਾਂ ਨੂੰ ਆਉਣ ਵਾਲੇ ਸਮੇਂ ਵਿਚ ਆਮ ਭਾਰਤੀ ਨੂੰ ਵਿਸ਼ਵਾਸ ਦਿਵਾਉਣਾ ਪਵੇਗਾ ਕਿ ਇਨ੍ਹਾਂ ਦਾ ਗਠਜੋੜ ਸਿਰਫ਼ ਅਪਣੇ ਬਚਾਅ ਵਾਸਤੇ ਨਹੀਂ ਤੇ ਇਹ ‘ਇੰਡੀਆ’ ਬਣਾ ਕੇ ਭਾਰਤ ਦੇ ਆਮ ਨਾਗਰਿਕ ਵਾਸਤੇ ਕਿਹੜਾ ਭਵਿੱਖ ਸਿਰਜਣਾ ਚਾਹੁੰਦੇ ਹਨ ਤੇ ਇਨ੍ਹਾਂ ਦਾ ਇਕੱਠ ਸਿਰਫ਼ 2024 ਦੀਆਂ ਵੋਟਾਂ ਤਕ ਨਹੀਂ ਹੈ ਬਲਕਿ ਅੱਗੇ ਵੀ ਕਾਇਮ ਰਹੇਗਾ। ਜਦ ਕੋਈ ਸਿਆਸਤਦਾਨ ਭਾਵੇਂ ਕਾਂਗਰਸੀ ਹੀ ਹੋਵੇ, ਭਾਜਪਾ ਵਿਚ ਸ਼ਾਮਲ ਹੁੰਦਾ ਹੈ, ਉਸ ਵਿਚ ਸਬਰ ਤੇ ਅਨੁਸ਼ਾਸਨ ਆ ਜਾਂਦਾ ਹੈ ਤੇ ਲੋਕ ਉਸ ਅਨੁਸ਼ਾਸਨ ਨੂੰ ਪਸੰਦ ਕਰਦੇ ਹਨ।
ਇਹ ਵਿਰੋਧੀ ਪਾਰਟੀਆਂ ਦਾ ਮੇਲ ਕੀ ਇਕੱਠੇ ਹੋ ਕੇ ਅਪਣੀਆਂ ਨਿਜੀ ਲਾਲਸਾਵਾਂ ਭੁਲਾ ਕੇ ਇਕ ਸਾਂਝੇ ਗਠਜੋੜ ਵਿਚ ਅਨੁਸ਼ਾਸਨ ਨਾਲ ਖੜਾ ਰਹਿ ਸਕੇਗਾ? ਇਹ ਇਸ ਦਾ ਸੱਭ ਤੋਂ ਵੱਡਾ ਇਮਤਿਹਾਨ ਹੋਵੇਗਾ। ਇਸ ਗਠਜੋੜ ਦੀ ਸੱਭ ਤੋਂ ਵੱਡੀ ਚੁਨੌਤੀ ‘ਕਾਂਗਰਸ’ ਤੇ ‘ਆਪ’ ਵਿਚਕਾਰ ਸਾਬਤ ਹੋਵੇਗੀ ਕਿਉਂਕਿ ‘ਆਪ’ ਦੀ ਹੋਂਦ ਭਾਜਪਾ ਨੂੰ ਨਹੀਂ ਬਲਕਿ ਕਾਂਗਰਸ ਨੂੰ ਹਟਾਉਣ ਦੀ ਸੋਚ ਨਾਲ ਹੋਈ ਸੀ।
‘ਆਪ’ ਵੀ ਸੱਭ ਤੋਂ ਵੱਡੀ ਰਾਸ਼ਟਰੀ ਪਾਰਟੀ ਬਣਨ ਵਿਚ ਜੁਟੀ ਹੋਈ ਹੈ ਤੇ ਇਨ੍ਹਾਂ ਵਿਚਕਾਰ ਸੂਬਾ ਪਧਰੀ ਸਮਝੌਤਾ ਨਹੀਂ ਹੋ ਸਕਦਾ। ਪੰਜਾਬ ਦੇ ਕਾਂਗਰਸੀ ਆਗੂ ਇਸ ਲੜਾਈ ਵਿਚ ਪਿਆਦੇ ਵੀ ਬਣੇ ਹਨ ਪਰ ਦੂਜੇ ਪਾਸੇ ਇਹ ਵੀ ਮੰਨਣਾ ਪਵੇਗਾ ਕਿ ਉਨ੍ਹਾਂ ਨੇ ‘ਆਪ’ ਦਾ ਕੰਮ ਸੌਖਾ ਵੀ ਕਰ ਦਿਤਾ ਹੈ। ਪਿਛਲੀ ਕਾਂਗਰਸ ਸਰਕਾਰ ਦੀ ਅੱਧੀ ਕੈਬਨਿਟ ਭਾਜਪਾ ਵਿਚ ਬੈਠੀ ਹੈ ਤੇ ਅੱਧੀ ਵਿਜੀਲੈਂਸ ਦੇ ਚੱਕਰਾਂ ਵਿਚ ਫਸੀ ਹੋਈ ਹੈ, ਇਸ ਲਈ ਸਫ਼ਲਤਾ ਦਾ ਰਾਹ ਏਨਾ ਸਿੱਧਾ ਪਧਰਾ ਵੀ ਨਹੀਂ। ਇਕ ਗੱਲ ਜ਼ਰੂਰ ਨਿਸ਼ਚਿਤ ਹੈ ਕਿ 2024 ਦੀਆਂ ਚੋਣਾਂ ਦੇ ਨਤੀਜੇ ਹੁਣ ਕਿਸੇ ਵੀ ਪਾਸੇ ਉਲਰ ਸਕਦੇ ਹਨ।
- ਨਿਮਰਤ ਕੌਰ
