ਪਾਕਿਸਤਾਨ ਦੇ ਪੇਸ਼ਾਵਰ ਵਿਚ ਇਕ ਪਤੀ ਨੇ ਆਪਣੀ ਪਤਨੀ ਦੇ ਸਿਰ ਤੋਂ ਦੁਪੱਟਾ ਉਤਰਨ 'ਤੇ ਹੈਰਾਨ ਕਰ ਦੇਣ ਵਾਲੀ ਸਜ਼ਾ ਦਿੱਤੀ ਹੈ।
ਪੇਸ਼ਾਵਰ: ਪਾਕਿਸਤਾਨ ਦੇ ਪੇਸ਼ਾਵਰ ਵਿਚ ਇਕ ਵਿਅਕਤੀ ਨੇ ਆਪਣੀ ਪਤਨੀ ਦੇ ਸਾਰੇ ਵਾਲ ਇਸ ਕਰਕੇ ਕੱਟ ਦਿੱਤੇ ਕਿਉਂਕਿ ਇਕ ਵਿਆਹ ਸਮਾਰੋਹ ਦੌਰਾਨ ਉਸਨੇ ਆਪਣਾ ਸਿਰ ਨਹੀਂ ਢਕਿਆ। ਸਿਰਫ ਇਹੀ ਨਹੀਂ, ਇਸਤੋਂ ਪਹਿਲਾਂ ਉਸ ਨੇ ਆਪਣੀ ਪਤਨੀ ਨੂੰ ਬਹੁਤ ਕੁੱਟਿਆ।
ਇਕ ਨਿਊਜ਼ ਰਿਪੋਰਟ ਅਨੁਸਾਰ ਬੀਤੀ 27 ਮਾਰਚ ਨੂੰ ਔਰਤ ਦੀ ਸ਼ਿਕਾਇਤ ‘ਤੇ ਮਾਥਰਾ ਪੁਲਿਸ ਸਟੇਸ਼ਨ ਵਿਚ ਐਫਆਈਆਰ ਦਰਜ ਕੀਤੀ ਗਈ ਹੈ। ਔਰਤ ਨੇ ਆਪਣੀ ਸ਼ਿਕਾਇਤ ਦੌਰਾਨ ਪੁਲਿਸ ਨੂੰ ਦੱਸਿਆ ਕਿ ਇਸ ਮਹੀਨੇ ਦੀ ਸ਼ੁਰੂਆਤ ਵਿਚ ਉਹ ਆਪਣੇ ਪਤੀ ਦੇ ਭਰਾ ਦੇ ਵਿਆਹ ‘ਤੇ ਗਈ ਸੀ। ਸਮਾਰੋਹ ਵਿਚ ਰਿਸ਼ਤੇਦਾਰ ਨਾਲ ਮੁਲਾਕਾਤ ਕਰਦਿਆਂ ਉਸ ਦਾ ਦੁਪੱਟਾ ਸਿਰ ਤੋਂ ਫਿਸਲ ਗਿਆ, ਜਿਸ ਨੂੰ ਉਸ ਦੇ ਪਤੀ ਨੇ ਦੇਖ ਲਿਆ।
ਇਸ ਤੋਂ ਬਾਅਦ ਜਦੋਂ ਉਹ ਆਪਣੇ ਪਤੀ ਨਾਲ ਘਰ ਵਾਪਿਸ ਆਈ ਤਾਂ ਉਸਦੇ ਪਤੀ ਨੇ ਉਸ ‘ਤੇ ਸਿਰ ਨਾ ਢਕਣ ਦਾ ਦੋਸ਼ ਲਗਾ ਕੇ, ਉਸ ਨੂੰ ਬੁਰੀ ਤਰ੍ਹਾਂ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਔਰਤ ਦਾ ਕਹਿਣਾ ਹੈ ਕਿ ਜਿਸ ਸਮੇਂ ਉਸ ਦਾ ਪਤੀ ਉਸ ਨੂੰ ਕੁੱਟ ਰਿਹਾ ਸੀ, ਉਸ ਸਮੇਂ ਘਰ ਵਿਚ ਉਸਦੇ ਤਿੰਨ ਸਾਲ ਦੇ ਬੱਚੇ ਤੋਂ ਇਲਾਵਾ ਕੋਈ ਨਹੀਂ ਸੀ, ਇਸ ਲਈ ਉਹ ਉਸਨੂੰ ਕੁੱਟਦਾ ਰਿਹਾ। ਇਸਤੋਂ ਬਾਅਦ ਉਸਨੇ ਕੈਂਚੀ ਚੁੱਕੀ ਅਤੇ ਉਸਦੇ ਸਿਰ ਦੇ ਸਾਰੇ ਵਾਲਾਂ ਨੂੰ ਕੱਟ ਦਿੱਤਾ।
