ਡਰਾਈਵਰ ਦੀ ਵੀ ਗੋਲੀਆਂ ਲੱਗਣ ਨਾਲ ਮੌਤ
ਕਰਾਚੀ, 11 ਅਕਤੂਬਰ : ਪਾਕਿਸਤਾਨ ਦੇ ਕਰਾਚੀ ਸ਼ਹਿਰ ਵਿਚ ਇਕ ਪ੍ਰਭਾਵਸ਼ਾਲੀ ਸੁੰਨੀ ਮੌਲਾਨਾ ਅਤੇ ਉਸ ਦੇ ਵਾਹਨ ਚਾਲਕ ਦੀ ਅਣਪਛਾਤੇ ਬਦਮਾਸ਼ਾਂ ਨੇ ਗੋਲੀ ਮਾਰ ਕੇ ਹਤਿਆ ਕਰ ਦਿਤੀ। ਪੁਲਿਸ ਅਧਿਕਾਰੀਆਂ ਅਨੁਸਾਰ ਕਰਾਚੀ ਦੇ ਜਾਮੀਆ ਫ਼ਾਰੂਕੀਆ ਮਦਰਸੇ ਦੇ ਪ੍ਰਮੁਖ ਮੌਲਾਨਾ ਡਾਕਟਰ ਆਦਿਲ ਖ਼ਾਨ ਨੂੰ ਸਨਿਚਰਵਾਰ ਨੂੰ ਕਥਿਤ ਤੌਰ 'ਤੇ ਨਿਸ਼ਾਨਾ ਬਣਾ ਕੇ ਹਮਲਾ ਕੀਤਾ ਗਿਆ।
image
ਖ਼ਾਨ ਸ਼ਾਹ ਫ਼ੈਸਲ ਕਲੋਨੀ ਵਿਚ ਸਥਿਤ ਮਦਰਸੇ ਜਾਮੀਆ ਫ਼ਾਰੂਕੀਆ ਦੇ ਸੰਸਥਾਪਕ ਮਸ਼ਹੂਰ ਵਿਦਵਾਨ ਮੌਲਾਨਾ ਸਲੀਮੁੱਲਾ ਖ਼ਾਨ ਦੇ ਬੇਟੇ ਸਨ। ਜਾਮੀਆ ਫ਼ਾਰੂਕੀਆ ਦੇਵਬੰਦੀ ਪੰਥ ਦੀ ਸੁੰਨੀ ਮੁਸਲਿਮ ਬਰਾਂਚਾਂ ਦੀ ਪਾਲਣਾ ਕਰਦੇ ਸਨ।
ਪੁਲਿਸ ਦੇ ਬਿਆਨ ਅਨੁਸਾਰ ਖ਼ਾਨ ਨੂੰ ਲਿਜਾ ਰਹੀ ਕਾਰ ਜਦੋਂ ਸ਼ਾਹ ਫ਼ੈਸਲ ਕਲੋਨੀ ਵਿਚ ਇਕ ਸ਼ਾਪਿੰਗ ਸੈਂਟਰ ਨੇੜੇ ਰੁਕੀ, ਤਾਂ ਦੋਪਹੀਆ ਵਾਹਨ 'ਤੇ ਸਵਾਰ ਬਦਮਾਸ਼ਾਂ ਨੇ ਉਨ੍ਹਾਂ 'ਤੇ ਅੰਨ੍ਹੇਵਾਹ ਗੋਲੀਆਂ ਚਲਾਈਆਂ ਅਤੇ ਫਰਾਰ ਹੋ ਗਏ। ਪਾਕਿ ਮੀਡੀਆ ਨੇ ਹਸਪਤਾਲ ਦੀ ਬੁਲਾਰੀ ਅੰਜੁਮ ਰਿਜ਼ਵੀ ਦੇ ਹਵਾਲੇ ਨਾਲ ਕਿਹਾ ਕਿ ਖ਼ਾਨ ਨੂੰ ਲਿਆਕਤ ਨੈਸ਼ਨਲ ਹਸਪਤਾਲ ਵਿਚ ਲਿਜਾਇਆ ਗਿਆ, ਜਿਥੇ ਉਨ੍ਹਾਂ ਦੀ ਮੌਤ ਹੋ ਗਈ।
ਉਨ੍ਹਾਂ ਦੇ ਵਾਹਨ ਚਾਲਕ ਨੂੰ ਜਿੰਨਾਂਹ ਪੋਸਟ ਗਰੈਜੂਏਟ ਮੈਡੀਕਲ ਸੈਂਟਰ ਲਿਜਾਇਆ ਗਿਆ, ਜਿਥੇ ਪਹੁੰਚਣ ਤੋਂ ਪਹਿਲਾਂ ਹੀ ਉਸ ਦੀ ਵੀ ਮੌਤ ਹੋ ਗਈ। (ਪੀਟੀਆਈ)
