ਭਾਰਤੀ ਕ੍ਰਿਕਟ ਟੀਮ ਤੋਂ ਬਾਹਰ ਚੱਲ ਰਹੇ ਸਲਾਮੀ ਬੱਲੇਬਾਜ਼ ਗੌਤਮ ਗੰਭੀਰ ਨੇ ਰੱਖੜੀ ਦਾ ਤਿਉਹਾਰ ਬਹੁਤ ਹੀ ਖ਼ਾਸ ਅੰਦਾਜ਼ 'ਚ ਮਨਾਇਆ ਹੈ..........
ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਤੋਂ ਬਾਹਰ ਚੱਲ ਰਹੇ ਸਲਾਮੀ ਬੱਲੇਬਾਜ਼ ਗੌਤਮ ਗੰਭੀਰ ਨੇ ਰੱਖੜੀ ਦਾ ਤਿਉਹਾਰ ਬਹੁਤ ਹੀ ਖ਼ਾਸ ਅੰਦਾਜ਼ 'ਚ ਮਨਾਇਆ ਹੈ। ਨਾਲ ਹੀ ਉਨ੍ਹਾਂ ਨੇ ਭਰਾ-ਭੈਣ ਦੇ ਇਸ ਪਵਿੱਤਰ ਤਿਉਹਾਰ 'ਤੇ ਸੱਭ ਦੇਸ਼ ਵਾਸੀਆਂ ਨੂੰ ਇਕ ਚੰਗਾ ਸੰਦੇਸ਼ ਦਿਤਾ ਹੈ। ਐਤਵਾਰ ਨੂੰ ਪੂਰਾ ਦੇਸ਼ ਰੱਖੜੀ ਦਾ ਤਿਉਹਾਰ ਮਨਾ ਰਿਹਾ ਸੀ ਤਾਂ ਗੌਤਮ ਗੰਭੀਰ ਨੇ ਵੀ ਮਾਨਤਵਾ ਦੀ ਇਕ ਵੱਡੀ ਉਦਾਹਰਨ ਪੇਸ਼ ਕਰਦਿਆਂ ਕਿੰਨਰਤੋਂ ਰੱਖੜੀ ਬੰਨ੍ਹਵਾਈ ਹੈ। ਇਸ ਤਰ੍ਹਾਂ ਗੌਤਮ ਗੰਭੀਰ ਨੇ ਉਨ੍ਹਾਂ ਨੂੰ ਵੀ ਰੱਖੜੀ ਦਾ ਤਿਉਹਾਰ ਮਨਾਉਣ ਦਾ ਮੌਕਾ ਦਿਤਾ।
ਗੰਭੀਰ ਨੇ ਦੋ ਟ੍ਰਾਂਸਜ਼ੈਂਡਰਾਂ ਨੂੰ ਅਪਣੀ ਭੈਣ ਬਣਾਇਆ ਹੈ। ਉਸ ਨੇ ਰੱਖੜੀ ਦੇ ਤਿਉਹਾਰ ਮੌਕੇ ਅਬੀਨਾ ਅਹਿਰ ਅਤੇ ਸਿਮਰਨ ਸ਼ੇਖ਼ ਨਾਮ ਦੀਆਂ ਕਿੰਨਰਾਂ ਤੋਂ ਰੱਖੜੀ ਬੰਨ੍ਹਵਾ ਕੇ ਇਕ ਚੰਗਾ ਸੰਦੇਸ਼ ਦਿਤਾ ਹੈ। ਗੰਭੀਰ ਨੇ ਸੋਸ਼ਲ ਮੀਡੀਆ 'ਤੇ ਇਸ ਸਬੰਧੀ ਫ਼ੋਟੋ ਵੀ ਸਾਂਝੀ ਕੀਤੀ ਹੈ ਅਤੇ ਨਾਲ ਲਿਖਿਆ ਕਿ ਇਨ੍ਹਾਂ ਦਾ ਪੁਰਸ਼ ਜਾਂ ਮਹਿਲਾ ਹੋਣਾ ਕੋਈ ਮਾਇਨੇ ਨਹੀਂ ਰੱਖਦਾ। ਇੱਥੇ ਮਾਨਵਤਾ ਦੇ ਮਾਇਨੇ ਹਨ। ਇਨ੍ਹਾਂ ਤੋਂ ਰੱਖੜੀ ਬੰਨ੍ਹਵਾ ਕੇ ਮੈਂ ਅਪਣੇ ਆਪ ਨੂੰ ਕਿਸਮਤ ਵਾਲਾ ਸਮਝ ਰਿਹਾ ਹਾਂ। (ਏਜੰਸੀ)
