ਮੋਹਾਲੀ 'ਚ ਪ੍ਰਦਰਸ਼ਨ ਕਰ ਰਹੇ ਕੱਚੇ ਅਧਿਆਪਕਾਂ 'ਤੇ ਪੁਲਿਸ ਨੇ ਕੀਤੀਆਂ ਪਾਣੀ ਦੀਆਂ ਬੁਛਾੜਾਂ

ਮੰਗਾਂ ਦਾ ਹੱਲ ਹੋਣ ਨਹੀਂ ਤਾਂ ਕਰਾਂਗੇ ਆਰ-ਪਾਰ ਦੀ ਲੜਾਈ : ਯੂਨੀਅਨ

ਐੱਸ.ਏ.ਐੱਸ.ਨਗਰ, 29 ਜੂਨ (ਸੂਰਜ ਭਾਨ ਗੋਇਲ): ਪਿਛਲੇ 14 ਦਿਨਾਂ ਤੋਂ ਸਥਾਨਕ ਫ਼ੇਜ਼ 8 ਸਿਖਿਆ ਸਕੱਤਰ ਦੇ ਦਫ਼ਤਰ ਦੇ ਬਾਹਰ ਧਰਨਾ ਦੇ ਰਹੇ ਕੱਚੇ ਅਧਿਆਪਕ ਯੂਨੀਅਨ ਤੇ ਹੋਰ ਅਧਿਆਪਕ ਯੂਨੀਅਨਾਂ ਦਾ ਅਪਣੀਆਂ ਮੰਗਾਂ ਨੂੰ  ਲੈ ਕੇ ਸੜਕਾਂ 'ਤੇ ਨਾਹਰੇਬਾਜ਼ੀ ਕਰਦਿਆਂ ਮੁੱਖ ਮੰਤਰੀ ਦੀ ਕੋਠੀ ਵਲ ਮਾਰਚ ਕੀਤਾ ਗਿਆ ਜਿਸ ਦੌਰਾਨ ਅਧਿਆਪਕਾਂ ਨੇ ਅਪਣੇ ਪ੍ਰਵਾਰਾਂ ਸਮੇਤ ਸ਼ਮੂਲੀਅਤ ਕੀਤੀ |
ਮੋਹਾਲੀ ਪੁਲਿਸ ਨੇ ਵਾਈਪੀਐਸ ਚੌਕ ਨੇੜੇ ਬੈਰੀਕੇਡ ਲਗਾ ਕੇ ਕੱਚੇ ਅਧਿਆਪਕਾਂ ਨੂੰ  ਰੋਕਣ ਦਾ ਯਤਨ ਕੀਤਾ ਪਰ ਉਹ ਪੁਲਿਸ ਰੋਕਾਂ ਤੋੜਦੇ ਹੋਏ ਚੰਡੀਗੜ੍ਹ ਵਲ ਅੱਗੇ ਵਧਦੇ ਗਏ ਅਤੇ ਪ੍ਰਦਰਸ਼ਨਕਾਰੀਆਂ ਨੇ ਬੈਰੀਕੇਡ ਤੋੜ ਦਿਤੇ | ਹਾਲਾਂਕਿ ਯੂਟੀ ਪੁਲਿਸ ਨੇ ਜਲ ਤੋਪਾਂ ਦੀ ਵਰਤੋਂ ਕਰ ਕੇ ਅਧਿਆਪਕਾਂ ਨੂੰ  ਖਦੇੜਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਅਧਿਆਪਕਾਂ ਨੇ ਪੁਲਿਸ ਵਾਹਨ ਉੱਤੇ ਚੜ੍ਹ ਕੇ ਜਲ ਤੋਪਾਂ ਦਾ ਮੂੰਹ ਦੂਜੇ ਪਾਸੇ ਮੋੜ ਦਿਤਾ ਅਤੇ ਨਾਹਰੇਬਾਜ਼ੀ ਕਰਦੇ ਹੋਏ ਅੱਗੇ ਵਧ ਗਏ | ਇਸ ਦੌਰਾਨ ਪ੍ਰਦਰਸ਼ਨਕਾਰੀਆਂ ਨੂੰ  ਰੋਕਣ ਵਾਸਤੇ ਪਾਣੀ ਦੀ ਤੇਜ਼ ਵਾਛੜ ਨਾਲ ਰਾਹ ਰੋਕਣ ਦੀ ਕੋਸ਼ਿਸ਼ ਕੀਤੀ ਜਿਸ ਦੌਰਾਨ ਕਈ ਅਧਿਆਪਕਾਂ ਦੀਆਂ ਪੱਗਾਂ ਉਤਰ ਗਈਆਂ ਅਤੇ ਪਾਣੀ ਦੀ ਤੇਜ਼ਧਾਰ ਨੂੰ  ਬਰਦਾਸਤ ਨਾ ਕਰ ਸਕਣ ਕਾਰਨ ਕੁੱਝ ਅਧਿਆਪਕਾਵਾਂ ਬੇਹੋਸ਼ ਹੋ ਗਈਆਂ | ਇਸ ਮੌਕੇ ਜੁਝਾਰ ਸਿੰਘ, ਗਗਨਦੀਪ ਕੌਰ, ਦਵਿੰਦਰ ਸਿੰਘ ਸੰਧੂ, ਹਰਪ੍ਰੀਤ ਕੌਰ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਮੀਟਿੰਗ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਓਐੱਸਡੀ ਸੰਦੀਪ ਸੰਧੂ ਨਾਲ ਹੋਈ ਜਿਥੇ ਕਿ ਉਨ੍ਹਾਂ ਨੇ ਕੈਪਟਨ ਸਾਹਿਬ ਨਾਲ ਫ਼ੋਨ 'ਤੇ ਗੱਲਬਾਤ ਕਰ ਕੇ ਅਧਿਆਪਕਾਂ ਦਾ ਹੱਲ ਕੱਢਣ ਬਾਰੇ ਗੱਲਬਾਤ ਕੀਤੀ ਜਿਸ 'ਤੇ ਉਨ੍ਹਾਂ ਕਿਹਾ ਕਿ ਇਹ ਇਨ੍ਹਾਂ ਦੀ ਆਖ਼ਰੀ ਮੀਟਿੰਗ ਵੀਰਵਾਰ ਜਾਂ ਸ਼ੁਕਰਵਾਰ ਨੂੰ  ਹੋਵੇਗੀ ਜਿਸ ਵਿਚ ਅਧਿਆਪਕਾਂ ਦੀਆਂ ਮੰਗਾਂ ਦਾ ਹੱਲ ਕਢਿਆ ਜਾਵੇਗਾ | ਅਧਿਆਪਕਾਂ ਨੇ ਕਿਹਾ ਕਿ ਜਦਕਿ ਸਾਡੀਆਂ ਮੰਗਾਂ ਨਹੀਂ ਮੰਨੀਆਂ ਜਾਂਦੀਆਂ ਉਦੋਂ ਤਕ ਧਰਨਾ ਜਾਰੀ ਰਹੇਗਾ ਅਤੇ ਅਗਲੇ ਮੰਗਲਵਾਰ ਨੂੰ  ਆਰ-ਪਾਰ ਦੀ ਲੜਾਈ ਲੜੀ ਜਾਵੇਗੀ | ਇਸੇ ਦੌਰਾਨ ਸਤਿੰਦਰ ਸਿੰਘ ਕੰਗ ਤਰਨਤਾਰਨ, ਕੁਲਬੀਰ ਸਿੰਘ ਅਬੋਹਰ, ਕੁਲਵਿੰਦਰ ਸਿੰਘ ਨਾੜੂ, ਬੇਅੰਤ ਸਿੰਘ ਪਟਿਆਲਾ, ਸਮਰ ਸਿੰਘ ਮਾਨਸਾ ਅਤੇ ਰੋਹਿਤ ਕੁਮਾਰ ਅੰਮਿ੍ਤਸਰ ਸਿਖਿਆ ਭਵਨ ਦੀ ਛੱਤ 'ਤੇ ਧਰਨਾ ਦੇ ਰਹੇ ਸੀ |
29ਸੳਸ-ਸੁਰੳਜ01 - ਜਲ ਤੋਪਾਂ ਦਾ ਮੂੰਹ ਮੋੜਦੇ ਹੋਏ ਆਧਿਆਪਕ |
29ਸੳਸ-ਸੁਰੳਜ02- ਅਧਿਆਪਕ ਹੋਏ ਬੇਹੋਸ਼ | (ਭੁਪਿੰਦਰ ਬੱਬਰ)
29ਸੳਸ-ਸੁਰੳਜ03 - ਪਾਣੀ ਦੀਆਂ ਵਾਛੜਾਂ ਕਾਰਨ ਕਈ ਅਧਿਆਪਕਾਂ ਦੀਆਂ ਉਤਰੀਆਂ ਹੋਈਆਂ ਪੱਗਾਂ | (ਭੁਪਿੰਦਰ ਬੱਬਰ)