Punjab News
ਇੱਕ ਜਨਵਰੀ ਤੋਂ ਨਸ਼ੀਲੇ ਪਦਾਰਥਾਂ ਦੀ ਵਿਕਰੀ ਅਤੇ ਸੇਵਨ 'ਤੇ ਲਗਾਈ ਰੋਕ
ਉਲੰਘਣਾ ਕਰਨ ਵਾਲੇ ਨੂੰ ਹੋਵੇਗਾ 5 ਹਜ਼ਾਰ ਜੁਰਮਾਨਾ ਅਤੇ 7 ਦਿਨ ਬੰਦ ਹੋਵੇਗੀ ਦੁਕਾਨ
ਸੰਗਰੂਰ : ਸਥਾਨਕ ਪਿੰਡ ਝਾੜੋਂ ਦੀ ਪੰਚਾਇਤ ਵਲੋਂ ਵੱਡੀ ਪਹਿਲਕਦਮੀ ਕੀਤੀ ਗਈ ਹੈ। ਪੰਚਾਇਤ ਵੱਲੋਂ ਮਤਾ ਪਾਸ ਕੀਤਾ ਗਿਆ ਹੈ ਕਿ ਇੱਕ ਜਨਵਰੀ ਤੋਂ ਕਿਸੇ ਵੀ ਦੁਕਾਨ 'ਤੇ ਜਰਦਾ, ਬੀੜੀਆਂ, ਤੰਬਾਕੂ, ਸਿਗਰਟ ਆਦਿ ਨਸ਼ੀਲੇ ਪਦਾਰਥ ਨਹੀਂ ਵੇਚੇ ਜਾਣਗੇ।
ਇਹ ਫ਼ੈਸਲਾ ਪਿੰਡ ਦੇ ਨੌਜਵਾਨ ਸਪੋਰਟਸ ਐਂਡ ਵੈਲਫੇਅਰ ਕਲੱਬ ਅਤੇ ਪਿੰਡ ਝਾੜੋਂ ਦੀ ਪੰਚਾਇਤ ਵੱਲੋਂ ਲਿਆ ਗਿਆ ਹੈ। ਇਸ ਦੇ ਨਾਲ ਹੀ ਕਿਹਾ ਗਿਆ ਹੈ ਕਿ ਉਲੰਘਣਾ ਕਰਨ ਵਾਲੇ ਦੁਕਾਨਦਾਰ ਨੂੰ 5 ਹਜ਼ਾਰ ਰੁਪਏ ਜੁਰਮਾਨਾ ਲਗਾਇਆ ਜਾਵੇਗਾ ਅਤੇ 7 ਦਿਨ ਲਈ ਦੁਕਾਨ ਵੀ ਬੰਦ ਕੀਤੀ ਜਾਵੇਗੀ।
ਪਿੰਡ ਵੱਲੋਂ ਪਾਸ ਕੀਤੇ ਮਤੇ ਵਿਚ ਲਿਖਿਆ ਗਿਆ ਹੈ ਕਿ ਸਾਂਝੀਆਂ ਜਗ੍ਹਾ ਜਿਵੇਂ ਪਿੰਡ ਦੀ ਸੱਥ, ਬੱਸ ਅੱਡਾ ਅਤੇ ਸਕੂਲ ਆਦਿ ਵਿਖੇ ਵੀ ਨਸ਼ੀਲੇ ਪਦਾਰਥਾਂ ਦਾ ਸੇਵਨ ਕਰਨ 'ਤੇ ਪਾਬੰਦੀ ਹੈ। ਹੁਕਮ ਅਦੂਲੀ ਕਰਨ ਵਾਲਿਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ।
