ਖਾਤਿਆਂ 'ਚ ਭੇਜੇ 3000 ਕਰੋੜ ਰੁਪਏ ਦੀ 42 ਲੱਖ ਅਯੋਗ ਕਿਸਾਨਾਂ ਤੋਂ ਵਸੂਲੀ ਕਰੇਗੀ ਕੇਂਦਰ ਸਰਕਾਰ : ਨਰਿੰਦਰ ਤੋਮਰ

ਨਵੀਂ ਦਿੱਲੀ, 20 ਜੁਲਾਈ : ਪ੍ਰਧਾਨ ਮੰਤਰੀ-ਕਿਸਾਨ ਯੋਜਨਾ ਤਹਿਤ ਕੇਂਦਰ ਸਰਕਾਰ ਦੁਆਰਾ ਦੇਸ ਭਰ ਦੇ ਕਿਸਾਨਾਂ ਨੂੰ  6000 ਰੁਪਏ ਦੀ ਵਿੱਤੀ ਸਹਾਇਤਾ ਦਿੱਤੀ ਜਾਂਦੀ ਹੈ, ਪਰ ਬਹੁਤ ਸਾਰੇ ਅਯੋਗ ਕਿਸਾਨ ਇਸ ਯੋਜਨਾ ਦਾ ਲਾਭ ਲੈ ਰਹੇ ਹਨ | ਇਸ ਦੇ ਮੱਦੇਨਜ਼ਰ ਸਰਕਾਰ ਨੇ ਸਖ਼ਤ ਕਾਰਵਾਈ ਕੀਤੀ ਹੈ | ਪ੍ਰਧਾਨ ਮੰਤਰੀ-ਕਿਸਾਨ ਯੋਜਨਾ ਤਹਿਤ 42 ਲੱਖ ਤੋਂ ਵੱਧ ਅਯੋਗ ਕਿਸਾਨਾਂ ਤੋਂ 3000 ਕਰੋੜ ਦੀ ਵਸੂਲੀ ਕੀਤੀ ਜਾ ਰਹੀ ਹੈ | ਸਰਕਾਰ ਨੇ ਸੰਸਦ ਵਿਚ ਇਸ ਬਾਰੇ ਜਾਣਕਾਰੀ ਦਿਤੀ ਹੈ |
ਪ੍ਰਧਾਨ ਮੰਤਰੀ-ਯੋਜਨਾ ਤਹਿਤ ਕੇਂਦਰ ਹਰ ਸਾਲ ਤਿੰਨ ਬਰਾਬਰ ਕਿਸ਼ਤਾਂ ਵਿਚ ਦੇਸ਼ ਭਰ ਦੇ ਕਿਸਾਨਾਂ ਨੂੰ  6,000 ਰੁਪਏ ਭੇਜਦੀ ਹੈ ਹਾਲਾਂਕਿ, ਇਸ ਯੋਜਨਾ ਦਾ ਲਾਭ ਲੈਣ ਵਾਲਿਆਂ ਲਈ, ਕੁਝ ਮਾਪਦੰਡ ਪੂਰੇ ਕਰਨੇ ਜਰੂਰੀ ਹਨ ਜਿਵੇਂ ਕਿ ਉਸਨੂੰ ਆਮਦਨੀ ਟੈਕਸ ਦਾ ਭੁਗਤਾਨ ਕਰਨ ਵਾਲਾ ਨਹੀਂ ਹੋਣਾ ਚਾਹੀਦਾ |
ਮੰਗਲਵਾਰ ਨੂੰ  ਸੰਸਦ ਵਿਚ ਦਿਤੇ ਜਵਾਬ ਵਿਚ ਖੇਤੀਬਾੜੀ ਮੰਤਰੀ ਨਰਿੰਦਰ ਸਿੰਘ ਤੋਮਰ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ-ਯੋਜਨਾ ਸਕੀਮ ਤਹਿਤ ਪੈਸੇ ਪ੍ਰਾਪਤ ਕਰਨ ਵਾਲੇ 42.16 ਲੱਖ ਅਯੋਗ ਕਿਸਾਨਾਂ ਤੋਂ 2,992 ਕਰੋੜ ਰੁਪਏ ਦੀ ਵਸੂਲੀ ਕੀਤੀ ਜਾ ਰਹੀ ਹੈ | ਸੱਭ ਤੋਂ ਵੱਧ ਅਜਿਹੇ ਅਯੋਗ ਕਿਸਾਨ ਜਿਨ੍ਹਾਂ ਨੂੰ  ਪ੍ਰਧਾਨ ਮੰਤਰੀ-ਕਿਸਾਨੀ ਪੈਸਾ ਮਿਲਿਆ, ਉਹ ਆਸਾਮ ਵਿਚ ਸਨ | ਅਸਾਮ ਵਿਚ 8.35 ਲੱਖ ਅਯੋਗ ਕਿਸਾਨਾਂ ਨੇ ਇਸ ਦਾ ਲਾਭ ਲਿਆ ਹੈ | ਉਸ ਤੋਂ ਬਾਅਦ 7.22 ਲੱਖ ਕਿਸਾਨਾਂ ਨੇ ਤਾਮਿਲਨਾਡੂ, ਪੰਜਾਬ ਵਿਚ 5.62 ਲੱਖ, ਮਹਾਰਾਸਟਰ ਵਿਚ 4.45 ਲੱਖ, ਉੱਤਰ ਪ੍ਰਦੇਸ ਵਿਚ 2.65 ਲੱਖ ਅਤੇ ਗੁਜਰਾਤ ਵਿਚ 2.36 ਲੱਖ ਕਿਸਾਨਾਂ ਨੇ ਲਾਭ ਲਿਆ ਹੈ |               (ਪੀ.ਟੀ.ਆਈ)