ਨਵਾਂਗਰਾਉਂ 'ਚ ਕੋਰੋਨਾ ਦਾ ਦੂਜਾ ਮਾਮਲਾ, 27 ਪਰਵਾਰ ਕੀਤੇ ਆਈਸੋਲੇਟ
ਮੁੱਲਾਂਪੁਰ ਗ਼ਰੀਬਦਾਸ, 18 ਅਪ੍ਰੈਲ (ਰਵਿੰਦਰ ਸਿੰਘ ਸੈਣੀ): ਨਵਾਂਗਰਾਉਂ ਵਿਖੇ ਕੋਰੋਨਾ ਵਾਇਰਸ ਦਾ ਦੂਜਾ ਮਾਮਲਾ ਸਾਹਮਣੇ ਆਉਣ ਕਾਰਨ ਲੋਕਾਂ ਵਿਚ ਸਹਿਮ ਦਾ ਮਾਹੌਲ ਹੈ। ਕੋਰੋਨਾ ਦਾ ਦੂਜਾ ਮਰੀਜ਼ ਸੁਨੀਲ ਆਦਰਸ਼ ਨਗਰ ਦਾ ਰਹਿਣ ਵਾਲਾ ਹੈ। ਪ੍ਰਸ਼ਾਸਨ ਵਲੋਂ ਆਦਰਸ਼ ਨਗਰ ਪੂਰੀ ਤਰ੍ਹਾਂ ਸੀਲ ਕਰ ਦਿਤਾ ਗਿਆ ਹੈ। ਇਸ ਮੌਕੇ ਸਿਹਤ ਵਿਭਾਗ ਦੇ ਐਸਐਮਓ ਕੁਲਜੀਤ ਕੌਰ ਤੇ ਦਿਲਬਾਗ ਸਿੰਘ ਤੇ ਡਾਕਟਰ ਹਰਮਨ ਦੀ ਅਗਵਾਈ ਵਿਚ ਟੀਮ ਆਦਰਸ਼ ਨਗਰ ਪਹੁੰਚੀ ਜਿਥੇ ਸੁਨੀਲ ਦੇ ਸੰਪਰਕ ਵਿਚ ਆਏ ਲੋਕਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਸਿਹਤ ਵਿਭਾਗ ਦੀ ਟੀਮ ਆਦਰਸ਼ ਨਗਰ ਵਿਖੇ ਮਿਲੇ ਕੋਰੋਨਾ ਮਰੀਜ਼ ਦੇ ਘਰ ਤੋਂ ਬਾਹਰ ਜਾਂਚ ਪੜਤਾਲ ਕਰਦੀ ਹੋਈ।
ਸਿਹਤ ਵਿਭਾਗ ਦੀ ਟੀਮ ਵਲੋਂ ਸੁਨੀਲ ਦੇ ਚਾਰ ਪਰਵਾਰਕ ਮੈਂਬਰਾਂ ਦੇ ਕੋਰੋਨਾ ਟੈਸਟ ਲੈ ਕੇ ਸੈਂਪਲ ਚੰਡੀਗੜ੍ਹ ਪੀਜੀਆਈ ਭੇਜੇ ਗਏ ਹਨ। ਐਸਐਮਓ ਦਿਲਬਾਗ ਸਿੰਘ ਨੇ ਆਖਿਆ ਕਿ ਕੋਰੋਨਾ ਮਰੀਜ਼ ਦੀ ਮਾਤਾ, ਪਤਨੀ, ਸਾਲਾ ਤੇ ਇਕ ਮਹੀਨੇ ਦੀ ਬੱਚੀ ਦੀ ਰੀਪੋਰਟ ਆਉਣ ਤੋਂ ਬਾਅਦ ਹੀ ਉਨ੍ਹਾਂ ਦੀ ਪੁਸ਼ਟੀ ਕੀਤੀ ਜਾਵੇਗੀ। ਸੁਨੀਲ ਜੋ ਤਿੰਨ ਮੰਜ਼ਲਾਂ ਇਮਾਰਤ ਵਿਚ ਰਹਿੰਦਾ ਹੈ, ਸਿਹਤ ਵਿਭਾਗ ਵਲੋਂ 27 ਪਰਵਾਰਾਂ ਨੂੰ ਆਈਸੋਲੇਸ਼ਨ ਵਿਚ ਰਖਿਆ ਗਿਆ ਹੈ।
