9 ਹਜ਼ਾਰ ਰੁਪਏ ਤੋਂ ਡਿੱਗ ਕੇ 50 ਪੈਸੇ ਰਹਿ ਗਈ ਕ੍ਰਿਪਟੋ ਕਰੰਸੀ ਦੀ ਕੀਮਤ
ਨਵੀਂ ਦਿੱਲੀ, 14 ਮਈ : ਕ੍ਰਿਪਟੋਕਰੰਸੀ ਬਾਜ਼ਾਰ ’ਚ ਨਿਯਮਾਂ ਦੇ ਸਖਤ ਹੋਣ ਕਾਰਨ ਪਾਬੰਦੀਆਂ ਸਖ਼ਤ ਹੋਣ ਦੇ ਡਰ ’ਚ ਇਕ ਹਫ਼ਤੇ ਤੋਂ ਜ਼ਿਆਦਾ ਸਮੇਂ ਤੋਂ ਜ਼ਬਰਦਸਤ ਬਿਕਵਾਲੀ ਦੇਖਣ ਨੂੰ ਮਿਲ ਰਹੀ ਹੈ। ਸੱਭ ਤੋਂ ਵੱਡੀ ਗਿਰਾਵਟ ਟੇਰਾ ਲੂਨਾ ਵਿਚ ਆਈ ਹੈ।
ਪਿਛਲੇ ਇਕ ਹਫ਼ਤੇ ’ਚ ਇਸ ਦੀ ਕੀਮਤ ਕਰੀਬ ਨੌਂ ਹਜ਼ਾਰ ਰੁਪਏ (118 ਡਾਲਰ) ਤੋਂ ਘਟ ਕੇ 50 ਪੈਸੇ ’ਤੇ ਆ ਗਈ ਹੈ। ਸਿਰਫ਼ 24 ਘੰਟਿਆਂ ’ਚ ਹੀ ਕ੍ਰਿਪਟੋਕਰੰਸੀ 99.66 ਫ਼ੀ ਸਦੀ ਡਿੱਗ ਗਈ ਹੈ। ਇਸ ਕਾਰਨ ਨਿਵੇਸ਼ਕਾਂ ਨੂੰ ਇਕ ਝਟਕੇ ਵਿਚ 40 ਅਰਬ ਡਾਲਰ ਦਾ ਨੁਕਸਾਨ ਹੋਇਆ ਹੈ। ਇਸ ਨੂੰ ਕ੍ਰਿਪਟੋਕਰੰਸੀ ਵਿਚ ਨਿਵੇਸ਼ ਦੇ ਖ਼ਤਰਿਆਂ ਦੀ ਇਕ ਵੱਡੀ ਉਦਾਹਰਣ ਮੰਨਿਆ ਜਾ ਰਿਹਾ ਹੈ। ਇਸ ਗਿਰਾਵਟ ਦੇ ਮੱਦੇਨਜ਼ਰ, ਭਾਰਤੀ ਕ੍ਰਿਪਟੋ ਐਕਸਚੇਂਜਾਂ ਨੇ ਲੂਨਾ ਨੂੰ ਅਪਣੇ ਪਲੇਟਫ਼ਾਰਮ ਤੋਂ ਹਟਾ ਦਿਤਾ ਹੈ। ਜਦੋਂ ਕ੍ਰਿਪਟੋਕਰੰਸੀ ਦੀ ਕੀਮਤ ਬਹੁਤ ਘੱਟ ਜਾਂਦੀ ਹੈ, ਕ੍ਰਿਪਟੋ ਐਕਸਚੇਂਜ ਇਸ ਨੂੰ ਅਪਣੇ ਪਲੇਟਫ਼ਾਰਮ ਤੋਂ ਹਟਾ ਦਿੰਦੇ ਹਨ। ਅਜਿਹਾ ਇਸ ਲਈ ਕੀਤਾ ਜਾਂਦਾ ਹੈ ਤਾਂ ਜੋ ਨਵੇਂ ਨਿਵੇਸ਼ਕ ਉਸ ਕ੍ਰਿਪਟੋ ਨੂੰ ਖ਼ਰੀਦ ਨਾ ਸਕਣ। ਕਿਉਂਕਿ ਲੂਨਾ ਦੀ ਕੀਮਤ ਵਿਚ ਭਾਰੀ ਗਿਰਾਵਟ ਆਈ ਹੈ, ਨਵੇਂ ਨਿਵੇਸ਼ਕ ਇਸ ਉਮੀਦ ਵਿਚ ਇਸ ਨੂੰ ਖ਼ਰੀਦ ਸਕਦੇ ਹਨ ਕਿ ਇਸ ਦਾ ਮੁੱਲ ਦੁਬਾਰਾ ਵੱਧ ਸਕਦਾ ਹੈ। (ਏਜੰਸੀ)
