ਸੁਖੋਈ ਲੜਾਕੂ ਜਹਾਜ਼ ਨਾਲ ਐਂਟੀ ਰੇਡੀਏਸ਼ਨ ਮਿਜ਼ਾਈਲ 'ਰੂਦਰਮ-1' ਦਾ ਸਫ਼ਲ ਪਰੀਖਣ

ਨਵੀਂ ਦਿੱਲੀ, 9 ਅਕਤੂਬਰ : ਰਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀਆਰਡੀਓ) ਨੇ ਇਕ ਵਾਰ ਫਿਰ ਦੇਸ਼ ਵਿਚ ਇਤਿਹਾਸ ਰਚ ਦਿਤਾ ਹੈ। ਡੀਆਰਡੀਓ ਨੇ ਸ਼ੁਕਰਵਾਰ ਨੂੰ ਪੂਰਬੀ ਤੱਟ ਤੋਂ ਸੁਖੋਈ-30 ਲੜਾਕੂ ਜਹਾਜ਼ ਨਾਲ ਐਂਟੀ ਰੇਡੀਏਸ਼ਨ ਮਿਜ਼ਾਈਲ 'ਰੂਦਰਮ-1' ਦਾ ਸਫ਼ਲ ਪਰੀਖਣ ਕੀਤਾ। ਇਸ ਮਿਜ਼ਾਈਲ ਨੂੰ ਰਖਿਆ ਖੋਜ ਅਤੇ ਵਿਕਾਸ ਸੰਗਠਨ ਨੇ ਵਿਕਸਿਤ ਕੀਤਾ ਹੈ।
ਡੀਆਰਡੀਓ ਨੇ ਕਿਹਾ, 'ਰੂਦਰਮ-1 ਭਾਰਤੀ ਹਵਾਈ ਫ਼ੌਜ ਲਈ ਬਣਾਈ ਗਈ ਦੇਸ਼ ਦੀ ਪਹਿਲੀ ਸਵਦੇਸ਼ੀ ਐਂਟੀ ਰੇਡੀਏਸ਼ਨ ਮਿਜ਼ਾਈਲ ਹੈ, ਜਿਸ ਨੂੰ ਡੀਆਰਡੀਓ ਵਲੋਂ ਵਿਕਸਿਤ ਕੀਤਾ ਗਿਆ ਹੈ। ਇਸ ਮਿਜ਼ਾਈਲ ਨੂੰ ਲਾਂਚ ਪਲੇਟਫ਼ਾਰਮ ਦੇ ਰੂਪ ਵਿਚ ਸੁਖੋਈ ਐਸਯੂ-30 ਐਮਕੇਆਈ ਲੜਾਕੂ ਜਹਾਜ਼ ਵਿਚ ਤਿਆਰ ਕੀਤਾ ਗਿਆ ਹੈ, ਇਸ ਵਿਚ ਲਾਂਚ ਸਥਿਤੀਆਂ ਦੇ ਅਧਾਰ 'ਤੇ ਵੱਖ-ਵੱਖ ਰੇਂਜ ਦੀ ਸਮਰੱਥਾ ਹੈ'।


ਡੀਆਰਡੀਓ ਨੇ ਅੱਗੇ ਕਿਹਾ, 'ਇਸ ਵਿਚ ਅੰਤਿਮ ਹਮਲੇ ਲਈ ਪੈਸਿਵ ਹੋਮਿੰਗ ਹੈਡ ਦੇ ਨਾਲ ਆਈਐਨਐਸ-ਜੀਪੀਐਸ ਨੇਵੀਗੇਸ਼ਨ ਹੈ। ਪੈਸਿਵ ਹੋਮਿੰਗ ਹੈਡ ਇਕ ਵਿਸਥਾਰ ਬੈਂਡ 'ਤੇ ਟੀਚੇ ਦਾ ਪਤਾ ਲਗਾਉਣ, ਟੀਚੇ ਦਾ ਵਰਗੀਕਰਣ ਕਰਨ ਅਤੇ ਉਸ ਨੂੰ ਉਲਝਾਉਣ ਦੇ ਕਾਬਲ ਹੈ'। ਇਹ ਮਿਜ਼ਾਈਲ ਭਾਰਤ ਵਿਚ ਤਿਆਰ ਕੀਤੀ ਗਈ ਪਹਿਲੀ ਮਿਸਾਈਲ ਹੈ, ਜਿਸ ਨੂੰ ਕਿਸੇ ਵੀ ਉਚਾਈ ਤੋਂ ਦਾਗਿਆ ਜਾ ਸਕਦਾ ਹੈ। ਮਿਜ਼ਾਈਲ ਕਿਸੇ ਵੀ ਤਰ੍ਹਾਂ ਦੇ ਸਿਗਨਲ ਅਤੇ ਰੇਡੀਏਸ਼ਨ ਨੂੰ ਕਾਬੂ ਕਰਨ ਦੇ ਕਾਬਲ ਹੈ। ਫਿਲਹਾਲ ਮਿਜ਼ਾਇਲ ਵਿਕਾਸ ਟ੍ਰਾਇਲ ਵਿਚ ਜਾਰੀ ਹੈ। ਟ੍ਰਾਇਲ ਪੂਰਾ ਹੋਣ ਤੋਂ ਬਾਅਦ ਜਲਦ ਹੀ ਇਹਨਾਂ ਨੂੰ ਸੁਖੋਈ ਅਤੇ ਸਵਦੇਸ਼ੀ ਜਹਾਜ਼ ਤੇਜਸ ਵਿਚ ਵਰਤਿਆ ਜਾ ਸਕੇਗਾ। ਜ਼ਿਕਰਯੋਗ ਹੈ ਕਿ ਸੋਮਵਾਰ ਨੂੰ ਡੀਆਰਡੀਓ ਨੇ ਸੂਪਰਸੋਨਿਕ ਮਿਜ਼ਾਇਲ ਅਸਿਸਟਡ ਰਿਲੀਜ਼ ਆਫ਼ ਟਾਰਪੀਡੋ (ਸਮਾਰਟ) ਦਾ ਸਫ਼ਲ ਪਰੀਖਣ ਕੀਤਾ ਸੀ।
(ਪੀਟੀਆਈ)