ਬੋਰ ਲਗਾਉਣ ਵਾਲੀਆਂ ਲੋਹੇ ਦੀਆਂ ਭਾਰੀ ਪਾਈਪਾਂ ਨਾਲ ਭਰੀ ਹੋਈ ਸੀ ਟਰਾਲੀ
ਸੰਗਰੂਰ : ਬੀਤੀ ਰਾਤ ਭਵਾਨੀਗੜ੍ਹ ਤੋਂ ਸੰਗਰੂਰ ਰੋਡ ਤੇ ਫੱਗੂਵਾਲਾ ਕੈਂਚੀਆਂ 'ਚ ਟਰੈਕਟਰ-ਟਰਾਲੀ ਵਿਚਕਾਰ ਹੋਈ ਟੱਕਰ ਵਿਚ ਇਕ ਵਿਅਕਤੀ ਦੀ ਮੌਤ ਅਤੇ ਤਿੰਨ ਵਿਅਕਤੀ ਜ਼ਖ਼ਮੀ ਹੋ ਗਏ। ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਇਕ ਟਰੈਕਟਰ-ਟਰਾਲੀ, ਜੋ ਕਿ ਬੋਰ ਲਗਾਉਣ ਵਾਲੀਆਂ ਲੋਹੇ ਦੀਆਂ ਭਾਰੀ ਪਾਈਪਾਂ ਨਾਲ ਭਰੀ ਹੋਈ ਸੀ, ਭਵਾਨੀਗੜ੍ਹ ਤੋਂ ਸੰਗਰੂਰ ਵੱਲ ਜਾ ਰਿਹਾ ਸੀ।
Accident
ਇਸ ਦੌਰਾਨ ਜਦੋਂ ਟਰੈਕਟਰ ਟਰਾਲੀ ਸਮੇਤ ਪਿੰਡ ਫੱਗੂਵਾਲਾ ਕੈਂਚੀਆਂ ਦਾ ਪੁੱਲ ਉਤਰ ਰਿਹਾ ਸੀ ਤਾਂ ਪਿਛੋਂ ਆਇਆ ਇਕ ਟਰੱਕ ਟਰਾਲੀ ਵਿਚ ਜਾ ਵੱਜਿਆ। ਇਸ ਦੌਰਾਨ ਟਰਾਲੀ ਵਿਚ ਲੱਦੀਆਂ ਪਾਈਪਾਂ ਟਰੈਕਟਰ ਤੇ ਬੈਠੇ ਵਿਅਕਤੀਆਂ ਦੇ ਜਾ ਵੱਜੀਆਂ। ਟਰੈਕਟਰ ਚਾਲਕ ਰਿਹਾ ਸਿੰਗਾਰਾ ਸਿੰਘ ਪੁੱਤਰ ਜੋਗਿੰਦਰ ਸਿੰਘ ਦੇ ਜੋਰਦਾਰ ਪਾਈਪਾਂ ਲੱਗੀਆਂ ਜਿਸ ਦੌਰਾਨ ਉਸ ਨੂੰ ਹਸਪਤਾਲ ਪਹੁੰਚਾਉਂਦੇ ਸਮੇਂ ਮੌਤ ਹੋ ਗਈ, ਜਦੋਂ ਕਿ ਇਸ ਹਾਦਸੇ ਵਿੱਚ ਟਰੈਕਟਰ 'ਤੇ ਬੈਠੇ ਦੋ ਹੋਰ ਵਿਅਕਤੀ ਮਨਪ੍ਰੀਤ ਸਿੰਘ ਪੁੱਤਰ ਜਰਨੈਲ ਸਿੰਘ ਅਤੇ ਸੀਤਾ ਸਿੰਘ ਪੁੱਤਰ ਹਰੀ ਸਿੰਘ ਸਾਰੇ ਪਿੰਡ ਰੂਪਾਹੇੜੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ।
Road Accident
ਜ਼ਖ਼ਮੀਆਂ ਨੂੰ ਸਥਾਨਕ ਹਸਪਤਾਲ 'ਚ ਦਾਖ਼ਲ ਕਰਾਇਆ ਗਿਆ, ਜਿਥੋਂ ਡਾਕਟਰਾਂ ਨੇ ਉਨ੍ਹਾਂ ਦੀ ਹਾਲਤ ਗੰਭੀਰ ਹੋਣ ਕਾਰਨ ਉਨ੍ਹਾਂ ਨੂੰ ਪਟਿਆਲਾ ਰੈਫ਼ਰ ਕਰ ਦਿੱਤਾ। ਇਸ ਹਾਦਸੇ ਵਿਚ ਟਰੱਕ ਚਾਲਕ ਨਛੱਤਰ ਖਾਨ ਪੁੱਤਰ ਛੋਟਾ ਖ਼ਾਨ ਪਿੰਡ ਹਰਕਿਸ਼ਨਪੁਰਾ ਵੀ ਜ਼ਖ਼ਮੀ ਹੋ ਗਿਆ ਜਿਸ ਨੂੰ ਸਥਾਨਕ ਹਸਪਤਾਲ ਵਿੱਚ ਦਾਖ਼ਿਲ ਕਰਵਾਇਆ ਹੈ।
