ਬਿਹਾਰ ਦੇ ਮੁਜ਼ੱਫਰਪੁਰ ਦਾ ਇਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ, ਇਸ ਵੀਡੀਓ ਨੂੰ ਦੇਖ ਕੇ ਹਰ ਕੋਈ ਭਾਵੁਕ ਹੋ ਰਿਹਾ ਹੈ।
ਪਟਨਾ: ਬਿਹਾਰ ਦੇ ਮੁਜ਼ੱਫਰਪੁਰ ਦਾ ਇਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ, ਇਸ ਵੀਡੀਓ ਨੂੰ ਦੇਖ ਕੇ ਹਰ ਕੋਈ ਭਾਵੁਕ ਹੋ ਰਿਹਾ ਹੈ। ਇਸ ਵੀਡੀਓ ਵਿਚ ਇਕ ਬੱਚਾ ਰੇਲਵੇ ਸਟੇਸ਼ਨ 'ਤੇ ਅਪਣੀ ਮਾਂ ਦੀ ਲਾਸ਼ ਨਾਲ ਖੇਡ ਰਿਹਾ ਹੈ, ਉਸ ਨੂੰ ਜਗਾ ਰਿਹਾ ਹੈ ਪਰ ਉਸ ਨੂੰ ਨਹੀਂ ਪਤਾ ਕਿ ਉਸ ਦੀ ਮਾਂ ਇਸ ਦੁਨੀਆ ਵਿਚ ਨਹੀਂ ਰਹੀ।
Photo
ਭਿਆਨਕ ਗਰਮੀ ਵਿਚ ਚਾਰ ਦਿਨ ਤੋਂ ਟਰੇਨ ਵਿਚ ਭੁੱਖੀ ਪਿਆਸੀ ਮਾਂ ਦੀ ਮੌਤ ਹੋ ਗਈ, ਮਾਸੂਮ ਉਸ ਨੂੰ ਜਗਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਵੀਡੀਓ ਵਿਚ ਬੱਚਾ ਅਪਣੀ ਮਾਂ ਦੇ ਸਰੀਰ 'ਤੇ ਰੱਖੇ ਕੱਪੜੇ ਨੂੰ ਚੁੱਕਦਾ ਹੈ ਪਰ ਉਸ ਦੀ ਮਾਂ ਕੋਈ ਹਰਕਤ ਨਹੀਂ ਕਰਦੀ।
Photo
ਇਹ ਵੀ਼ਡੀਓ ਬਿਹਾਰ ਦੇ ਮੁਜ਼ੱਫਰਪੁਰ ਦੇ ਇਕ ਸਟੇਸ਼ਨ ਦੀ ਹੈ, ਜਿਥੇ 23 ਸਾਲਾ ਔਰਤ ਸੋਮਵਾਰ ਨੂੰ ਪ੍ਰਵਾਸੀਆਂ ਲਈ ਚਲਾਈ ਜਾ ਰਹੀ ਇਕ ਵਿਸ਼ੇਸ਼ ਟ੍ਰੇਨ ਵਿਚ ਪਹੁੰਚੀ ਸੀ। ਇਸੇ ਸਟੇਸ਼ਨ 'ਤੇ ਇਕ ਦੋ ਸਾਲ ਦੇ ਬੱਚੇ ਦੀ ਵੀ ਮੌਤ ਹੋ ਗਈ ਸੀ। ਕਥਿਤ ਤੌਰ 'ਤੇ ਉਸ ਦੀ ਮੌਤ ਗਰਮੀ ਅਤੇ ਭੋਜਨ ਦੀ ਕਮੀਂ ਕਾਰਨ ਹੋਈ ਹੈ।
Photo
ਬੱਚੇ ਦਾ ਪਰਿਵਾਰ ਐਤਵਾਰ ਨੂੰ ਦਿੱਲੀ ਤੋਂ ਸਪੈਸ਼ਲ ਟਰੇਨ ਰਾਹੀਂ ਇੱਥੇ ਪਹੁੰਚਿਆ ਸੀ। ਔਰਤ ਦੇ ਪਰਿਵਾਰ ਅਨੁਸਾਰ ਉਸ ਨੇ ਐਤਵਾਰ ਨੂੰ ਗੁਜਰਾਤ ਤੋਂ ਟਰੇਨ ਲਈ ਸੀ ਅਤੇ ਖਾਣ-ਪੀਣ ਦੀ ਕਮੀ ਦੇ ਕਾਰਨ ਟਰੇਨ ਵਿਚ ਉਸ ਦੀ ਸਿਹਤ ਵਿਗੜ ਗਈ। ਸੋਮਵਾਰ ਨੂੰ ਟਰੇਨ ਦੇ ਮੁਜ਼ੱਫਰਪੁਰ ਪਹੁੰਚਣ ਤੋਂ ਪਹਿਲਾਂ ਹੀ ਔਰਤ ਬੇਹੋਸ਼ ਹੋ ਕੇ ਡਿੱਗ ਗਈ।
Photo
ਕਿਸੇ ਨੇ ਉਸ ਦੀ ਮ੍ਰਿਤਕ ਦੇਹ ਨੂੰ ਸਟੇਸ਼ਨ 'ਤੇ ਰੱਖ ਦਿੱਤਾ ਅਤੇ ਇਹ ਵੀਡੀਓ ਉਸੇ ਸਮੇਂ ਦਾ ਹੈ। ਇਸ ਦੌਰਾਨ ਬੱਚਾ ਅਪਣੀ ਮਾਂ ਦੀ ਲਾਸ਼ ਨਾਲ ਖੇਡਦਾ ਰਿਹਾ ਅਤੇ ਉਸ ਨੂੰ ਜਗਾਉਂਦਾ ਰਿਹਾ। ਰੇਲ ਮੰਤਰਾਲੇ ਦਾ ਕਹਿਣਾ ਹੈ ਕਿ ਮਹਿਲਾ ਦੀ ਸਿਹਤ ਵਿਗੜ ਗਈ ਸੀ ਅਤੇ ਟਰੇਨ ਵਿਚ ਹੀ ਉਸ ਦੀ ਮੌਤ ਹੋ ਗਈ।
