ਸੁਪਰੀਮ ਕੋਰਟ ਨੇ ਫ਼ਰੰਟ-ਆਫ਼-ਪੈਕ ਲੇਬਲਿੰਗ ਲਗਾਉਣ ਲਈ ਕਿਹਾ
ਨਵੀਂ ਦਿੱਲੀ: ਸੁਪਰੀਮ ਕੋਰਟ ਨੇ ਹਾਲ ਹੀ ਵਿਚ ਇਕ ਮਹੱਤਵਪੂਰਨ ਹੁਕਮ ਜਾਰੀ ਕੀਤਾ ਹੈ ਜਿਸ ਅਨੁਸਾਰ ਪੈਕ ਕੀਤੇ ਖਾਣੇ ਦੇ ਪੈਕੇਟਾਂ ਦੇ ਸਾਹਮਣੇ (ਫਰੰਟ-ਆਫ-ਪੈਕ) ਲੇਬਲਿੰਗ ਲਾਜ਼ਮੀ ਕੀਤੀ ਜਾ ਸਕਦੀ ਹੈ। ਇਸ ਲੇਬਲਿੰਗ ਨਾਲ ਖਰੀਦਦਾਰਾਂ ਨੂੰ ਪੈਕੇਟ ਦੇ ਅੱਗੇ ਹੀ ਸਪਸ਼ਟ ਤੌਰ ’ਤੇ ਵਿਖਾ ਇਆ ਜਾਵੇਗਾ ਕਿ ਉਸ ਖਾਣੇ ਵਿਚ ਕਿੰਨੀ ਸ਼ੱਕਰ, ਨਮਕ ਅਤੇ ਚਰਬੀ ਮੌਜੂਦ ਹੈ।
ਇਸ ਨਾਲ ਲੋਕ ਤੁਰਤ ਸਮਝ ਸਕਣਗੇ ਕਿ ਖਾਣਾ ਸਿਹਤਮੰਦ ਹੈ ਜਾਂ ਨਹੀਂ। ਡਾ. ਨਰਿੰਦਰ ਕੁਮਾਰ ਸਿੰਗਲਾ, ਪਿ੍ਰੰਸੀਪਲ ਕਨਸਲਟੈਂਟ, ਸ੍ਰੀ ਬਾਲਾਜੀ ਐਕਸ਼ਨ ਮੈਡੀਕਲ ਇੰਸਟੀਚਿਊਟ ਨੇ ਕਿਹਾ, ‘‘ਫਰੰਟ-ਆਫ-ਪੈਕ ਲੇਬਲਿੰਗ ਲੋਕਾਂ ਨੂੰ ਸਿਹਤਮੰਦ ਚੋਣਾਂ ਕਰਨ ਵਿਚ ਮਦਦ ਕਰੇਗੀ ਅਤੇ ਮੋਟਾਪਾ, ਡਾਇਬਟੀਜ਼ ਤੇ ਦਿਲ ਦੀਆਂ ਬਿਮਾਰੀਆਂ ਦੇ ਖਤਰੇ ਨੂੰ ਘਟਾ ਸਕਦੀ ਹੈ।’’
ਇਸ ਫੈਸਲੇ ਦੇ ਪਿੱਛੇ ਵਧ ਰਹੀਆਂ ਲਾਈਫਸਟਾਈਲ ਬਿਮਾਰੀਆਂ ਹਨ, ਜਿਨ੍ਹਾਂ ਦਾ ਮੁੱਖ ਕਾਰਨ ਗ਼ੈਰਸਿਹਤਮੰਦ ਖਾਣ-ਪੀਣ ਹੈ। ਪੈਕ ਕੀਤੇ ਖਾਣੇ ਵਿਚ ਵੱਧ ਸ਼ੱਕਰ, ਨਮਕ ਅਤੇ ਚਰਬੀ ਲੋਕਾਂ ਦੀ ਸਿਹਤ ਲਈ ਗੰਭੀਰ ਖਤਰਾ ਬਣ ਰਹੇ ਹਨ। ਸੁਪਰੀਮ ਕੋਰਟ ਨੇ ਐਫ਼.ਐੱਸ.ਐੱਸ.ਏ.ਆਈ. ਅਤੇ ਕੇਂਦਰ ਸਰਕਾਰ ਨੂੰ ਹੁਕਮ ਦਿਤਾ ਹੈ ਕਿ ਇਸ ਪ੍ਰਣਾਲੀ ਨੂੰ ਗੰਭੀਰਤਾ ਨਾਲ ਲਾਗੂ ਕਰਨ ’ਤੇ ਵਿਚਾਰ ਕੀਤਾ ਜਾਵੇ।
ਜੇ ਇਹ ਲੇਬਲਿੰਗ ਲਾਗੂ ਹੋ ਜਾਂਦੀ ਹੈ ਤਾਂ ਲੋਕ ਇਕ ਨਜ਼ਰ ਵਿਚ ਹੀ ਜਾਣ ਸਕਣਗੇ ਕਿ ਖਾਣਾ “ਹਰਾ’’ (ਸਿਹਤਮੰਦ) ਹੈ ਜਾਂ “ਲਾਲ’’ (ਗ਼ੈਰਸਿਹਤਮੰਦ)। ਇਹ ਕਦਮ ਲੋਕਾਂ ਨੂੰ ਜਾਣਕਾਰੀ-ਅਧਾਰਿਤ ਫੈਸਲੇ ਕਰਨ ਲਈ ਪ੍ਰੇਰਿਤ ਕਰੇਗਾ ਅਤੇ ਸਿਹਤਮੰਦ ਜੀਵਨਸ਼ੈਲੀ ਵਲ ਵਧਣ ਵਿਚ ਮਦਦਗਾਰ ਸਾਬਤ ਹੋਵੇਗਾ। (ਏਜੰਸੀ)
