ਪ੍ਰਹਲਾਦ ਕੁਮਾਰ (22) ਦੇ ਕੰਕਰੀਟ ਮਿਕਸਰ ਟਰੱਕ ਦੀ ਲੈਂਡ ਕਰੂਜ਼ਰ ਨਾਲ ਟੱਕਰ ਕਾਰਨ ਹੋਇਆ ਸੀ ਝਗੜਾ
ਮੁੰਬਈ : ਨਵੀਂ ਮੁੰਬਈ ਰੋਡ ਰੇਜ ਮਾਮਲੇ ’ਚ ਪੁਲਿਸ ਨੇ ਸੋਮਵਾਰ ਨੂੰ ਦਾਅਵਾ ਕੀਤਾ ਕਿ ਸਾਬਕਾ ਆਈ.ਏ.ਐਸ. ਪ੍ਰੋਬੇਸ਼ਨਰ ਪੂਜਾ ਖੇਡਕਰ ਦੇ ਪਿਤਾ ਅਤੇ ਉਸ ਦੇ ਬਾਡੀਗਾਰਡ ਨੇ ਅਪਣੀ ਐਸ.ਯੂ.ਵੀ. ’ਚ ਇਕ ਟਰੱਕ ਡਰਾਈਵਰ ਨੂੰ ਅਗਵਾ ਕਰ ਲਿਆ ਸੀ।
ਸਨਿਚਰਵਾਰ ਸ਼ਾਮ ਨੂੰ ਵਾਪਰੀ ਘਟਨਾ ਦੇ ਕੁੱਝ ਘੰਟਿਆਂ ਦੇ ਅੰਦਰ ਡਰਾਈਵਰ ਨੂੰ ਐਤਵਾਰ ਨੂੰ ਪੁਣੇ ਦੇ ਪੂਜਾ ਖੇਡਕਰ ਦੇ ਘਰ ਤੋਂ ਬਚਾਇਆ ਗਿਆ। ਰਬਾਲੇ ਪੁਲਿਸ ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ ਇਹ ਘਟਨਾ ਨਵੀਂ ਮੁੰਬਈ ਦੇ ਮੁਲੁੰਡ-ਐਰੋਲੀ ਰੋਡ ਉਤੇ ਉਸ ਸਮੇਂ ਵਾਪਰੀ ਜਦੋਂ ਪ੍ਰਹਲਾਦ ਕੁਮਾਰ (22) ਦੇ ਕੰਕਰੀਟ ਮਿਕਸਰ ਟਰੱਕ ਨੇ ਲੈਂਡ ਕਰੂਜ਼ਰ ਕਾਰ ਨਾਲ ਟਕਰਾ ਦਿਤਾ, ਜਿਸ ਕਾਰਨ ਉਸ ਅਤੇ ਲੈਂਡ ਕਰੂਜ਼ਰ ਵਿਚ ਸਵਾਰ ਦੋ ਲੋਕਾਂ ਵਿਚਾਲੇ ਬਹਿਸ ਹੋ ਗਈ।
ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਖੇਡਕਰ ਦੇ ਪਿਤਾ ਦਿਲੀਪ ਖੇਡਕਰ ਅਤੇ ਉਸ ਦੇ ਬਾਡੀਗਾਰਡ ਪ੍ਰਫੁੱਲ ਸਾਲੂਨਖੇ ਨੇ ਕੁਮਾਰ ਨੂੰ ਐਸ.ਯੂ.ਵੀ. ਵਿਚ ਬੰਨ੍ਹ ਕੇ ਮਨੋਰਮਾ ਖੇਡਕਰ ਦੇ ਬੰਗਲੇ ਵਿਚ ਲੈ ਗਏ।
ਟਰੱਕ ਮਾਲਕ ਦੀ ਸ਼ਿਕਾਇਤ ਦੇ ਆਧਾਰ ਉਤੇ ਰਬਾਲੇ ਪੁਲਿਸ ਨੇ ਐਤਵਾਰ ਨੂੰ ਦੋ ਅਣਪਛਾਤੇ ਵਿਅਕਤੀਆਂ ਵਿਰੁਧ ਭਾਰਤੀ ਨਿਆਯ ਸੰਹਿਤਾ (ਬੀ.ਐਨ.ਐਸ.) ਦੀ ਧਾਰਾ 137 (2) (ਅਗਵਾ) ਤਹਿਤ ਕੇਸ ਦਰਜ ਕੀਤਾ ਹੈ। ਪੁਲਿਸ ਨੇ ਤਕਨੀਕੀ ਵਿਸ਼ਲੇਸ਼ਣ ਦੇ ਆਧਾਰ ਉਤੇ ਐਸ.ਯੂ.ਵੀ. ਨੂੰ ਪੁਣੇ ਤਕ ਟਰੈਕ ਕੀਤਾ।
ਇਕ ਅਧਿਕਾਰੀ ਨੇ ਦਸਿਆ ਕਿ ਐਤਵਾਰ ਨੂੰ ਜਦੋਂ ਪੁਲਿਸ ਕਰਮਚਾਰੀ ਖੇਡਕਰ ਦੇ ਬੰਗਲੇ ਪਹੁੰਚੇ ਤਾਂ ਉਸ ਦੀ ਮਾਂ ਨੇ ਕਥਿਤ ਤੌਰ ਉਤੇ ਉਨ੍ਹਾਂ ਨੂੰ ਅੰਦਰ ਦਾਖਲ ਹੋਣ ਤੋਂ ਰੋਕਿਆ, ਜਿਸ ਨਾਲ ਤਿੱਖੀ ਝੜਪ ਹੋਈ। ਹਾਲਾਂਕਿ ਟੀਮ ਇਮਾਰਤ ’ਚ ਦਾਖਲ ਹੋਣ ’ਚ ਕਾਮਯਾਬ ਹੋ ਗਈ, ਕੁਮਾਰ ਨੂੰ ਬਚਾਇਆ ਅਤੇ ਉਨ੍ਹਾਂ ਨੂੰ ਨਵੀਂ ਮੁੰਬਈ ਵਾਪਸ ਲੈ ਆਇਆ। ਪੁਣੇ ਪੁਲਿਸ ਨੇ ਖੇਡਕਰ ਦੀ ਮਾਂ ਦੇ ਵਿਰੁਧ ਪੁਲਿਸ ਨੂੰ ਰੋਕਣ ਦੇ ਦੋਸ਼ ਵਿਚ ਕੇਸ ਦਰਜ ਕਰ ਕੇ ਨੋਟਿਸ ਜਾਰੀ ਕੀਤਾ ਹੈ।
ਇਸ ਦੇ ਨਾਲ ਹੀ, ਨਵੀਂ ਮੁੰਬਈ ਪੁਲਿਸ ਨੇ ਅਗਵਾ ਦੇ ਦੋਸ਼ਾਂ ਵਿਚ ਭਾਰਤੀ ਨਿਆਇ ਸੰਹਿਤਾ (ਬੀ.ਐਨ.ਐਸ.) ਦੀਆਂ ਸਬੰਧਤ ਧਾਰਾਵਾਂ ਦੇ ਤਹਿਤ ਐਸ.ਯੂ.ਵੀ. ਵਿਚ ਸਵਾਰ ਲੋਕਾਂ ਵਿਰੁਧ ਅਗਵਾ ਦਾ ਕੇਸ ਦਰਜ ਕੀਤਾ ਹੈ। ਅਧਿਕਾਰੀ ਨੇ ਦਸਿਆ ਕਿ ਦਿਲੀਪ ਖੇਡਕਰ ਅਤੇ ਪ੍ਰਫੁੱਲ ਸਾਲੂਨਖੇ ਦੇ ਨਾਮ ਐਫ.ਆਈ.ਆਰ. ਵਿਚ ਸ਼ਾਮਲ ਕੀਤੇ ਜਾ ਰਹੇ ਹਨ। ਅਜੇ ਤਕ ਕਿਸੇ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਗਿਆ ਹੈ।
ਪੂਜਾ ਖੇਡਕਰ ਉਤੇ ਸਿਵਲ ਸੇਵਾਵਾਂ ਦੀ ਇਮਤਿਹਾਨ ਵਿਚ ਧੋਖਾਧੜੀ ਕਰਨ ਅਤੇ ਗਲਤ ਢੰਗ ਨਾਲ ਓ.ਬੀ.ਸੀ. ਅਤੇ ਅਪਾਹਜਤਾ ਕੋਟੇ ਦੇ ਲਾਭਾਂ ਦਾ ਲਾਭ ਲੈਣ ਦਾ ਦੋਸ਼ ਲਗਾਇਆ ਗਿਆ ਹੈ। ਸੋਮਵਾਰ ਦੁਪਹਿਰ ਨੂੰ ਪੁਣੇ ਅਤੇ ਨਵੀਂ ਮੁੰਬਈ ਪੁਲਿਸ ਦੀ ਇਕ ਟੀਮ ਮਾਮਲੇ ਦੀ ਜਾਂਚ ਲਈ ਮਨੋਰਮਾ ਖੇੜੇਕਰ ਦੇ ਘਰ ਪਹੁੰਚੀ, ਪਰ ਉਹ ਉੱਥੇ ਨਹੀਂ ਮਿਲੀ।
ਇਕ ਪੁਲਿਸ ਅਫ਼ਸਰ ਨੇ ਕਿਹਾ, ‘‘ਕਿਉਂਕਿ ਬੰਗਲੇ ਦਾ ਮੁੱਖ ਗੇਟ ਖੋਲ੍ਹਣ ਲਈ ਕੋਈ ਮੌਜੂਦ ਨਹੀਂ ਸੀ, ਇਸ ਲਈ ਪੁਲਿਸ ਮੁਲਾਜ਼ਮ ਲੋਹੇ ਦੇ ਗੇਟ ਤੋਂ ਛਾਲ ਮਾਰ ਕੇ ਇਮਾਰਤ ਵਿਚ ਦਾਖਲ ਹੋਏ। ਪਰ ਮਨੋਰਮਾ ਖੇੜੇਕਰ ਅੰਦਰ ਨਹੀਂ ਮਿਲੀ।’’ ਪੁਲਿਸ ਨੇ ਦਸਿਆ ਕਿ ਟੀਮ ਨੇ ਤਲਾਸ਼ੀ ਲਈ, ਪਰ ਜਾਇਦਾਦ ਦੇ ਨਿਗਰਾਨ ਨੂੰ ਛੱਡ ਕੇ, ਕੋਈ ਵੀ ਇਮਾਰਤ ਦੇ ਅੰਦਰ ਮੌਜੂਦ ਨਹੀਂ ਸੀ।
ਪੂਜਾ ਖੇਡਕਰ ਉਤੇ ਦੋਸ਼ ਹੈ ਕਿ ਉਸ ਨੇ ਅਪਣੇ ਆਪ ਨੂੰ ਰਾਖਵਾਂਕਰਨ ਦੇ ਲਾਭ ਲੈਣ ਲਈ 2022 ਯੂ.ਪੀ.ਐਸ.ਸੀ. ਸਿਵਲ ਸਰਵਿਸਿਜ਼ ਇਮਤਿਹਾਨ ਲਈ ਅਪਣੀ ਅਰਜ਼ੀ ਵਿਚ ਤੱਥਾਂ ਨੂੰ ਗਲਤ ਢੰਗ ਨਾਲ ਪੇਸ਼ ਕੀਤਾ ਸੀ। ਉਸ ਨੇ ਅਪਣੇ ਵਿਰੁਧ ਲੱਗੇ ਸਾਰੇ ਦੋਸ਼ਾਂ ਦਾ ਖੰਡਨ ਕੀਤਾ ਹੈ।
ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ (ਯੂ.ਪੀ.ਐਸ.ਸੀ.) ਨੇ ਖੇਡਕਰ ਵਿਰੁਧ ਕਈ ਕਾਰਵਾਈਆਂ ਸ਼ੁਰੂ ਕੀਤੀਆਂ ਹਨ, ਜਿਸ ਵਿਚ ਅਪਣੀ ਪਛਾਣ ਜਾਅਲੀ ਬਣਾ ਕੇ ਸਿਵਲ ਸੇਵਾਵਾਂ ਦੀ ਇਮਤਿਹਾਨ ਦੇਣ ਦੀ ਕੋਸ਼ਿਸ਼ ਕਰਨ ਲਈ ਅਪਰਾਧਕ ਕੇਸ ਦਰਜ ਕਰਨਾ ਵੀ ਸ਼ਾਮਲ ਹੈ। ਦਿੱਲੀ ਪੁਲਿਸ ਨੇ ਉਸ ਦੇ ਵਿਰੁਧ ਵੱਖ-ਵੱਖ ਅਪਰਾਧਾਂ ਲਈ ਐਫ.ਆਈ.ਆਰ. ਦਰਜ ਕੀਤੀ ਸੀ।
ਪੂਜਾ ਖੇਡਕਰ ਦੀ ਪ੍ਰੋਬੇਸ਼ਨਰੀ ਆਈ.ਏ.ਐਸ. ਅਧਿਕਾਰੀ ਨਿਯੁਕਤੀ ਨੂੰ ਲੈ ਕੇ ਵਿਵਾਦ ਖੜ੍ਹੇ ਹੋਣ ਤੋਂ ਬਾਅਦ, ਪਿਛਲੇ ਸਾਲ ਇਕ ਵੀਡੀਉ ਸਾਹਮਣੇ ਆਇਆ ਸੀ, ਜਿਸ ਵਿਚ ਉਸ ਦੀ ਮਾਂ ਇਕ ਕਿਸਾਨ ਨੂੰ ਧਮਕੀਆਂ ਦਿੰਦੀ ਵੇਖੀ ਗਈ ਸੀ। ਇਸ ਤੋਂ ਬਾਅਦ ਮਨੋਰਮਾ ਖੇਡਕਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਅਤੇ ਬਾਅਦ ਵਿਚ ਜ਼ਮਾਨਤ ਉਤੇ ਰਿਹਾਅ ਕਰ ਦਿਤਾ ਗਿਆ।
