ਡਾਰਵਿਨ ਅਤੇ ਆਇੰਸਟਾਈਨ ਦੇ ਸਿਧਾਂਤਾਂ ਨੂੰ ਚੁਨੌਤੀ ਦੇਣ ਵਾਲੀ ਅਪੀਲ ਖ਼ਾਰਜ, ਅਦਾਲਤ ਨੇ ਕਿਹਾ, ਮੁੜ ਸਿੱਖਿਆ ਪ੍ਰਾਪਤ ਕਰੋ

ਨਵੀਂ ਦਿੱਲੀ: ਸੁਪਰੀਮ ਕੋਰਟ ਨੇ ਸ਼ੁਕਰਵਾਰ ਨੂੰ ਡਾਰਵਿਨ ਦੇ ਵਿਕਾਸਵਾਦ ਦੇ ਸਿਧਾਂਤ ਅਤੇ ਪੁੰਜ ਤੇ ਊਰਜਾ ਦੀ ਸਮਤੁਲਤਾ ਪ੍ਰਗਟ ਕਰਨ ਵਾਲੇ ਆਇੰਸਟਾਇਨ ਦੇ ਵਿਸ਼ੇਸ਼ ਸਾਪੇਖਤਾ ਦੇ ਸਿਧਾਂਤ ਨੂੰ ਚੁਨੌਤੀ ਦੇਣ ਵਲੀ ਜਨਹਿੱਤ ਅਪੀਲ ਨੂੰ ਖ਼ਾਰਜ ਕਰ ਦਿਤਾ ਹੈ। ਜਸਟਿਸ ਸੰਜੇ ਕਿਸ਼ਨ ਕੌਲ ਅਤੇ ਸੁਧਾਂਸ਼ੂ ਧੂਲੀਆ ਦੇ ਬੈਂਚ ਨੇ ਕਿਹਾ ਕਿ ਭਾਰਤੀ ਸੰਵਿਧਾਨ ਦੀ ਧਾਰਾ 32 ਹੇਠ ਵਿਗਿਆਨਕ ਸਿਧਾਂਤਾਂ ਨੂੰ ਚੁਨੌਤੀ ਦੇਣ ਲਈ ਰਿੱਟ ਪਟੀਸ਼ਨ ਦਾਇਰ ਨਹੀਂ ਕੀਤੀ ਜਾ ਸਕਦੀ। ਬੈਂਚ ਨੇ ਕਿਹਾ, ‘‘ਪਟੀਸ਼ਨਕਰਤਾ ਇਹ ਸਾਬਤ ਕਰਨਾ ਚਾਹੁੰਦਾ ਹੈ ਕਿ ਡਾਰਵਿਨ ਦਾ ਵਿਕਾਸਵਾਦ ਦਾ ਸਿਧਾਂਤ ਅਤੇ ਆਈਨਸਟਾਈਨ ਦਾ ਸਿਧਾਂਤ ਗਲਤ ਹੈ ਅਤੇ ਉਹ ਇਸ ਮਕਸਦ ਲਈ ਇਕ ਮੰਚ ਚਾਹੁੰਦਾ ਹੈ।’’

ਡਾਰਵਿਨ ਵਲੋਂ ਪ੍ਰਸਤਾਵਿਤ ਵਿਕਾਸਵਾਦ ਦਾ ਸਿਧਾਂਤ ਕਹਿੰਦਾ ਹੈ ਕਿ ਸਾਰੇ ਜਿਊਂਦਾ ਜੀਵ ਕੁਦਰਤੀ ਚੋਣ ਰਾਹੀਂ ਵਿਕਸਿਤ ਹੋਏ ਹਨ। ਆਈਨਸਟਾਈਨ ਦਾ ਇਕ ਮਸ਼ਹੂਰ ਸਮੀਕਰਨ ਦਸਦਾ ਹੈ ਕਿ ਊਰਜਾ ਅਤੇ ਪੁੰਜ (ਪਦਾਰਥ) ਆਪਸ ਵਿਚ ਪਰਿਵਰਤਨਯੋਗ ਹਨ। ਜਦੋਂ ਜਨਹਿੱਤ ਪਟੀਸ਼ਨ ਸੁਣਵਾਈ ਲਈ ਬੈਂਚ ਦੇ ਸਾਹਮਣੇ ਆਈ ਤਾਂ ਭਗਵੇਂ ਲਿਬਾਸ ’ਚ ਰਾਜਕੁਮਾਰ ਨਾਂ ਦਾ ਵਿਅਕਤੀ ਅਦਾਲਤ ’ਚ ਦਾਖ਼ਲ ਹੋਇਆ ਅਤੇ ਕਿਹਾ ਕਿ ਉਸ ਨੇ ਸਕੂਲ ਅਤੇ ਕਾਲਜ ਵਿਚ ਡਾਰਵਿਨ ਅਤੇ ਆਈਨਸਟਾਈਨ ਦੇ ਸਿਧਾਂਤ ਬਾਰੇ ਪੜ੍ਹਿਆ ਸੀ, ਪਰ ਉਸ ਨੂੰ ਪਤਾ ਲੱਗਾ ਕਿ ਉਸ ਨੇ ਜੋ ਪੜ੍ਹਿਆ ਹੈ ਉਹ ਗਲਤ ਹੈ। ਉਸ ਨੇ ਅੱਗੇ ਕਿਹਾ ਕਿ ਇਨ੍ਹਾਂ ਸਿਧਾਂਤਾਂ ਨੂੰ ਪੜ੍ਹਾਉਣਾ ਲੋਕਾਂ ਲਈ ਨੁਕਸਾਨਦੇਹ ਹੋ ਸਕਦਾ ਹੈ, ਇਸ ਲਈ ਇਨ੍ਹਾਂ ਨੂੰ ਵਿੱਦਿਅਕ ਸੰਸਥਾਨਾਂ ’ਚੋਂ ਹਟਾਉਣਾ ਚਾਹੀਦਾ ਹੈ। 

ਅਦਾਲਤ ਨੇ ਅਪੀਲ ਰੱਦ ਕਰਦਿਆਂ ਕਿਹਾ, ‘‘ਜਾਂ ਤਾਂ ਤੁਸੀਂ ਮੁੜ ਸਿੱਖਿਆ ਪ੍ਰਾਪਤ ਕਰੋ ਜਾਂ ਅਪਣਾ ਖ਼ੁਦ ਦਾ ਨਵਾਂ ਸਿਧਾਂਤ ਬਣਾ ਕੇ ਵਿਖਾਉ। ਅਸੀਂ ਕਿਸੇ ਨੂੰ ਇਨ੍ਹਾਂ ਸਿਧਾਂਤਾਂ ਨੂੰ ਭੁੱਲਣ ਲਈ ਕਿਸ ਤਰ੍ਹਾਂ ਕਹਿ ਸਕਦੇ ਹਾਂ।’’ ਫਿਰ ਬੈਂਚ ਨੇ ਕਿਹਾ, ‘‘ਸੁਪਰੀਮ ਕੋਰਟ ਕੀ ਕਰ ਸਕਦੀ ਹੈ? ਤੁਸੀਂ ਕਹਿ ਰਹੇ ਹੋ ਕਿ ਤੁਸੀਂ ਸਕੂਲ ’ਚ ਕੁਝ ਪੜ੍ਹਿਆ ਸੀ। ਤੁਸੀਂ ਸਾਇੰਸ ਦੇ ਵਿਦਿਆਰਥੀ ਹੋ। ਹੁਣ ਤੁਸੀਂ ਕਹਿ ਰਹੇ ਹੋ ਕਿ ਸਿਧਾਂਤ ਗਲਤ ਹਨ। ਜੇਕਰ ਤੁਹਾਨੂੰ ਅਜਿਹਾ ਲਗਦਾ ਹੈ ਤਾਂ ਸੁਪਰੀਮ ਕੋਰਟ ਇਸ ਬਾਰੇ ਕੁਝ ਨਹੀਂ ਕਰ ਸਕਦਾ। ਧਾਰਾ 32 ਦੇ ਤਹਿਤ ਤੁਹਾਡੇ ਮੌਲਿਕ ਅਧਿਕਾਰ ਦੀ ਉਲੰਘਣਾ ਕਿਵੇਂ ਹੁੰਦੀ ਹੈ?’’ ਇਸੇ ਦਿਨ ਜਸਟਿਸ ਕੌਲ ਨੇ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹੀਆਂ ਪਟੀਸ਼ਨਾਂ ’ਤੇ ‘ਕੀਮਤ’ ਲਾਉਣੀ ਪਵੇਗੀ।