ਕੁਲਦੀਪ ਸੇਂਗਰ ਦੀ ਅਪੀਲ 'ਤੇ ਸੁਣਵਾਈ 17 ਫ਼ਰਵਰੀ ਨੂੰ
ਨਵੀਂ ਦਿੱਲੀ : ਦਿੱਲੀ ਹਾਈ ਕੋਰਟ ਨੇ ਬੁਧਵਾਰ ਨੂੰ ਉਨਾਵ ਜਬਰ ਜਨਾਹ ਪੀੜਤਾ ਦੇ ਪਿਤਾ ਦੀ ਹਿਰਾਸਤ ’ਚ ਮੌਤ ਦੇ ਮਾਮਲੇ ’ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਤੋਂ ਕੱਢੇ ਗਏ ਆਗੂ ਕੁਲਦੀਪ ਸੇਂਗਰ ਅਤੇ ਹੋਰਾਂ ਵਲੋਂ ਅਪਣੀ ਸਜ਼ਾ ਵਿਰੁਧ ਦਾਇਰ ਅਪੀਲਾਂ ਉਤੇ ਸੁਣਵਾਈ 17 ਫ਼ਰਵਰੀ ਲਈ ਸੂਚੀਬੱਧ ਕੀਤੀ ਹੈ। ਜਸਟਿਸ ਸਵਰਣ ਕਾਂਤਾ ਨੇ ਹਾਈ ਕੋਰਟ ਨੂੰ ਤਿੰਨ ਮਹੀਨਿਆਂ ਅੰਦਰ ਅਪੀਲਾਂ ਉਤੇ ਫ਼ੈਸਲਾ ਕਰਨ ਦਾ ਹੁਕਮ ਦੇਣ ਵਾਲੇ ਸੁਪਰੀਮ ਕੋਰਟ ਦੇ ਹੁਕਮ ਦਾ ਨੋਟਿਸ ਲਿਆ ਅਤੇ ਕਿਹਾ ਕਿ ‘‘ਹੁਣ ਇਸ ਮਾਮਲੇ ਉਤੇ ਸਮਾਂਬੱਧ ਤਰੀਕੇ ਨਾਲ ਸੁਣਵਾਈ ਹੋਵੇਗੀ।’’
ਬੁਧਵਾਰ ਨੂੰ ਸੁਣਵਾਈ ਮੁਲਤਵੀ ਕਰ ਦਿਤੀ ਗਈ ਕਿਉਂਕਿ ਉਨ੍ਹਾਂ ਨੂੰ ਸੂਚਿਤ ਕੀਤਾ ਗਿਆ ਸੀ ਕਿ ਪੀੜਤਾ ਦੀ ਉਹ ਅਪੀਲ ਹਾਈ ਕੋਰਟ ਦੀ ਇਕ ਬੈਂਚ ਸਾਹਮਣੇ ਹੈ ਜਿਸ ’ਚ 10 ਸਾਲ ਦੀ ਸਜ਼ਾ ਨੂੰ ਵਧਾਉਣ ਦੀ ਅਪੀਲ ਕੀਤੀ ਗਈ ਹੈ। ਬੈਂਚ ਇਸ ਉਤੇ ਮਾਰਚ ਦੌਰਾਨ ਸੁਣਵਾਈ ਕਰੇਗੀ। ਜਸਟਿਸ ਨੇ ਮਾਮਲੇ ਦੀ ਸੁਣਵਾਈ 17 ਫ਼ਰਵਰੀ ਨੂੰ ਕਰਨ ਦਾ ਹੁਕਮ ਦਿਤਾ ਤਾਕਿ ਸਥਿਤੀ ਸਪੱਸ਼ਟ ਹੋ ਸਕੇ ਅਤੇ ਕੁਲਦੀਪ ਸੇਂਗਰ ਦੇ ਭਰਾ ਨੂੰ ਦਿਤੀ ਗਈ ਅੰਤਰਿਮ ਜ਼ਮਾਨਤ ਉਦੋਂ ਤਕ ਲਈ ਵਧਾ ਦਿਤੀ ਗਈ।
