ਕਿਹਾ, ਜੇ ਜ਼ਰੂਰੀ ਹੋਵੇ ਤਾਂ ਸੁਰੰਗ ਦੇ ਅੰਦਰ ਰੋਬੋਟ ਦੀ ਵਰਤੋਂ ਕੀਤੀ ਜਾਵੇ
ਹੈਦਰਾਬਾਦ : ਤੇਲੰਗਾਨਾ ਦੇ ਮੁੱਖ ਮੰਤਰੀ ਏ. ਰੇਵੰਤ ਰੈੱਡੀ ਨੇ ਐਤਵਾਰ ਨੂੰ ਕਿਹਾ ਕਿ ਐਸ.ਐਲ.ਬੀ.ਸੀ. ਪ੍ਰਾਜੈਕਟ ਦੀ ਅੰਸ਼ਕ ਤੌਰ ’ਤੇ ਢਾਹੀ ਗਈ ਸੁਰੰਗ ’ਚ 8 ਲੋਕ ਕਿੱਥੇ ਫਸੇ ਹੋਏ ਹਨ, ਇਸ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ। ਨਗਰਕੁਰਨੂਲ ਜ਼ਿਲ੍ਹੇ ’ਚ ਹਾਦਸੇ ਵਾਲੀ ਥਾਂ ਦਾ ਦੌਰਾ ਕਰਨ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਰੈੱਡੀ ਨੇ ਕਿਹਾ ਕਿ ਨੁਕਸਾਨੇ ਗਏ ਕੰਵੇਅਰ ਬੈਲਟ ਦੀ ਮੁਰੰਮਤ ਤੋਂ ਬਾਅਦ ਬਚਾਅ ਮੁਹਿੰਮ ’ਚ ਤੇਜ਼ੀ ਆਵੇਗੀ।
ਕੰਵੇਅਰ ਬੈਲਟ, ਜੋ ਗਾਦ ਨੂੰ ਸਾਫ਼ ਕਰਨ ’ਚ ਸਹਾਇਤਾ ਕਰਦੀ ਹੈ, ਦੀ ਮੁਰੰਮਤ ਸੋਮਵਾਰ ਤਕ ਹੋਣ ਦੀ ਉਮੀਦ ਹੈ। ਉਨ੍ਹਾਂ ਕਿਹਾ, ‘‘ਉਹ (ਬਚਾਅ ਕਰਮਚਾਰੀ) ਪੂਰੀ ਤਰ੍ਹਾਂ ਸਮਝ ਨਹੀਂ ਪਾ ਰਹੇ ਹਨ ਕਿ ਲੋਕ ਅਤੇ ਮਸ਼ੀਨਾਂ ਕਿੱਥੇ ਫਸੇ ਹੋਏ ਹਨ। ਉਨ੍ਹਾਂ ਕੋਲ ਸਿਰਫ ਸ਼ੁਰੂਆਤੀ ਅਨੁਮਾਨ ਹੈ।’’
ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਬਚਾਅ ਮੁਹਿੰਮ ਦੀ ਅਗਵਾਈ ਕਰ ਰਹੇ ਅਧਿਕਾਰੀਆਂ ਨੂੰ ਸੁਝਾਅ ਦਿਤਾ ਹੈ ਕਿ ਜੇ ਜ਼ਰੂਰੀ ਹੋਵੇ ਤਾਂ ਸੁਰੰਗ ਦੇ ਅੰਦਰ ਰੋਬੋਟ ਦੀ ਵਰਤੋਂ ਕੀਤੀ ਜਾਵੇ ਤਾਂ ਜੋ ਬਚਾਅ ਕਰਮਚਾਰੀਆਂ ਨੂੰ ਕਿਸੇ ਵੀ ਖਤਰੇ ਤੋਂ ਬਚਿਆ ਜਾ ਸਕੇ। ਮੁੱਖ ਮੰਤਰੀ ਨੇ ਕਿਹਾ ਕਿ ਸਰਕਾਰ ਫਸੇ ਲੋਕਾਂ ਨੂੰ ਬਾਹਰ ਕੱਢਣ ਲਈ ਦ੍ਰਿੜ ਹੈ ਅਤੇ ਹਾਦਸੇ ਕਾਰਨ ਪੀੜਤ ਪਰਵਾਰਾਂ ਦੀ ਸਹਾਇਤਾ ਲਈ ਵੀ ਤਿਆਰ ਹੈ।
ਮੁੱਖ ਮੰਤਰੀ ਨੇ ਕਿਹਾ ਕਿ ‘ਰੈਟ ਮਾਈਨਰਸ’ ਨੇ ਨੈਸ਼ਨਲ ਜੀਓਫਿਜ਼ੀਕਲ ਰੀਸਰਚ ਇੰਸਟੀਚਿਊਟ (ਐਨ.ਜੀ.ਆਰ.ਆਈ.) ਵਲੋਂ ਫਸੇ ਹੋਏ ਲੋਕਾਂ ਦੇ ਸੰਭਾਵਤ ਟਿਕਾਣਿਆਂ ਵਜੋਂ ਪਛਾਣੇ ਗਏ ਸਥਾਨਾਂ ’ਤੇ ਖੁਦਾਈ ਕੀਤੀ ਪਰ ਕਿਸੇ ਵੀ ਮਨੁੱਖ ਦੀ ਮੌਜੂਦਗੀ ਦਾ ਪਤਾ ਨਹੀਂ ਲੱਗਾ।
ਉਨ੍ਹਾਂ ਕਿਹਾ ਕਿ ਸੁਰੰਗ ਦੇ ਅੰਦਰ ਚਿੱਕੜ ਅਤੇ ਪਾਣੀ ਨੇ ਬਚਾਅ ਕਾਰਜ ’ਚ ਰੁਕਾਵਟ ਪਾਈ। ਸ਼੍ਰੀਸੈਲਮ ਖੱਬੇ ਕੰਢੇ ਨਹਿਰ (ਐਸ.ਐਲ.ਬੀ.ਸੀ.) ਦੀ ਛੱਤ ਡਿੱਗਣ ਤੋਂ ਬਾਅਦ 22 ਫ਼ਰਵਰੀ ਤੋਂ ਅੱਠ ਵਿਅਕਤੀ (ਇੰਜੀਨੀਅਰ ਅਤੇ ਕਰਮਚਾਰੀ) ਸੁਰੰਗ ਦੇ ਹੇਠਾਂ ਫਸੇ ਹੋਏ ਹਨ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਲਈ ਬਚਾਅ ਕਾਰਜ ਜ਼ੋਰਾਂ ’ਤੇ ਹਨ।
