ਇਸ ਵੀਡੀਓ ਨੂੰ ਇੰਸਟਾਗ੍ਰਾਮ 'ਤੇ Ukraine_defense ਅਕਾਊਂਟ ਦੁਆਰਾ ਪੋਸਟ ਕੀਤਾ ਗਿਆ ਹੈ
ਨਵੀਂ ਦਿੱਲੀ - ਰੂਸ ਅਤੇ ਯੂਕਰੇਨ ਵਿਚਾਲੇ ਜੰਗ ਦੇ 312 ਦਿਨ ਪੂਰੇ ਹੋ ਗਏ ਹਨ। ਕ੍ਰਿਸਮਸ ਅਤੇ ਨਵੇਂ ਸਾਲ 'ਤੇ ਯੂਕਰੇਨੀ ਫੌਜਾਂ ਨੇ ਵੀ ਰੂਸੀ ਹਮਲਿਆਂ ਦਾ ਜਵਾਬ ਦਿੱਤਾ। ਇਸ ਦੀਆਂ ਕਈ ਵੀਡੀਓਜ਼ ਅਤੇ ਫੋਟੋਆਂ ਵੀ ਸਾਹਮਣੇ ਆਈਆਂ। ਹਾਲ ਹੀ 'ਚ ਸੋਸ਼ਲ ਮੀਡੀਆ 'ਤੇ ਇਕ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ 'ਚ ਸੈਂਟਾ ਕਲਾਜ ਦੀ ਪੁਸ਼ਾਕ ਪਹਿਨੇ ਇਕ ਯੂਕ੍ਰੇਨ ਦੇ ਲੜਾਕੂ ਪਾਇਲਟ ਨੂੰ ਮਿਜ਼ਾਈਲ ਫਾਇਰ ਕਰਦੇ ਦੇਖਿਆ ਜਾ ਸਕਦਾ ਹੈ।
ਇਸ ਵੀਡੀਓ ਨੂੰ ਇੰਸਟਾਗ੍ਰਾਮ 'ਤੇ Ukraine_defense ਅਕਾਊਂਟ ਦੁਆਰਾ ਪੋਸਟ ਕੀਤਾ ਗਿਆ ਹੈ। ਕੈਪਸ਼ਨ ਵਿਚ ਦੱਸਿਆ ਗਿਆ ਹੈ ਕਿ ਲੜਾਕੂ ਪਾਇਲਟ ਨੇ ਯੂਕਰੇਨ ਹਵਾਈ ਸੈਨਾ ਦੇ ਮਿਗ-29 ਲੜਾਕੂ ਜਹਾਜ਼ ਰਾਹੀਂ ਹਮਲਾ ਕੀਤਾ। ਉਸ ਨੇ ਅਮਰੀਕੀ ਮਿਜ਼ਾਈਲ AGM-88 HARM ਨੂੰ ਰੂਸੀ ਨਿਸ਼ਾਨੇ 'ਤੇ ਦਾਗੀ। ਇਹ ਹਵਾ ਤੋਂ ਸਤ੍ਹਾ, ਐਂਟੀ ਰੇਡੀਏਸ਼ਨ ਮਿਜ਼ਾਈਲ ਹੈ। ਮਿਗ-29 ਜੈੱਟ ਦੋ AGM-88 ਮਿਜ਼ਾਈਲਾਂ ਅਤੇ ਦੋ ਆਰ-37 ਛੋਟੀ ਦੂਰੀ ਦੀਆਂ ਮਿਜ਼ਾਈਲਾਂ ਲੈ ਕੇ ਜਾਂਦਾ ਹੈ। ਆਰ-37 ਏਅਰ ਟੂ ਏਅਰ ਮਿਜ਼ਾਈਲ ਹੈ।
ਇਸ ਕਲਿੱਪ ਨੂੰ ਇੰਸਟਾਗ੍ਰਾਮ 'ਤੇ ਦੋ ਲੱਖ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ। ਪੋਸਟ ਨੂੰ 20 ਹਜ਼ਾਰ ਤੋਂ ਵੱਧ ਲੋਕਾਂ ਨੇ ਲਾਈਕ ਵੀ ਕੀਤਾ ਹੈ। ਇਕ ਯੂਜ਼ਰ ਨੇ ਕਮੈਂਟ 'ਚ ਲਿਖਿਆ- ਇਸ ਵਾਰ ਸੈਂਟਾ ਕੋਲ ਹੋਰ ਜ਼ਰੂਰੀ ਕੰਮ ਸੀ, ਇਸ ਲਈ ਮੈਨੂੰ ਤੋਹਫਾ ਨਹੀਂ ਮਿਲਿਆ। ਇਕ ਹੋਰ ਯੂਜ਼ਰ ਨੇ ਲਿਖਿਆ- ਇਸ ਸੈਂਟਾ ਦੇ ਸਾਹਮਣੇ ਕੋਈ ਨਹੀਂ ਖੜ੍ਹ ਸਕਦਾ। ਬਹੁਤ ਸਾਰੇ ਉਪਭੋਗਤਾਵਾਂ ਨੇ ਰੂਸ ਅਤੇ ਯੂਕਰੇਨ ਵਿਚਕਾਰ ਜੰਗ ਦੇ ਅੰਤ ਦੀ ਕਾਮਨਾ ਵੀ ਕੀਤੀ।
ਸਾਲ ਦਾ ਦੂਜਾ ਦਿਨ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਰੂਸ ਨੇ ਯੂਕਰੇਨ 'ਤੇ ਡਰੋਨ ਨਾਲ ਹਮਲਾ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। ਇਨ੍ਹਾਂ ਹਮਲਿਆਂ ਵਿਚ ਯੂਕਰੇਨ ਦੀ ਰਾਜਧਾਨੀ ਕੀਵ ਦੇ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ। ਗਵਰਨਰ ਓਲੇਕਸੀ ਕਲੂਬਾ ਨੇ ਟੈਲੀਗ੍ਰਾਮ 'ਤੇ ਰੂਸੀ ਹਮਲਿਆਂ ਦੀ ਜਾਣਕਾਰੀ ਦਿੱਤੀ। ਹਮਲਿਆਂ ਦੇ ਨਤੀਜੇ ਵਜੋਂ ਡੇਸਨੀਆਸਕੀ ਜ਼ਿਲ੍ਹੇ ਵਿਚ ਇਮਾਰਤ ਦਾ ਮਲਬਾ ਡਿੱਗਣ ਨਾਲ ਇੱਕ 19 ਸਾਲਾ ਲੜਕਾ ਜ਼ਖ਼ਮੀ ਹੋ ਗਿਆ।
ਨਵੇਂ ਸਾਲ ਦੇ ਦਿਨ ਵੀ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਅਤੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਵਿਚਾਲੇ ਸ਼ਬਦੀ ਜੰਗ ਹੋਈ। ਦੋਵਾਂ ਨੇ ਨਵੇਂ ਸਾਲ 'ਤੇ ਆਪਣੇ ਦੇਸ਼ ਨੂੰ ਸੰਬੋਧਨ ਕੀਤਾ। ਪੁਤਿਨ ਨੇ 9 ਮਿੰਟ ਦੇ ਲੰਬੇ ਸੰਬੋਧਨ 'ਚ ਕਿਹਾ ਕਿ ਸਾਡੀ ਫੌਜ ਆਪਣੀ ਮਾਤ ਭੂਮੀ, ਸੱਚ ਅਤੇ ਨਿਆਂ ਲਈ ਲੜ ਰਹੀ ਹੈ।
