CBI ਨੇ ਇਸ ਮਾਮਲੇ 'ਚ ਹੁਣ ਤੱਕ 40 ਮੁਲਜ਼ਮਾਂ ਨੂੰ ਕੀਤਾ ਗ੍ਰਿਫ਼ਤਾਰ
NEET Paper Leak: NEET ਪੇਪਰ ਲੀਕ ਮਾਮਲੇ 'ਚ ਸੀਬੀਆਈ ਨੇ ਪਹਿਲੀ ਚਾਰਜਸ਼ੀਟ ਦਾਖ਼ਲ ਕੀਤੀ ਹੈ। 13 ਦੋਸ਼ੀਆਂ ਖਿਲਾਫ ਚਾਰਜਸ਼ੀਟ ਦਾਇਰ ਕੀਤੀ ਗਈ ਹੈ। ਸੀਬੀਆਈ ਨੇ ਇਸ ਮਾਮਲੇ ਵਿੱਚ ਪਟਨਾ ਅਤੇ ਹਜ਼ਾਰੀਬਾਗ ਤੋਂ ਕਈ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਸੀਬੀਆਈ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਸੀ ਕਿ ਪਲਾਨ ਦੇ ਤਹਿਤ ਪੇਪਰ ਲੀਕ ਕੀਤਾ ਗਿਆ ਸੀ। ਹਜ਼ਾਰੀਬਾਗ ਸਕੂਲ ਦੇ ਐਨਟੀਏ ਬਾਕਸ ਵਿੱਚੋਂ ਪੇਪਰ ਚੋਰੀ ਕੀਤਾ ਗਿਆ ਸੀ।
ਸੀਬੀਆਈ ਨੇ 1 ਅਗਸਤ ਨੂੰ ਧਾਰਾ 120-ਬੀ, 201, 409, 380, 411, 420 ਅਤੇ 109 ਆਈਪੀਸੀ ਅਤੇ ਇਸ ਦੇ ਠੋਸ ਅਪਰਾਧਾਂ ਤਹਿਤ 13 ਆਰੋਪੀਆਂ ਨਿਤੀਸ਼ ਕੁਮਾਰ, ਅਮਿਤ ਆਨੰਦ, ਸਿਕੰਦਰ ਯਾਦਵੇਂਦੂ, ਆਸ਼ੂਤੋਸ਼ ਕੁਮਾਰ-1, ਰੋਸ਼ਨ ਕੁਮਾਰ, ਮਨੀਸ਼ ਪ੍ਰਕਾਸ਼ ,ਆਸ਼ੂਤੋਸ਼ ਕੁਮਾਰ-2, ਅਖਿਲੇਸ਼ ਕੁਮਾਰ, ਅਵਧੇਸ਼ ਕੁਮਾਰ, ਅਨੁਰਾਗ ਯਾਦਵ, ਅਭਿਸ਼ੇਕ ਕੁਮਾਰ, ਸ਼ਿਵਾਨੰਦਨ ਕੁਮਾਰ ਅਤੇ ਆਯੂਸ਼ ਰਾਜ ਦੇ ਖਿਲਾਫ ਪਹਿਲੀ ਚਾਰਜਸ਼ੀਟ ਦਾਇਰ ਕੀਤੀ ਹੈ।
ਵਰਣਨਯੋਗ ਹੈ ਕਿ ਇਹ ਕੇਸ ਪਹਿਲਾਂ 5 ਮਈ ਨੂੰ ਸ਼ਾਸਤਰੀ ਨਗਰ ਪੁਲਿਸ ਸਟੇਸ਼ਨ, ਪਟਨਾ ਵਿਖੇ ਦਰਜ ਕੀਤਾ ਗਿਆ ਸੀ ਅਤੇ ਬਾਅਦ ਵਿਚ 23 ਜੂਨ, 2024 ਨੂੰ ਸੀਬੀਆਈ ਨੂੰ ਤਬਦੀਲ ਕਰ ਦਿੱਤਾ ਗਿਆ ਸੀ। ਸੀਬੀਆਈ ਨੇ ਮੁਲਜ਼ਮਾਂ ਖ਼ਿਲਾਫ਼ ਸਬੂਤ ਇਕੱਠੇ ਕਰਨ ਲਈ ਫੋਰੈਂਸਿਕ ਤਕਨੀਕ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਤਕਨੀਕ, ਸੀਸੀਟੀਵੀ ਫੁਟੇਜ, ਟਾਵਰ ਲੋਕੇਸ਼ਨ ਵਿਸ਼ਲੇਸ਼ਣ ਆਦਿ ਦੀ ਵਰਤੋਂ ਕੀਤੀ ਹੈ। ਸੀਬੀਆਈ ਹੋਰ ਮੁਲਜ਼ਮਾਂ/ਸ਼ੱਕੀ ਵਿਅਕਤੀਆਂ ਵਿਰੁੱਧ ਅਤੇ ਕੇਸ ਦੇ ਹੋਰ ਪਹਿਲੂਆਂ 'ਤੇ ਹੋਰ ਜਾਂਚ ਕਰ ਰਹੀ ਹੈ।
ਕਈ ਹੋਰ ਮੁਲਜ਼ਮ ਪਹਿਲਾਂ ਹੀ ਪੁਲਿਸ/ਨਿਆਇਕ ਹਿਰਾਸਤ ਵਿੱਚ ਹਨ। ਇਨ੍ਹਾਂ ਮੁਲਜ਼ਮਾਂ/ਸ਼ੱਕੀਆਂ ਵਿਰੁੱਧ ਅਗਲੀ ਜਾਂਚ ਪੂਰੀ ਹੁੰਦੇ ਹੀ ਸਪਲੀਮੈਂਟਰੀ ਚਾਰਜਸ਼ੀਟ ਦਾਇਰ ਕਰ ਦਿੱਤੀ ਜਾਵੇਗੀ। ਸੀਬੀਆਈ ਨੇ ਇਸ ਮਾਮਲੇ ਵਿੱਚ ਹੁਣ ਤੱਕ 40 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿੱਚੋਂ 15 ਨੂੰ ਬਿਹਾਰ ਪੁਲੀਸ ਨੇ ਗ੍ਰਿਫ਼ਤਾਰ ਕਰਕੇ 58 ਥਾਵਾਂ ’ਤੇ ਤਲਾਸ਼ੀ ਲਈ ਹੈ।
ਕਾਊਂਸਲਿੰਗ 14 ਅਗਸਤ ਤੋਂ ਸ਼ੁਰੂ ਹੋਵੇਗੀ
NEET UG ਕਾਉਂਸਲਿੰਗ ਦੀ ਮਿਤੀ ਆ ਗਈ ਹੈ। MCC ਨੇ ਇੱਕ ਨੋਟਿਸ ਜਾਰੀ ਕਰਕੇ ਕਿਹਾ ਹੈ ਕਿ NEET UG ਲਈ ਕਾਉਂਸਲਿੰਗ 14 ਅਗਸਤ ਤੋਂ ਸ਼ੁਰੂ ਹੋਵੇਗੀ। ਹਾਲਾਂਕਿ, ਕਾਉਂਸਲਿੰਗ ਲਈ ਰਜਿਸਟ੍ਰੇਸ਼ਨ ਦੀ ਪ੍ਰਕਿਰਿਆ ਅਗਸਤ ਦੇ ਪਹਿਲੇ ਹਫ਼ਤੇ ਸ਼ੁਰੂ ਹੋਵੇਗੀ। ਨੈਸ਼ਨਲ ਮੈਡੀਕਲ ਕਮਿਸ਼ਨ (ਐਨ.ਐਮ.ਸੀ.) ਦੇ ਸਕੱਤਰ ਡਾ: ਬੀ. ਸ੍ਰੀਨਿਵਾਸ ਨੇ ਕਿਹਾ ਕਿ ਦੇਸ਼ ਭਰ ਦੇ 710 ਮੈਡੀਕਲ ਕਾਲਜਾਂ ਦੀਆਂ ਲਗਭਗ 1.10 ਲੱਖ ਸੀਟਾਂ ਕਾਉਂਸਲਿੰਗ ਰਾਹੀਂ ਭਰੀਆਂ ਜਾਣਗੀਆਂ। ਨਰਸਿੰਗ ਸੀਟਾਂ ਅਤੇ ਆਯੂਸ਼ ਸੀਟਾਂ ਤੋਂ ਇਲਾਵਾ 21 ਹਜ਼ਾਰ ਬੀਡੀਐਸ ਸੀਟਾਂ ਲਈ ਵੀ ਕਾਊਂਸਲਿੰਗ ਹੋਵੇਗੀ।
