ਜੈਵਿਕ ਖੇਤੀ ਰਾਹੀਂ ਕਮਾ ਰਿਹਾ ਹੈ ਲੱਖਾਂ ਰੁਪਏ
ਫਾਜ਼ਿਲਕਾ: ਅੱਜ ਦੇ ਯੁੱਗ ਵਿਚ ਪੜ੍ਹਾਈ ਜਿੰਨੀ ਜ਼ਿਆਦਾ ਹੋ ਗਈ ਹੈ ਨੌਕਰੀਆਂ ਵਿਚ ਕਮੀ ਆ ਗਈ ਹੈ। ਪੜ੍ਹੇ ਲਿਖੇ ਲੋਕ ਵਿਹਲੇ ਹੀ ਘੁੰਮਦੇ ਫਿਰਦੇ ਹਨ। ਉਹਨਾਂ ਨੂੰ ਕੋਈ ਸਰਕਾਰੀ ਨੌਕਰੀ ਦੀ ਉਡੀਕ ਨਹੀਂ ਹੈ। ਪਰ ਇਸ ਮਸਲੇ ਦਾ ਹੱਲ ਕਰਨ ਲਈ ਅਬੋਹਰ ਦੇ ਪਿੰਡ ਪੱਟੀ ਸਦੀਕ ਵਿੱਚ ਗੁਰਪ੍ਰੀਤ ਸਿੰਘ ਨਾਂ ਦੇ ਕਿਸਾਨ ਨੇ ਜੈਵਿਕ ਖੇਤੀ ਦੀ ਅਨੋਖੀ ਪਹਿਲ ਕੀਤੀ ਹੈ। ਗੁਰਪ੍ਰੀਤ ਸਿੰਘ ਨੇ ਜੈਵਿਕ ਕਣਕ, ਜੈਵਿਕ ਕਿੰਨੂ ਦੇ ਬਾਗ਼ ਤੇ ਦੁੱਧ ਦੀ ਸ਼ੁਰੂਆਤ ਕੀਤੀ ਹੈ।
ਇਸ ਖੇਤੀ ਨਾਲ ਉਸ ਨੂੰ ਕਾਫ਼ੀ ਮੁਨਾਫਾ ਹੋ ਰਿਹਾ ਹੈ। ਗੁਰਪ੍ਰੀਤ ਸਿੰਘ ਪਸ਼ੂਆਂ ਦੇ ਮਲ-ਮੂਤਰ ਦੀ ਖਾਧ ਬਣਾ ਕੇ ਜੈਵਿਕ ਫਸਲਾਂ ਲਈ ਇਸਤੇਮਾਲ ਕਰਦਾ ਹੈ। ਗੁਰਪ੍ਰੀਤ ਸਿੰਘ ਨੇ MA, B.Ed ਦੀ ਪੜ੍ਹਾਈ ਕੀਤੀ ਹੋਈ ਹੈ। ਇੰਨਾ ਪੜ੍ਹਨ ਦੇ ਬਾਵਜੂਦ ਨੌਕਰੀ ਨਾ ਮਿਲਣ ਕਰ ਕੇ ਉਸ ਨੇ ਖੇਤੀ ਨੂੰ ਸਹਾਇਕ ਧੰਦਾ ਬਣਾ ਲਿਆ ਹੈ ਤੇ ਲੱਖਾਂ ਰੁਪਏ ਕਮਾ ਰਿਹਾ ਹੈ। ਉਸ ਕੋਲ ਕਰੀਬ 40 ਪਸ਼ੂ ਹਨ ਤੇ ਇਹਨਾਂ ਦੇ ਦੁੱਧ ਨੂੰ ਵੇਚ ਕੇ ਕਿਸਾਨ ਮਹੀਨੇ ਦੇ ਲੱਖਾਂ ਰੁਪਏ ਕਮਾ ਰਿਹਾ ਹੈ।
ਉਸ ਦੇ ਕੋਲ 10 ਏਕੜ ਦਾ ਬਾਗ ਹੈ ਤੇ 20 ਏਕੜ ਕਣਕ ਦੀ ਫਸਲ ਹੈ ਜੋ ਪੂਰੀ ਦੀ ਪੂਰੀ ਜੈਵਿਕ ਹੈ। ਉਸ ਨੇ ਜੈਵਿਕ ਤੇ ਆਮ ਦੁੱਧ ਬਾਰੇ ਦੱਸਿਆ ਕਿ ਆਮ ਦੁੱਧ ਦੀ ਕੀਮਤ 28 ਤੋਂ 30 ਰੁਪਏ ਪ੍ਰਤੀ ਲੀਟਰ ਵਿਕ ਰਿਹਾ ਹੈ ਪਰ ਜੈਵਿਕ ਦੁੱਧ 55 ਰੁਪਏ ਪ੍ਰਤੀ ਲੀਟਰ ਵਿਕਦਾ ਹੈ। ਇਸੇ ਤਰ੍ਹਾਂ ਕਣਕ ਦੀ ਗੱਲ ਕਰੀਏ ਤਾਂ ਜੈਵਿਕ ਕਣਕ ਕਰੀਬ 2800 ਰੁਪਏ ਪ੍ਰਤੀ ਕਵੰਟਲ ਦੇ ਹਿਸਾਬ ਨਾਲ ਵਿਕਦੀ ਹੈ ਪਰ ਆਮ ਕਣਕ ਦਾ ਰੇਟ ਕਰੀਬ 1700 ਤੋਂ 1800 ਰੁਪਏ ਹੈ।
