ਅਦਾਲਤ ਵਿਚ ਚਿੱਠੀ, ਸੀਡੀ ਪੇਸ਼, ਮੁਲਜ਼ਮਾਂ ਦੁਆਰਾ ਘਟਨਾ ਸਥਾਨ 'ਤੇ ਮੌਜੂਦਗੀ ਦੀ ਗੱਲ ਕਬੂਲ ਕਰਨ ਦਾ ਦਾਅਵਾ
ਦਿੱਲੀ ਹਾਈ ਕੋਰਟ ਨੇ ਅੱਜ ਉਸ ਨੂੰ ਲਿਖੇ ਗਏ ਪੱਤਰ ਬਾਰੇ ਕਾਂਗਰਸੀ ਨੇਤਾ ਸੱਜਣ ਕੁਮਾਰ ਕੋਲੋਂ ਜਵਾਬ ਮੰਗਿਆ ਹੈ। ਇਸ ਪੱਤਰ ਵਿਚ ਦੋਸ਼ ਲਾਇਆ ਗਿਆ ਹੈ ਕਿ 1984 ਕਤਲੇਆਮ ਦੇ ਮਾਮਲੇ ਵਿਚ ਮੁਲਜ਼ਮਾਂ ਨੇ ਹਿੰਸਕ ਘਟਨਾਵਾਂ ਦੀ ਥਾਂ 'ਤੇ ਮੌਜੂਦ ਹੋਣ ਦੀ ਗੱਲ ਕਬੂਲੀ ਸੀ। ਕਾਰਜਕਾਰੀ ਜੱਜ ਗੀਤਾ ਮਿੱਤਲ ਅਤੇ ਜੱਜ ਅਨੂ ਮਲਹੋਤਰਾ ਦੇ ਬੈਂਚ ਨੇ ਸੀਬੀਆਈ ਨੂੰ ਵੀ ਪੱਛਰ ਬਾਰੇ ਅਪਣਾ ਜਵਾਬ ਦੇਣ ਲਈ ਕਿਹਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਇਹ ਪੱਤਰ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੁਆਰਾ ਲਿਖਿਆ ਗਿਆ ਹੈ ਅਤੇ ਇਸ ਵਿਚ ਅਪਰਾਧ ਵਿਚ ਕਥਿਤ ਸ਼ਮੂਲੀਅਤ ਲਈ ਮੁਲਜ਼ਮਾਂ ਵਿਰੁਧ ਕਾਰਵਾਈ ਦੀ ਮੰਗ ਕੀਤੀ ਗਈ ਹੈ।
Sikh Riots
ਕੁਮਾਰ ਦੇ ਵਕੀਲ ਅਨਿਲ ਸ਼ਰਮਾ ਮੁਤਾਬਕ ਵੇਲੇ ਦੀ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਦੀ ਹਤਿਆ ਮਗਰੋਂ ਦਿੱਲੀ ਛਾਉਣੀ ਦੇ ਰਾਜ ਨਗਰ ਵਿਚ ਪਰਵਾਰ ਦੇ ਚਾਰ ਜੀਆਂ ਦੀ ਹਤਿਆ ਦੇ ਸਬੰਧ ਵਿਚ ਇਕ ਦੋਸ਼ੀ ਦੀ ਫ਼ਾਈਲ ਨਾਲ ਕਮੇਟੀ ਦਾ ਪੱਤਰ ਅਤੇ ਸੀਡੀ ਜੋੜੀ ਗਈ। ਪੰਜ ਸਿੱਖਾਂ ਦੀ ਹਤਿਆ ਦੇ ਮਾਮਲੇ ਵਿਚ ਕੁਮਾਰ ਨੂੰ ਬਰੀ ਕੀਤੇ ਜਾਣ ਵਿਰੁਧ ਸੀਬੀਆਈ ਦੀ ਅਪੀਲ 'ਤੇ ਸੁਣਵਾਈ ਦੌਰਾਨ ਬੈਂਚ ਸਾਹਮਣੇ ਪੱਤਰ ਅਤੇ ਸੀਡੀ ਰਖੀਆਂ ਗਈਆਂ। ਅਦਾਲਤ ਨੇ ਪੱਤਰ ਅਤੇ ਸੀਡੀ ਨੂੰ ਵੱਖ ਕਰ ਕੇ ਇਨ੍ਹਾਂ ਨੂੰ ਜਨਹਿਤ ਪਟੀਸ਼ਨ ਵਿਚ ਬਦਲਿਆ। (ਏਜੰਸੀ)
