ਕਿਹਾ - ਜਦੋਂ ਵੀ ਕੋਈ ਵੱਡਾ ਰਸਤਾ ਬੰਦ ਕੀਤਾ ਜਾਂਦਾ ਹੈ ਤਾਂ ਸਰਕਾਰਾਂ ਆਰਜ਼ੀ ਰਸਤਾ ਨਾਲ ਖੋਲ੍ਹ ਦਿੰਦੀਆਂ ਹਨ
ਅੰਮ੍ਰਿਤਸਰ : ਕਰਤਾਰਪੁਰ ਸਾਹਿਬ ਦੇ ਲਾਂਘੇ ਦੇ ਬਾਨੀ ਪ੍ਰਚਾਰਕ ਤੇ ਸਿੱਖ ਵਿਦਵਾਨ ਬੀ.ਐਸ. ਗੁਰਾਇਆ ਨੇ ਪ੍ਰੈਸ ਨੋਟ ਜਾਰੀ ਕਰ ਕੇ ਪੰਜਾਬ ਸਰਕਾਰ ਨੂੰ ਬੇਨਤੀ ਕੀਤੀ ਹੈ ਕਿ ਸਰਹੱਦ 'ਤੇ ਖਲ੍ਹੋ ਕੇ ਜਿਹੜੇ ਸ਼ਰਧਾਲੂ ਕਰਤਾਰਪੁਰ ਦੇ ਦਰਸ਼ਨ ਕਰਦੇ ਨੇ ਲਾਂਘਾ ਨਿਰਮਾਣ ਦਰਮਿਆਨ ਅਜਿਹੇ ਦੂਰ ਦਰਸ਼ਨ ਹਰ ਹੀਲੇ ਯਕੀਨੀ ਬਣਾਏ ਜਾਣ।
B.S. Goraya
ਗੁਰਾਇਆ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪਤਾ ਲੱਗਾ ਹੈ ਕਿ ਪੰਜਾਬ ਸਰਕਾਰ ਦੀ ਤਜਵੀਜ਼ ਹੈ ਕਿ ਲਾਂਘਾ ਨਿਰਮਾਣ ਦੌਰਾਨ ਦੂਰ ਦਰਸ਼ਨ ਬੰਦ ਕੀਤੇ ਜਾਣ। ਗੁਰਾਇਆ ਨੇ ਕਿਹਾ ਕਿ ਅਜਿਹਾ ਕਰਨ ਨਾਲ ਸੰਗਤਾਂ ਵਿਚ ਰੋਸ ਉਤਪੰਨ ਹੋਵੇਗਾ। ਯਾਦ ਰਹੇ ਜਦੋਂ ਵੀ ਕੋਈ ਵੱਡਾ ਰਸਤਾ ਬੰਦ ਕੀਤਾ ਜਾਂਦਾ ਹੈ ਤਾਂ ਸਰਕਾਰਾਂ ਆਰਜ਼ੀ ਰਸਤਾ ਨਾਲ ਖੋਲ੍ਹ ਦਿੰਦੀਆਂ ਹਨ। ਪਰ ਇਥੇ ਤਾਂ ਅਜਿਹੀ ਕੋਈ ਮੁਸ਼ਕਲ ਹੀ ਨਹੀਂ ਹੈ ਕਿਉਕਿ ਸਰਹੱਦ 'ਤੇ ਸ਼ਰਧਾਲੂ ਪੈਦਲ ਹੀ ਪਹੁੰਚਦੇ ਹਨ। ਸਰਹੱਦ 'ਤੇ ਗੱਡੀਆਂ ਦਾ ਆਉਣਾ ਬੰਦ ਕੀਤਾ ਜਾ ਸਕਦਾ ਹੈ। ਫਿਰ ਤਾਰਾਂ ਲਾ ਕੇ ਸ਼ਰਧਾਲੂ ਨੂੰ ਲਾਂਘਾ ਨਿਰਮਾਣ ਖੇਤਰ ਤੋਂ ਦੂਰ ਰਖਿਆ ਜਾ ਸਕਦਾ ਹੈ।
Kartarpur Corridor
ਦੂਸਰਾ ਬਦਲ ਇਹ ਵੀ ਹੈ ਕਿ ਸ਼ਰਧਾਲੂਆਂ ਲਈ ਪੱਖੋਕੇ ਵਾਲੇ ਪਾਸਿਉਂ ਸਰਹੱਦ 'ਤੇ ਜਾਣ ਦੀ ਖੁਲ੍ਹ ਦੇ ਦਿਤੀ ਜਾਵੇ ਕਿਉਂਕਿ ਪੱਖੋਕਿਆਂ ਪਾਸਿਉਂ ਵੀ ਸਰਹੱਦ ਤਕ ਰਸਤਾ ਪਹਿਲਾਂ ਹੀ ਹੈ। ਫਿਰ ਮੌਜੂਦਾ ਲਾਂਘਾ ਮਾਰਗ ਦੇ ਲਹਿੰਦੇ ਪਾਸੇ ਵੀ ਡੇਰਾ ਬਾਬਾ ਨਾਨਕ ਤੋਂ ਰਸਤਾ ਸਰਹੱਦ ਨੂੰ ਜਾਂਦਾ ਹੈ। ਉਹ ਵਰਤਣ ਦੀ ਇਜਾਜ਼ਤ ਦੇ ਦਿਤੀ ਜਾਵੇ। ਇਨ੍ਹਾਂ ਬਦਲਵੇ ਪ੍ਰਬੰਧਾਂ ਵਿਚ ਸਰਕਾਰ ਨੂੰ ਕੁੱਝ ਵੀ ਵਾਧੂ ਇੰਤਜ਼ਾਮ ਦੀ ਜ਼ਰੂਰਤ ਨਹੀਂ ਪਵੇਗੀ ਕਿਉਕਿ ਦੋਵਾਂ ਪਾਸਿਆਂ ਤੇ ਉੱਚੀ ਧੁੱਸੀ ਪਹਿਲਾਂ ਹੀ ਹੈ ਤੇ ਜਿਸ ਦੇ ਅੱਗੇ ਕੰਡਿਆਲੀ ਤਾਰ ਲੱਗੀ ਹੋਈ ਤੇ ਤੀਸਰਾ ਬੀ. ਐਸ. ਐਫ਼ ਦਾ ਪਹਿਰਾ ਪਹਿਲਾਂ ਹੀ 24 ਘੰਟੇ ਮੌਜੂਦ ਹੈ।
Kartarpur Sahib
ਗੁਰਾਇਆ ਨੇ ਦਾਅਵਾ ਕੀਤਾ ਕਿ ਕਰਤਾਰਪੁਰ ਦੇ ਦਰਸ਼ਨਾਂ ਲਈ ਜਾਣ ਵਾਲੇ ਸ਼ਰਧਾਲੂ ਬਹੁਤ ਅਮਨ ਪਸੰਦ ਹਨ ਅਤੇ ਰੀਕਾਰਡ ਹੈ ਕਿ ਪਿਛਲੇ 18 ਸਾਲਾਂ ਵਿਚ ਸ਼ਰਧਾਲੂਆਂ ਕਰ ਕੇ ਕਦੀ ਵੀ ਕੋਈ ਅਣਸੁਖਾਵੀਂ ਘਟਨਾ ਨਹੀਂ ਘਟੀ। ਗੁਰਾਇਆ ਨੇ ਕਿਹਾ ਕਿ ਦੂਰ ਦਰਸ਼ਨ ਬੰਦ ਕਰਨ ਨਾਲ ਮੁਸ਼ਕਲਾਂ ਵਧਣਗੀਆਂ।
