ਅੱਜ ਜਿਥੇ ਹਰ ਭਾਸ਼ਾ ਦੇ ਅਨੇਕਾਂ ਚੈਨਲ ਅੱਗੇ ਆ ਰਹੇ ਹਨ, ਕਈ ਤਰ੍ਹਾਂ ਦੇ ਲੜੀਵਾਰ ਨਾਟਕਾਂ ਦਾ ਦੌਰ ਵੀ ਚਲ ਰਿਹਾ ਹੈ।
ਅੱਜ ਜਿਥੇ ਹਰ ਭਾਸ਼ਾ ਦੇ ਅਨੇਕਾਂ ਚੈਨਲ ਅੱਗੇ ਆ ਰਹੇ ਹਨ, ਕਈ ਤਰ੍ਹਾਂ ਦੇ ਲੜੀਵਾਰ ਨਾਟਕਾਂ ਦਾ ਦੌਰ ਵੀ ਚਲ ਰਿਹਾ ਹੈ। ਸਿਰਫ਼ ਪੰਜਾਬੀ ਚੈਨਲਾਂ ਦੀ ਗਿਣਤੀ ਵਿਚ ਹੀ ਜ਼ਿਆਦਾ ਵਾਧਾ ਨਹੀਂ ਹੋ ਰਿਹਾ। ਇਸ ਪਿੱਛੇ ਕਾਰਨ ਇਹ ਹੈ ਕਿ ਸੱਤਾਧਾਰੀ ਅਕਾਲੀ ਦਲ ਨੇ ਅਪਣਾ ਹੀ ਚੈਨਲ ਚਲਾ ਕੇ ਕਿਸੇ ਹੋਰ ਚੈਨਲ ਨੂੰ ਖੜੇ ਹੋਣ ਹੀ ਨਹੀਂ ਦਿਤਾ।
Shiromani Akali Dal
ਫਿਰ ਕਿਉਂਕਿ ਸ਼੍ਰੋਮਣੀ ਕਮੇਟੀ ਵੀ ਇਕ ਸਿਆਸੀ ਪਾਰਟੀ, ਅਕਾਲੀ ਦਲ ਦੀ ਹੱਥ-ਬੰਨ੍ਹ ਗ਼ੁਲਾਮ ਬਣੀ ਹੋਈ ਹੈ, ਇਸ ਲਈ ਗੁਰਬਾਣੀ ਦੇ ਪ੍ਰਸਾਰਣ ਤੇ ਵੀ ਬਾਦਲਾਂ ਦੀ ਮਾਲਕੀ ਵਾਲੇ ਇਕ ਚੈਨਲ ਦਾ ਹੀ ਮੁਕੰਮਲ ਹੱਕ ਕਾਇਮ ਕਰ ਦਿਤਾ ਗਿਆ ਹੈ। ਹੁਣ ਕਿਉਂਕਿ ਦੁਨੀਆਂ ਦੇ ਹਰ ਕੋਨੇ ਵਿਚ ਬੈਠਾ ਪੰਜਾਬੀ, ਦਰਬਾਰ ਸਾਹਿਬ ਨਾਲ ਜੁੜਿਆ ਹੋਇਆ ਹੈ, ਹਰ ਕੋਈ ਇਸ ਇਸ ਚੈਨਲ ਉਤੇ ਹੀ ਨਿਰਭਰ ਹੋ ਗਿਆ ਹੈ।
Darbar Sahib
ਪੰਜਾਬ ਦਾ ਇਕੋ ਹੀ ਚੈਨਲ ਰਹਿ ਗਿਆ ਹੈ ਜਿਸ ਨੇ ਗੁਰਬਾਣੀ ਪ੍ਰਸਾਰਣ ਤੋਂ ਅਰਬਾਂ ਰੁਪਏ ਦਾ ਮੁਨਾਫ਼ਾ ਵੀ ਖਟਿਆ ਅਤੇ ਨਾਲ ਹੀ ਸਿੱਖ ਸਿਆਸਤ ਵੀ ਆਪਣੀ ਮੁੱਠੀ ਵਿਚ ਬੰਦ ਗੁੜ ਦੀ ਭੇਲੀ ਬਣਾ ਦਿਤੀ ਗਈ, ਕਿਉਂਕਿ ਜਿਸ ਦਾ ਚੈਨਲ ਉਤੇ ਕਬਜ਼ਾ ਹੋਵੇਗਾ, ਪ੍ਰਚਾਰ ਵੀ ਉਸੇ ਦਾ ਹੀ ਤਾਂ ਹੋਵੇਗਾ।
Guru Granth sahib ji
ਡਿਜੀਟਲ ਮੀਡੀਆ ਉਤੇ ਪੰਜਾਬੀ ਚੈਨਲਾਂ ਲਈ ਵਧਣ ਦਾ ਰਸਤਾ ਖੁਲ੍ਹਿਆ ਅਤੇ ਅੱਜ ਡਿਜੀਟਲ (ਸੋਸ਼ਲ) ਮੀਡੀਆ ਵੀ ਪੰਜਾਬੀਆਂ ਦੀ ਪਹਿਲੀ ਪਸੰਦ ਬਣ ਗਿਆ ਹੈ ਕਿਉਂਕਿ ਇੱਥੇ ਹਰ ਇਕ ਨੂੰ ਮੌਕਾ ਤਾਂ ਮਿਲ ਜਾਂਦਾ ਹੈ ਕਿ ਉਹ ਪੰਜਾਬੀ ਵਿਚ ਅਪਣੇ ਦਿਲ ਦੀ ਹਵਾੜ ਕੱਢ ਲਵੇ। ਸਪੋਕਸਮੈਨ ਟੀ.ਵੀ. ਵੀ, ਡਿਜੀਟਲ ਪਲੇਟਫ਼ਾਰਮ ਬਣ ਕੇ ਪੰਜਾਬੀਆਂ ਦੇ ਨਾਲ ਨਾਲ, ਦੇਸ਼-ਵਿਦੇਸ਼ ਦੇ ਲੋਕਾਂ ਨਾਲ ਵੀ ਜੁੜਦਾ ਜਾ ਰਿਹਾ ਹੈ ਅਤੇ ਸਾਰੇ ਪੰਜਾਬੀਆਂ ਦਾ ਦਿਲ ਕਰਦਾ ਹੈ ਕਿ ਅਪਣਾ ਪਹਿਲਾ ਕੰਮ ਗੁਰੂ ਦੀ ਬਾਣੀ ਸੁਣ ਕੇ ਸ਼ੁਰੂ ਕਰਨ ਅਤੇ ਸਾਡੇ ਦਰਸ਼ਕ ਵੀ ਇਸ ਦੇ ਆਦੀ ਹੋ ਗਏ ਹਨ।
SGPC
ਸੋ ਸਪੋਕਸਮੈਨ ਟੀ.ਵੀ. ਨੇ ਹਰ ਸਵੇਰ ਐਸ.ਜੀ.ਪੀ.ਸੀ. ਦੀ ਵੈੱਬਸਾਈਟ ਤੋਂ ਹੁਕਮਨਾਮਾ ਅਤੇ ਉਸ ਦਾ ਉਚਾਰਣ ਲੈ ਕੇ ਅਪਣੇ ਦਿਨ ਦੀ ਸ਼ੁਰੂਆਤ ਕੀਤੀ। ਭਾਵੇਂ ਸਾਡਾ ਡਿਜੀਟਲ ਚੈਨਲ ਖ਼ੁਦ ਫ਼ੇਸਬੁਕ ਰਾਹੀਂ ਕਮਾਈ ਕਰਦਾ ਹੈ, ਅਸੀਂ ਹੁਕਮਨਾਮੇ ਤੋਂ ਕਮਾਈ ਕਰਨ ਬਾਰੇ ਕਦੇ ਨਹੀਂ ਸੀ ਸੋਚਿਆ ਅਤੇ ਇਹ ਸਿਰਫ਼ ਇਕ ਜਜ਼ਬਾਤੀ ਧਾਰਮਕ ਫ਼ੈਸਲਾ ਸੀ।
Darbar Sahib
ਪਰ ਤਿੰਨ ਦਿਨ ਪਹਿਲਾਂ ਸਾਨੂੰ ਹੈਰਾਨੀ ਹੋਈ ਜਦੋਂ ਫ਼ੇਸਬੁਕ ਰਾਹੀਂ ਪੀ.ਟੀ.ਸੀ. ਤੋਂ ਇਕ ਨੋਟਿਸ ਆਇਆ ਜਿਸ ਵਿਚ ਲਿਖਿਆ ਸੀ ਕਿ ਦਰਬਾਰ ਸਾਹਿਬ ਤੋਂ ਉਚਾਰੀ ਗਈ ਗੁਰਬਾਣੀ ਦਾ ਪ੍ਰਸਾਰਣ ਕਰ ਕੇ ਸਪੋਕਸਮੈਨ ਨੇ ਸਮੱਗਰੀ ਚੋਰੀ ਕੀਤੀ ਹੈ ਕਿਉਂਕਿ ਦਰਬਾਰ ਸਾਹਿਬ ਤੋਂ ਸਾਰੇ ਗੁਰਬਾਣੀ ਪ੍ਰਸਾਰਣ ਦਾ ਹੱਕ ਸਿਰਫ਼ ਅਤੇ ਸਿਰਫ਼ ਪੀ.ਟੀ.ਸੀ. ਕੋਲ ਹੈ।
SGPC
ਪਹਿਲਾਂ ਤਾਂ ਸੋਚਿਆ, ਕੋਈ ਨਾ ਲੈ ਲੈਣ ਦਿਉ ਇਨ੍ਹਾਂ ਨੂੰ ਇਹ ਹੱਕ ਵੀ ਪਰ ਫਿਰ ਕੁੱਝ ਹੋਰ ਡਿਜੀਟਲ ਮੀਡੀਆ ਚੈਨਲਾਂ ਨਾਲ ਗੱਲ ਹੋਈ ਤਾਂ ਪਤਾ ਲਗਿਆ ਕਿ ਸਾਰਿਆਂ ਨੂੰ ਹੀ ਇਹ ਨੋਟਿਸ ਆਇਆ ਹੈ। ਫਿਰ ਥੋੜ੍ਹੀ ਨਿਰਾਸ਼ਾ, ਥੋੜ੍ਹਾ ਗੁੱਸਾ, ਥੋੜ੍ਹਾ ਜੋਸ਼ ਆਇਆ ਕਿ ਆਖ਼ਰ ਕੀ ਕੀ ਦੇਣਾ ਪਵੇਗਾ ਇਨ੍ਹਾਂ ਲੋਕਾਂ ਨੂੰ ਜਿਨ੍ਹਾਂ ਦੀ ਭੁਖ ਦੀ ਕੋਈ ਸੀਮਾ ਹੀ ਨਹੀਂ ਰਹਿ ਗਈ?
Rozana Spokesman
ਪੰਜਾਬ ਦੇ ਸਾਰੇ ਕਾਨੂੰਨੀ ਅਤੇ ਗ਼ੈਰ-ਕਾਨੂੰਨੀ ਕਮਾਈ ਦੇ ਸਾਧਨਾਂ ਉਤੇ ਕਾਬਜ਼ ਹਨ, ਧਰਮ ਦੇ ਠੇਕੇਦਾਰ ਜੋ ਸਾਨੂੰ ਦਸਦੇ ਹਨ ਕਿ ਅਸੀਂ ਪਤਿਤ ਹਾਂ ਅਤੇ ਉਹ ਜੋ ਗੋਲਕ ਦੀ ਚੋਰੀ ਕਰਦੇ ਹਨ, ਬੇਟੀਆਂ ਦਾ ਕਤਲ ਕਰਦੇ ਹਨ, ਘਰਵਾਲੀਆਂ ਨਾਲ ਧੋਖੇ ਕਰਦੇ ਹਨ, ਗਾਤਰੇ ਉਤਾਰ ਮਾਰਦੇ ਹਨ, ਬਾਬਿਆਂ ਅੱਗੇ ਹੱਥ ਜੋੜ ਜੋੜ ਖੜੇ ਹੋ ਜਾਂਦੇ ਹਨ, ਉਹ ਸਾਰੇ ਗੁਰੂ ਦੇ ਸਿੱਖ ਹਨ।
Photo
ਕਾਰਸੇਵਾ ਦੇ ਨਾਂ ਤੇ ਬਾਬਿਆਂ ਕੋਲੋਂ ਬੋਲੀਆਂ ਲਾ ਕੇ ਕਰੋੜਾਂ ਇਕੱਤਰ ਕਰਦੇ ਹਨ। ਅਸੀਂ ਕਿਹਾ ਕੋਈ ਗੱਲ ਨਹੀਂ, ਗੁਰੂ ਤਾਂ ਦਿਲ ਵਿਚ ਹੈ। ਫਿਰ ਇਨ੍ਹਾਂ ਗੁਰੂ ਦੇ ਫ਼ਲਸਫ਼ੇ ਨੂੰ, ਵੋਟ ਸਿਆਸਤ ਪਿੱਛੇ ਛੱਡ ਦਿਤਾ। ਚਲੋ, ਕੋਈ ਗੱਲ ਨਹੀਂ, ਸਿਆਸਤ ਚੀਜ਼ ਹੀ ਐਸੀ ਹੈ। ਸਮਾਜ ਵਿਚ ਦਰਾੜਾਂ ਪਾ ਕੇ ਜਿੱਤ ਹਾਸਲ ਕਰਨ ਲਈ ਜਾਤ ਦੇ ਨਾਂ ਤੇ ਗੁਰੂਘਰ ਅਤੇ ਸ਼ਮਸਾਨ ਘਾਟ ਬਣਵਾਏ।
Photo
ਅਸੀਂ ਦੰਗ ਸੀ ਪਰ ਫਿਰ ਚੁਪ ਹੀ ਰਹੇ ਕਿਉਂਕਿ ਇਹ ਜਨਤਾ ਦੀ ਮੰਗ ਸੀ, ਭਾਵੇਂ ਗ਼ਲਤ ਹੀ ਸੀ। ਪਰ ਅੱਜ ਤਾਂ ਉਨ੍ਹਾਂ ਨੇ ਇਹ ਫ਼ਤਵਾ ਦੇ ਦਿਤਾ ਹੈ ਕਿ ਉਨ੍ਹਾਂ ਨੇ ਗੁਰਬਾਣੀ ਦੇ ਪ੍ਰਚਾਰ ਨੂੰ ਪੀ.ਟੀ.ਸੀ. ਅਤੇ ਆਰ.ਐਨ. ਨਾਂ ਦੇ ਉਸ ਦੇ ਸੀ.ਈ.ਓ. ਦੇ ਹਵਾਲੇ ਕਰ ਦਿਤਾ ਹੈ। ਸਾਡਾ ਮਤਲਬ ਸਾਡੇ ਗੁਰੂ ਦੀ ਬਾਣੀ ਉਤੇ ਇਜਾਰੇਦਾਰੀ ਕਾਇਮ ਕਰਨਾ ਨਹੀਂ ਅਤੇ ਸ਼੍ਰੋਮਣੀ ਕਮੇਟੀ ਨੂੰ ਵੀ ਸਾਡੇ ਗੁਰੂ ਦੇ ਸ਼ਬਦ ਉਤੇ ਇਜਾਰੇਦਾਰੀ ਕਾਇਮ ਕਰਨ ਦਾ ਕੋਈ ਹੱਕ ਨਹੀਂ।
PTC
ਮੇਰੇ ਮਾਂ-ਬਾਪ ਦੇ ਬੋਲਾਂ ਉਤੇ ਮੇਰਾ ਹੱਕ ਕੁਦਰਤ ਨੇ ਮੈਨੂੰ ਦਿਤਾ ਅਤੇ ਸਾਡੇ ਗੁਰੂ ਦੇ ਸ਼ਬਦਾਂ ਉਤੇ ਹੱਕ ਗੁਰੂਆਂ ਨੇ ਸਾਨੂੰ ਆਪ ਦਿਤਾ ਹੈ। ਸ਼੍ਰੋਮਣੀ ਕਮੇਟੀ ਦਾ ਤਾਂ ਫ਼ਰਜ਼ ਬਣਦਾ ਹੈ ਕਿ ਗੁਰੂ ਦਾ ਸ਼ਬਦ ਦੁਨੀਆਂ ਵਿਚ ਬੈਠੇ ਹਰ ਸਿੱਖ ਅਤੇ ਸਾਰੀ ਇਨਸਾਨੀਅਤ ਤਕ ਪਹੁੰਚਾਵੇ ਪਰ ਸ਼੍ਰੋਮਣੀ ਕਮੇਟੀ ਨੇ ਤਾਂ ਗੁਰੂ ਦੇ ਸ਼ਬਦ ਨੂੰ ਹੀ ਪੀ.ਟੀ.ਸੀ. ਕੋਲ ਵੇਚ ਦਿਤਾ ਹੈ।
Photo
ਜਦ ਪ੍ਰਧਾਨ ਲੌਂਗੋਵਾਲ ਨੂੰ ਪੁਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਪੀ.ਟੀ.ਸੀ. ਦੇ ਨਾਰਾਇਣਨ (ਜਿਨ੍ਹਾਂ ਕੋਲ ਪ੍ਰਸਾਰਨ ਦੇ ਸਾਰੇ ਹੱਕ ਹਨ) ਨੂੰ ਪੁਛ ਕੇ ਦੱਸਾਂਗਾ। ਇਸ ਤੋਂ ਮਾੜੀ ਗੱਲ ਕੀ ਹੋ ਸਕਦੀ ਹੈ ਕਿ ਸ਼੍ਰੋਮਣੀ ਕਮੇਟੀ ਦਾ ਪ੍ਰਧਾਨ ਹੁਣ ਪੀ.ਟੀ.ਸੀ. ਦੇ ਸੀ.ਈ.ਓ. ਤੋਂ ਇਜਾਜ਼ਤ ਲੈ ਕੇ ਸਿੱਖਾਂ ਨੂੰ ਗੁਰਬਾਣੀ ਨਾਲ ਜੁੜੇ ਰਹਿਣ ਦੀ ਆਗਿਆ ਦੇਣ।
Gobind Singh Longowal
ਜਦੋਂ ਵੀ ਸੋਚਦੇ ਹਾਂ ਕਿ ਇਸ ਤੋਂ ਹੋਰ ਜ਼ਿਆਦਾ ਮਾੜਾ ਕੀ ਹੋ ਸਕਦਾ ਹੈ ਤਾਂ ਅਕਾਲੀ ਦਲ/ਸ਼੍ਰੋਮਣੀ ਕਮੇਟੀ ਕੁੱਝ ਹੋਰ ਨੀਵਾਂ ਹੋ ਕੇ ਵਿਖਾ ਦਿੰਦੇ ਹਨ। ਜਾਂ ਤਾਂ ਅਪਣਾ ਕੱਦ ਉੱਚਾ ਕਰੋ ਤਾਕਿ ਇਹ ਲੋਕ ਸਿੱਧੀ ਗੱਲ ਕਰਨ ਲਈ ਮਜਬੂਰ ਹੋ ਜਾਣ ਜਾਂ ਇਨ੍ਹਾਂ ਵਾਂਗ ਰੇਂਗਦੇ ਹੋਏ ਆਰ.ਐਨ. ਵਰਗੇ ਉਦਯੋਗਪਤੀ ਤੋਂ ਗੁਰਬਾਣੀ ਉਚਾਰਣ ਦੀ ਇਜਾਜ਼ਤ ਲਵੋ।
Nankana Sahib
ਪਰ ਏਨੀ ਕੀਮਤ ਅਦਾ ਕਰਨੀ ਸਾਡੇ ਵਸ ਦੀ ਗੱਲ ਤਾਂ ਹੈ ਨਹੀਂ, ਸੋ ਹੁਣ ਅਸੀਂ ਦਰਬਾਰ ਸਾਹਿਬ ਤੋਂ ਦੂਰ ਹੋਣ ਜਾ ਰਹੇ ਹਾਂ। ਕੋਸ਼ਿਸ਼ ਕਰਾਂਗੇ ਕਿ ਪਾਕਿਸਤਾਨ ਤੋਂ ਨਨਕਾਣਾ ਸਾਹਿਬ ਦੇ ਹੁਕਮਨਾਮੇ ਨਾਲ ਜੁੜ ਸਕੀਏ। ਪੁਰਾਣੇ ਮੁਲਕ ਦੇ ਗੁਰਦਵਾਰਾ ਪ੍ਰਬੰਧਕ ਤਾਂ ਸਾਡੀ ਬੇਨਤੀ ਪ੍ਰਵਾਨ ਕਰ ਸਕਦੇ ਹਨ, ਅਪਣਿਆਂ ਤੋਂ ਕੋਈ ਉਮੀਦ ਨਹੀਂ ਰੱਖੀ ਜਾ ਸਕਦੀ ਕਿਉਂਕਿ ਉਨ੍ਹਾਂ ਦੇ ਵਪਾਰਕ ਅਤੇ ਰਾਜਸੀ ਹਿਤ, ਗੁਰਬਾਣੀ ਦੇ ਪ੍ਰਚਾਰ ਨਾਲੋਂ ਜ਼ਿਆਦਾ ਜ਼ਰੂਰੀ ਹਨ ਸ਼ਾਇਦ। -ਨਿਮਰਤ ਕੌਰ
