ਦੁਨੀਆਂ ਦੀ ਸੱਭ ਤੋਂ ਵੱਡੀ ਲੋਕਤੰਤਰੀ ਚੋਣ ਦੀ ਸ਼ੁਰੂਆਤ ਸ਼ੁੱਭ ਸੰਕੇਤ ਨਹੀਂ ਪੇਸ਼ ਕਰਦੀ। ਆਗੂਆਂ ਨੂੰ ਲੜਾਈਆਂ ਤੇ ਝੜਪਾਂ ਅਪਣੇ ਅੜਭਪੁਣੇ ਦੀ ਨੁਮਾਇਸ਼ ਕਰਨ ਦੀ ਆਦਤ ਜਹੀ...
ਦੁਨੀਆਂ ਦੀ ਸੱਭ ਤੋਂ ਵੱਡੀ ਲੋਕਤੰਤਰੀ ਚੋਣ ਦੀ ਸ਼ੁਰੂਆਤ ਸ਼ੁੱਭ ਸੰਕੇਤ ਨਹੀਂ ਪੇਸ਼ ਕਰਦੀ। ਆਗੂਆਂ ਨੂੰ ਲੜਾਈਆਂ ਤੇ ਝੜਪਾਂ ਅਪਣੇ ਅੜਭਪੁਣੇ ਦੀ ਨੁਮਾਇਸ਼ ਕਰਨ ਦੀ ਆਦਤ ਜਹੀ ਹੋ ਗਈ ਹੈ। ਪਰ ਪਹਿਲੇ ਦਿਨ ਹੀ ਹੋਈਆਂ ਦੋ ਮੌਤਾਂ ਡਰਾਉਂਦੀਆਂ ਹਨ ਕਿ ਇਸ ਚੋਣ ਵਿਚ ਕਿੰਨੀ ਵੱਡੀ ਕੀਮਤ ਚੁਕਾਉਣੀ ਪਵੇਗੀ ਅਤੇ ਕਹਿ ਨਹੀਂ ਸਕਦੇ ਕਿ ਉਸ ਦਾ ਅੰਤ ਚੰਗੀ ਸੋਚ ਦੀ ਜਿੱਤ ਹੋਵੇਗਾ ਜਾਂ ਕੁੱਝ ਹੋਰ?
Election
11 ਅਪ੍ਰੈਲ ਦੀ ਸੱਭ ਤੋਂ ਵੱਧ ਡਰਾ ਦੇਣ ਵਾਲੀ ਖ਼ਬਰ ਇਹ ਸੀ ਕਿ ਜੋ ਕਾਲੀ ਸਿਆਹੀ ਚੋਣਾਂ ਦੀ ਪਛਾਣ ਹੁੰਦੀ ਹੈ ਤੇ ਜਿਸ ਨੂੰ ਵੋਟਰ ਕਈ ਦਿਨਾਂ ਤਕ ਨਹੀਂ ਉਤਾਰ ਸਕਦਾ, ਉਹ ਸਾਬਣ-ਪਾਣੀ ਨਾਲ ਹੀ ਮਿਟਾਈ ਜਾ ਰਹੀ ਸੀ। ਈ.ਵੀ.ਐਮ. ਨਾਲ ਛੇੜਛਾੜ ਕਰਨ ਦਾ ਡਰ ਤਾਂ ਪਹਿਲਾਂ ਹੀ ਸੀ ਅਤੇ ਹੁਣ ਇਸ ਸਿਆਹੀ ਨੂੰ ਮਿਟਦਿਆਂ ਵੇਖ ਕੇ ਲੋਕਤੰਤਰ ਦੀ ਚੋਣ ਦੀ ਸੱਚਾਈ ਉਤੇ ਸ਼ੱਕ ਹੋਰ ਪੱਕਾ ਹੁੰਦਾ ਜਾਏਗਾ।
Kanhaiya Kumar & Giriraj Singh
ਸਿਆਸਤਦਾਨਾਂ ਦੇ ਇਕ ਤਬਕੇ ਵਿਚ ਅਜਿਹੀ ਘਬਰਾਹਟ ਵੇਖਣ ਨੂੰ ਮਿਲ ਰਹੀ ਹੈ ਜਿਸ ਦਾ ਕਾਰਨ ਸਮਝ ਤੋਂ ਪਰ੍ਹਾਂ ਹੈ। ਇਕ ਘਬਰਾਏ ਹੋਏ ਸ਼ਿਵ ਸੈਨਾ ਦੇ ਆਗੂ ਸੰਜੇ ਰਾਊਤ ਨੇ ਸ਼ਿਵ ਸੈਨਾ ਦੇ ਅਖ਼ਬਾਰ ਸਾਮਨਾ ਵਿਚ ਲਿਖਿਆ ਹੈ ਕਿ ਘਨਈਆ ਕੁਮਾਰ ਨੂੰ ਹਰਾਉਣ ਵਾਸਤੇ ਭਾਜਪਾ ਕੁੱਝ ਵੀ ਕਰੇ ਤੇ ਜੇ ਲੋੜ ਪਵੇ ਤਾਂ ਈ.ਵੀ.ਐਮ. ਨਾਲ ਛੇੜਛਾੜ ਵੀ ਕਰੇ। ਘਨਈਆ ਕੁਮਾਰ, ਜੋ ਕਿ ਨਹਿਰੂ 'ਵਰਸਟੀ ਦਾ ਵਿਦਿਆਰਥੀ ਸੀ ਅਤੇ ਭਾਰਤੀ ਸਮਾਜ ਵਿਚ ਦਲਿਤ ਵਿਰੋਧੀ ਸੋਚ ਤੋਂ ਆਜ਼ਾਦੀ ਮੰਗਣ ਵਾਸਤੇ ਕੇਂਦਰ ਸਰਕਾਰ ਦੀ ਪੂਰੀ ਤਾਕਤ ਅੱਗੇ ਨਹੀਂ ਟੁਟਿਆ ਸੀ, ਉਸ ਨੂੰ ਹੁਣ ਵੋਟਾਂ ਦੀ ਹੇਰਾਫੇਰੀ ਨਾਲ ਹਰਾਉਣ ਦੀ ਸੋਚ ਕਿਉਂ? ਘਨਈਆ ਕੁਮਾਰ ਬੇਗੂਸਰਾਏ ਤੋਂ ਗਿਰੀਰਾਜ ਸਿੰਘ ਵਿਰੁਧ ਚੋਣ ਲੜ ਰਿਹਾ ਹੈ ਅਤੇ ਘਨਈਆ ਕਿਸੇ ਪ੍ਰਵਾਰਵਾਦ ਦਾ ਨਤੀਜਾ ਨਹੀਂ, ਸ਼ਹਿਜ਼ਾਦਾ ਨਹੀਂ, ਉਸ ਉਤੇ ਤਾਂ ਇਕ ਚਾਹ ਵਾਲੇ ਨੂੰ ਪ੍ਰਧਾਨ ਮੰਤਰੀ ਬਣਾਉਣ ਵਾਲੀ ਪਾਰਟੀ ਨੂੰ ਮਾਣ ਹੋਣਾ ਚਾਹੀਦਾ ਹੈ। ਜ਼ਾਹਰ ਹੈ ਕਿ ਬਰਾਬਰੀ ਦੀ ਸੋਚ ਮਨ ਵਿਚੋਂ ਗ਼ਾਇਬ ਹੈ, ਅਤੇ ਘਬਰਾਹਟ ਤੇਜ਼ ਹੋ ਚੁੱਕੀ ਹੈ।
PM Modi, Amit Shah
ਪਿਛਲੇ ਕੁੱਝ ਦਿਨਾਂ ਅੰਦਰ ਭਾਜਪਾ ਦੇ ਤਿੰਨ ਮੁੱਖ ਬੁਲਾਰਿਆਂ ਵਲੋਂ ਇਹੋ ਜਿਹੇ ਬਚਨ ਬੋਲੇ ਗਏ ਜੋ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ਦੀ ਉਲੰਘਣਾ ਤਾਂ ਕਰਦੇ ਹੀ ਹਨ ਪਰ ਨਾਲ ਨਾਲ ਉਨ੍ਹਾਂ ਦੇ ਮਨਾਂ ਵਿਚ ਵਸੇ ਅੰਦਰਲੇ ਡਰ ਨੂੰ ਵੀ ਵਿਖਾਉਂਦੇ ਹਨ। ਅੱਜ ਭਾਜਪਾ ਦਾ ਕੋਈ ਵੀ ਆਗੂ ਵਿਕਾਸ ਦਾ ਨਾਹਰਾ ਨਹੀਂ ਦੇ ਰਿਹਾ। ਕੋਈ ਇਹ ਨਹੀਂ ਆਖ ਰਿਹਾ ਕਿ ਜਿੱਤਾਂਗੇ ਤਾਂ ਬੇਰੁਜ਼ਗਾਰੀ ਦੂਰ ਕਰਾਂਗੇ। 2014 ਵਿਚ ਨਫ਼ਰਤ ਦਾ ਨਾਂ ਵੀ ਨਹੀਂ ਸੀ ਲਿਆ ਗਿਆ ਸੀ, ਸਿਰਫ਼ ਵਿਕਾਸ ਦੀ ਗੱਲ ਕੀਤੀ ਗਈ ਸੀ। ਪਰ ਅੱਜ ਦੇ ਭਾਸ਼ਣ 2015 ਵਿਚ ਭਾਜਪਾ ਅਤੇ ਮਹਾਂਗਠਜੋੜ ਵਿਚ ਬਿਹਾਰ ਦੀ ਜੰਗ ਵਰਗੇ ਜਾਪਦੇ ਹਨ।
Yogi Adityanath
2015 ਵਿਚ ਵੀ ਭਾਜਪਾ ਨੇ ਘਬਰਾਹਟ ਵਿਚ ਮੰਚਾਂ ਤੋਂ ਨਫ਼ਰਤ ਉਗਲੀ ਸੀ ਅਤੇ ਇਸ ਵਾਰ ਅਮਿਤ ਸ਼ਾਹ ਬਦਲੇ ਦੀ ਪੁਕਾਰ ਦਿੰਦੇ ਹਨ, ਯੋਗੀ ਆਦਿਤਿਆਨਾਥ 'ਅਲੀ' ਅਤੇ 'ਬਜਰੰਗਬਲੀ' ਵਿਚਕਾਰ ਚੋਣ ਦਸਦੇ ਹਨ ਪਰ ਸੱਭ ਤੋਂ ਘਾਤਕ ਵਾਰ ਲੋਕਤੰਤਰ ਨੂੰ ਦੇਸ਼ ਦੇ ਪ੍ਰਧਾਨ ਮੰਤਰੀ ਵਲੋਂ ਦਿਤਾ ਗਿਆ ਹੈ ਜਿਨ੍ਹਾਂ ਵਾਰ ਵਾਰ ਮੰਚਾਂ ਤੋਂ ਆਖਿਆ ਹੈ ਕਿ ਉਨ੍ਹਾਂ ਨੂੰ ਬਾਲਾਕੋਟ ਦੇ ਫ਼ੌਜੀਆਂ ਦੇ ਨਾਂ ਤੇ ਵੋਟ ਪਾਉ। ਦੇਸ਼ ਨੂੰ ਧਰਮ ਅਤੇ ਡਰ ਦੀ ਸੂਲੀ ਉਤੇ ਚੜ੍ਹਾਉਣ ਵਾਲੇ, ਸਿਰਫ਼ ਭਾਸ਼ਣਾਂ ਰਾਹੀਂ ਹੀ ਨਹੀਂ, ਬਲਕਿ ਹਰ ਮਾਧਿਅਮ ਰਾਹੀਂ ਲੋਕਤੰਤਰ ਦੇ ਨਿਯਮਾਂ ਦੀ ਉਲੰਘਣਾ ਕਰ ਰਹੇ ਹਨ। ਪੁਲਿਸ ਮੁਲਾਜ਼ਮਾਂ ਦੇ ਖਾਣੇ ਉਪਰ 'ਨਮੋ' ਛਪਵਾ ਕੇ ਵੰਡਿਆ ਗਿਆ। ਸਰਕਾਰ ਦੇ ਪੈਸੇ ਅਤੇ ਪੁਲਿਸ ਮੁਲਾਜ਼ਮਾਂ ਦੇ ਖਾਣੇ ਨੂੰ ਪ੍ਰਧਾਨ ਮੰਤਰੀ ਵਲੋਂ ਲੰਗਰ ਬਣਾ ਦਿਤਾ ਗਿਆ। 'ਨਮੋ ਟੀ.ਵੀ.' ਉਤੇ ਪ੍ਰਧਾਨ ਮੰਤਰੀ ਦਾ ਪ੍ਰਚਾਰ, ਚੋਣ ਕਮਿਸ਼ਨ ਦੀ ਰੋਕ ਤੋਂ ਬਾਅਦ ਵੀ ਜਾਰੀ ਹੈ।
Lok Sabha Election
ਕੀ ਇਹ ਸਾਰਾ ਕੁੱਝ ਇਹ ਦਰਸਾਉਂਦਾ ਹੈ ਕਿ ਭਾਜਪਾ ਏਨੀ ਘਬਰਾਈ ਹੋਈ ਹੈ ਕਿ ਉਹ ਹਰ ਕਾਨੂੰਨ ਨੂੰ ਤੋੜ ਕੇ ਜਿੱਤਣ ਦੀ ਕੋਸ਼ਿਸ਼ ਕਰ ਰਹੀ ਹੈ? ਕੀ ਭਾਰਤ ਦਾ ਅਗਲਾ ਪ੍ਰਧਾਨ ਮੰਤਰੀ ਲੋਕਤੰਤਰ ਦੀ ਚੋਣ ਨੂੰ ਤੋੜ-ਮਰੋੜ ਕੇ ਦੇਸ਼ ਦੀ ਅਗਵਾਈ ਕਰੇਗਾ? ਅੱਜ ਚੋਣ ਕਮਿਸ਼ਨ ਨੂੰ ਸਖ਼ਤ ਹੋਣ ਵਿਚ ਫੁਰਤੀ ਵਿਖਾਉਣ ਦੀ ਜ਼ਰੂਰਤ ਹੈ। ਨਫ਼ਰਤ ਦੇ ਭਾਸ਼ਣ, ਕਾਨੂੰਨਾਂ ਦੀ ਉਲੰਘਣਾ, ਸਿਆਹੀ ਵਿਚ ਮਿਲਾਵਟ ਅਤੇ ਅਨੇਕਾਂ ਹੋਰ ਪੈਂਤੜੇ ਅਪਨਾਉਣ ਤੋਂ ਬਾਅਦ ਮਿਲੀ ਜਿੱਤ ਕੀ ਲੋਕਤੰਤਰ ਦੀ ਸਫ਼ਲਤਾ ਮੰਨੀ ਜਾਵੇਗੀ? ਕੀ ਲੋਕ ਇਨ੍ਹਾਂ ਪੈਂਤੜਿਆਂ ਨੂੰ ਸਮਝ ਪਾ ਰਹੇ ਹਨ ਜਾਂ ਕੀ ਉਹ ਇਸ ਦਾ ਜਵਾਬ ਵੀ ਦੇਣਗੇ? - ਨਿਮਰਤ ਕੌਰ
