ਇਸ ਮੌਕੇ ਖਿਡਾਰੀਆਂ ਦੇ ਪਰਿਵਾਰ ਵੀ ਮੌਜੂਦ ਸਨ

ਸਸਕੈਚਵਾਨ— 6 ਅਪ੍ਰੈਲ 2018 ਨੂੰ ਕੈਨੇਡਾ ਦੇ ਸੂਬੇ ਸਸਕੈਚਵਾਨ 'ਚ ਹਾਕੀ ਖਿਡਾਰੀਆਂ ਦੀ ਬੱਸ ਹਾਦਸੇ ਦੀ ਸ਼ਿਕਾਰ ਹੋ ਗਈ ਸੀ। ਬੱਸ ਦੀ ਟੱਕਰ ਸੈਮੀ ਟਰੱਕ ਨਾਲ ਹੋਣ ਕਾਰਨ 6 ਲੋਕਾਂ ਸਮੇਤ 10 ਖਿਡਾਰੀਆਂ ਦੀ ਮੌਤ ਹੋ ਗਈ ਸੀ ਅਤੇ 13 ਹੋਰ ਜ਼ਖਮੀ ਹੋ ਗਏ ਸਨ। ਬੱਸ ਹਾਦਸੇ ਵਿਚ ਮਰਨ ਵਾਲੇ ਖਿਡਾਰੀਆਂ ਦੀ ਉਮਰ 18 ਤੋਂ 21 ਸਾਲ ਵਿਚਾਲੇ ਸੀ। ਜ਼ਿਕਰਯੋਗ ਹੈ ਕਿ ਖਿਡਾਰੀਆਂ ਦੀ ਬੱਸ ਸਸਕੈਚਵਾਨ ਦੇ ਨੇਪਾਵਿਨ ਜਾ ਰਹੀ ਸੀ ਅਤੇ ਹਾਈਵੇਅ 'ਤੇ ਹਾਦਸੇ ਦੀ ਸ਼ਿਕਾਰ ਹੋ ਗਈ। ਬੀਤੇ ਸ਼ੁੱਕਰਵਾਰ ਨੂੰ ਸਸਕੈਚਵਾਨ ਦੇ ਸ਼ਹਿਰ ਸਸਕਾਟੂਨ 'ਚ ਮੌਜੂਦਾ ਅਤੇ ਸਾਬਕਾ ਨੈਸ਼ਨਲ ਹਾਕੀ ਲੀਗ ਦੇ ਖਿਡਾਰੀਆਂ ਅਤੇ ਕੈਨੇਡੀਅਨ ਸੰਗੀਤਕਾਰਾਂ ਨੇ ਬੱਸ ਹਾਦਸੇ ਵਿਚ ਮਾਰੇ ਗਏ ਹੁਮਬੋਲਟ ਬਰੋਨਕੋਸ ਜੂਨੀਅਰ ਹਾਕੀ ਟੀਮ ਦੇ ਖਿਡਾਰੀਆਂ ਨੂੰ ਭਾਵੁਕ ਸ਼ਰਧਾਂਜਲੀ ਭੇਟ ਕੀਤੀ ਗਈ। ਇਸ ਮੌਕੇ ਤਕਰੀਬਨ 10,000 ਲੋਕ ਸ਼ਰਧਾਂਜਲੀ ਦੇਣ ਲਈ ਮੌਜੂਦ ਰਹੇ।

Saskatchewan crash

ਕੈਨੇਡਾ ਦੇ ਸੰਗੀਤਕਾਰ ਡੱਲਾਸ ਸਮਿੱਥ, ਬਰਿਟ ਕਿਸਲ, ਜੈਸ ਮਾਸਕਾਲਯੂਕੇ ਅਤੇ ਗੋਰਡ ਬੈਮਫੋਰਡ ਨੇ ਸਟੇਜ 'ਤੇ ਪੇਸ਼ਕਾਰੀ ਕੀਤੀ ਅਤੇ ਖਿਡਾਰੀਆਂ ਨੂੰ ਯਾਦ ਕੀਤਾ। ਗਾਇਕਾ ਜੈਸ ਨੇ ਇਸ ਹਾਦਸੇ ਬਾਰੇ ਬੋਲਦੇ ਹੋਏ ਕਿਹਾ ਕਿ ਇਸ ਹਾਦਸੇ ਨੇ ਹਰ ਇਕ ਦੇ ਦਿਲ ਨੂੰ ਝੰਜੋੜ ਦਿੱਤਾ ਹੈ ਅਤੇ ਹਰ ਪਾਸੇ ਉਦਾਸੀ ਹੈ। ਹਰ ਸ਼ਖਸ ਉਸ ਦਰਦ ਨੂੰ ਮਹਿਸੂਸ ਕਰ ਰਿਹਾ ਹੈ। ਇਸ ਮੌਕੇ ਖਿਡਾਰੀਆਂ ਦੇ ਪਰਿਵਾਰ ਵੀ ਮੌਜੂਦ ਸਨ, ਜਿਹਨਾ ਨੂੰ ਖਿਡਾਰੀਆਂ ਅਤੇ ਸੰਗੀਤਕਾਰਾਂ ਵਲੋਂ ਹੌਂਸਲਾ ਅਤੇ ਦਿਲਾਸਾ ਦਿੱਤਾ ਗਿਆ।