ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਨੇ ਐਤਵਾਰ ਨੂੰ ਇਕ ਪ੍ਰਸਤਾਵ ਪਾਸ ਕਰ ਕੇ ਉੱਤਰ ਕੋਰੀਆ ਉਤੇ ਨਵੀਂ ਪਾਬੰਦੀ ਲਗਾਉਣ ਦਾ ਫ਼ੈਸਲਾ ਕੀਤਾ ਹੈ। ਇਹ ਕਾਰਵਾਈ ਉੱਤਰ ਕੋਰੀਆ ਵਲੋਂ

ਸੰਯੁਕਤ ਰਾਸ਼ਟਰ, 6 ਅਗੱਸਤ : ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਨੇ ਐਤਵਾਰ ਨੂੰ ਇਕ ਪ੍ਰਸਤਾਵ ਪਾਸ ਕਰ ਕੇ ਉੱਤਰ ਕੋਰੀਆ ਉਤੇ ਨਵੀਂ ਪਾਬੰਦੀ ਲਗਾਉਣ ਦਾ ਫ਼ੈਸਲਾ ਕੀਤਾ ਹੈ। ਇਹ ਕਾਰਵਾਈ ਉੱਤਰ ਕੋਰੀਆ ਵਲੋਂ ਜੁਲਾਈ 'ਚ ਦੋ ਵਾਰ ਇੰਟਰ ਬੈਲਿਸਟਿਕ ਮਿਜ਼ਾਈਲ ਦਾ ਟੈਸਟ ਕਰਨ ਲਈ ਲਗਾਈ ਗਈ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਨਵੀਂ ਪਾਬੰਦੀ ਦਾ ਅਸਰ ਉਸ ਦੇ 3 ਅਰਬ ਡਾਲਰ (ਲਗਭਗ 19 ਹਜ਼ਾਰ ਕਰੋੜ) ਦੇ ਸਾਲਾਨਾ ਕਾਰੋਬਾਰ 'ਤੇ ਪਵੇਗਾ।
ਨਿਊਜ਼ ਏਜੰਸੀ ਮੁਤਾਬਕ ਸੁਰੱਖਿਆ ਪ੍ਰੀਸ਼ਦ ਨੇ ਉੱਤਰ ਕੋਰੀਆ ਦੇ ਵਪਾਰ 'ਤੇ ਪਾਬੰਦੀ ਲਗਾਉਣ ਅਤੇ ਉਥੇ ਨਿਵੇਸ਼ ਦੀ ਸੀਮਾ ਤੈਅ ਕਰਨ ਦੇ ਇਸ ਪ੍ਰਸਤਾਵ ਨੂੰ ਇਕਮਤ ਨਾਲ ਪਾਸ ਕਰ ਦਿਤਾ। ਇਹ ਪ੍ਰਸਤਾਵ ਕਈ ਦੇਸ਼ਾਂ ਨੂੰ ਵਿਦੇਸ਼ਾਂ 'ਚ ਕੰਮ ਕਰ ਰਹੇ ਉੱਤਰ ਕੋਰੀਆਈ ਮਜ਼ਦੂਰਾਂ ਦੀ ਮੌਜੂਦਾ ਗਿਣਤੀ 'ਚ ਵਾਧਾ ਕਰਨ ਤੋਂ ਰੋਕਦਾ ਹੈ। ਇਸ ਤੋਂ ਇਲਾਵਾ ਇਸ ਪ੍ਰਸਤਾਵ ਤਹਿਤ ਉੱਤਰ ਕੋਰੀਆ ਨਾਲ ਨਵੇਂ ਜੁਆਇੰਟ ਵੇਂਚਰਜ਼ ਦੀ ਸ਼ੁਰੂਆਤ ਕਰਨ ਅਤੇ ਮੌਜੂਦਾ ਜੁਆਇੰਟ ਵੇਂਚਰਜ਼ ਵਿਚ ਕਿਸੇ ਵੀ ਤਰ੍ਹਾਂ ਦੇ ਨਿਵੇਸ਼ 'ਤੇ ਰੋਕ ਲਗਾਈ ਗਈ ਹੈ।
ਚੀਨ ਨਾਲ ਤਕਰੀਬਨ ਇਕ ਮਹੀਨੇ ਦੀ ਗੱਲਬਾਤ ਤੋਂ ਬਾਅਦ ਅਮਰੀਕਾ ਨੇ ਇਸ ਪ੍ਰਸਤਾਵ ਦਾ ਮਸੌਦਾ ਤਿਆਰ ਕੀਤਾ ਸੀ। ਚੀਨ, ਉੱਤਰੀ ਕੋਰੀਆ ਦਾ ਸਭ ਤੋਂ ਵੱਡਾ ਵਪਾਰ ਸਹਿਯੋਗੀ ਹੈ। ਇਨ੍ਹਾਂ ਪਾਬੰਦੀਆਂ ਦਾ ਮਸੌਦਾ 4 ਜੁਲਾਈ ਨੂੰ ਉੱਤਰੀ ਕੋਰੀਆ ਵਲੋਂ ਕੀਤੇ ਗਏ ਅੰਤਰ ਮਹਾਂਦੀਪ ਬੈਲਿਸਟਿਕ ਮਿਜ਼ਾਈਲ ਪਰੀਖਣ ਤੋਂ ਬਾਅਦ ਤਿਆਰ ਕੀਤਾ ਗਿਆ ਸੀ ਪਰ ਜਦੋਂ ਤਕ ਮਸੌਦੇ ਨੇ ਆਖਰੀ ਰੂਪ ਲਿਆ, ਉਦੋਂ ਤਕ 28 ਜੁਲਾਈ ਨੂੰ ਉੱਤਰੀ ਕੋਰੀਆ ਨੇ ਇਕ ਹੋਰ ਮਿਜ਼ਾਈਲ ਪ੍ਰੀਖਣ ਕਰ ਦਿਤਾ ਸੀ। ਹਾਲਾਂਕਿ ਇਨ੍ਹਾਂ ਪਾਬੰਦੀਆਂ ਦੇ ਬਾਵਜੂਦ ਉੱਤਰੀ ਕੋਰੀਆ ਦੇ ਵਿਵਹਾਰ 'ਚ ਕੋਈ ਬਦਲਾਅ ਨਹੀਂ ਆਇਆ ਹੈ।
ਜ਼ਿਕਰਯੋਗ ਹੈ ਕਿ ਫ਼ਰਵਰੀ 'ਚ ਉੱਤਰ ਕੋਰੀਆ ਨੇ 500 ਕਿਲੋਮੀਟਰ ਤਕ ਨਿਸ਼ਾਨਾ ਲਗਾਉਣ ਵਾਲੀ ਮਿਜ਼ਾਈਲ ਦਾ ਪ੍ਰੀਖਣ ਕੀਤਾ ਸੀ। ਬਿਆਨ 'ਚ ਇਹ ਵੀ ਕਿਹਾ ਗਿਆ ਸੀ ਕਿ ਉੱਤਰ ਕੋਰੀਆ ਦੇ ਮਿਜ਼ਾਈਲ ਟੈਸਟ ਦਾ ਉਦੇਸ਼ ਪ੍ਰਮਾਣੂ ਅਤੇ ਮਿਜ਼ਾਈਲ ਸ਼ਕਤੀ ਨੂੰ ਵਿਖਾਉਣਾ ਹੈ। ਪਿਛਲੇ ਸਾਲ ਅਕਤੂਬਰ 'ਚ ਉੱਤਰ ਕੋਰੀਆ ਨੇ ਬੈਂਗਯੋਨ ਏਅਰਬੇਸ ਤੋਂ ਹੀ ਮੁਸੁਦਨ ਮਿਜ਼ਾÂਲ ਦੇ ਦੋ ਟੈਸਟ ਕੀਤੇ ਸਨ। ਸਾਲ 2016 'ਚ ਉੱਤਰ ਕੋਰੀਆ ਨੇ ਦੋ ਨਿਊਕਲੀਅਰ ਟੈਸਟ ਕੀਤੇ ਸਨ। ਇਸ 'ਚ ਇਕ ਹਾਈਡ੍ਰੋਜਨ ਬੰਬ ਦਾ ਟੈਸਟ ਵੀ ਸ਼ਾਮਲ ਹੈ। ਹੁਣ ਤਕ ਉੱਤਰ ਕੋਰੀਆ ਪੰਜ ਨਿਊਕਲੀਅਰ ਟੈਸਟ ਕਰ ਚੁੱਕਾ ਹੈ। (ਪੀਟੀਆਈ)