ਰਖਿਆ ਮੰਤਰੀ ਵਾਲਟਰ ਅਸਟੂਡੀਲੋ ਨੇ ਦਿਤੀ ਜਾਣਕਾਰੀ
ਉਤਰ-ਪੱਛਮੀ ਪੇਰੂ ਵਿਚ ਇਕ ਸ਼ਾਪਿੰਗ ਮਾਲ ਦੇ ‘ਫ਼ੂਡ ਕੋਰਟ’ ਦੀ ਛੱਤ ਡਿੱਗਣ ਨਾਲ 6 ਲੋਕਾਂ ਦੀ ਮੌਤ ਹੋ ਗਈ ਅਤੇ ਘੱਟੋ-ਘੱਟ 78 ਹੋਰ ਲੋਕ ਜ਼ਖ਼ਮੀ ਹੋ ਗਏ। ਦੇਸ਼ ਦੇ ਰਖਿਆ ਮੰਤਰੀ ਨੇ ਇਹ ਜਾਣਕਾਰੀ ਦਿਤੀ। ‘ਫ਼ੂਡ ਕੋਰਟ’ ਮਾਲ ਵਿਚ ਉਹ ਜਗ੍ਹਾ ਹੁੰਦੀ ਹੈ, ਜਿਥੇ ਕਈ ਤਰ੍ਹਾਂ ਦੇ ਰੈਸਟੋਰੈਂਟ ਅਤੇ ਖਾਣ-ਪੀਣ ਦੀਆਂ ਦੁਕਾਨਾਂ ਹੁੰਦੀਆਂ ਹਨ।
ਸ਼ੁੱਕਰਵਾਰ ਰਾਤ ਨੂੰ ਲਾ ਲਿਬਰਟਾਡ ਖੇਤਰ ਦੇ ਟਰੂਜਿਲੋ ਸ਼ਹਿਰ ਵਿਚ ‘ਰੀਅਲ ਪਲਾਜ਼ਾ ਟਰੂਜਿਲੋ’ ਸ਼ਾਪਿੰਗ ਮਾਲ ਦੀ ਇਕ ਭਾਰੀ ਲੋਹੇ ਦੀ ਛੱਤ ਉਥੇ ਮੌਜੂਦ ਲੋਕਾਂ ’ਤੇ ਡਿੱਗ ਗਈ। ਰਖਿਆ ਮੰਤਰੀ ਵਾਲਟਰ ਅਸਟੂਡੀਲੋ ਨੇ ਸਨਿਚਰਵਾਰ ਨੂੰ ਪੱਤਰਕਾਰਾਂ ਨੂੰ ਦਸਿਆ ਕਿ ‘ਲਾ ਲਿਬਰਟਾਡ’ ਵਿਚ ਸਥਾਨਕ ਫ਼ਾਇਰ-ਫ਼ਾਈਟਰਾਂ ਦੁਆਰਾ ਦਿਤੀ ਗਈ
ਜਾਣਕਾਰੀ ਅਨੁਸਾਰ ਇਮਾਰਤ ਢਹਿ ਜਾਣ ਤੋਂ ਬਾਅਦ 5 ਲੋਕਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਅਤੇ 1 ਹੋਰ ਵਿਅਕਤੀ ਦੀ ਹਸਪਤਾਲ ਵਿਚ ਮੌਤ ਹੋ ਗਈ। ਅਸਟੂਡੀਲੋ ਨੇ ਕਿਹਾ ਕਿ ਜਿਨ੍ਹਾਂ ਵਿਚੋਂ ਤਿੰਨ ਦੀ ਹਾਲਤ ਗੰਭੀਰ ਹੈ। ਮੰਤਰੀ ਨੇ ਪੀੜਤਾਂ ਦੇ ਪਰਵਾਰਾਂ ਪ੍ਰਤੀ ਹਮਦਰਦੀ ਪ੍ਰਗਟ ਕੀਤੀ ਹੈ। ਸਥਾਨਕ ਫ਼ਾਇਰ ਵਿਭਾਗ ਦੇ ਮੁਖੀ ਲੁਈਸ ਰੌਨਕਲ ਨੇ ਕਿਹਾ ਕਿ ਬਚਾਅ ਅਤੇ ਰਾਹਤ ਕਾਰਜ ਜਾਰੀ ਹਨ।
ਇਸ ਦੌਰਾਨ ਟਰੂਜਿਲੋ ਦੇ ਮੇਅਰ ਮਾਰੀਓ ਰੇਯਨਾ ਨੇ ਆਉਣ ਵਾਲੇ ਜੋਖ਼ਮ ਦੇ ਕਾਰਨ ਮਾਲ ਬੰਦ ਕਰਨ ਦਾ ਐਲਾਨ ਕੀਤਾ।
