ਇਰਾਨ ਸਰਹਦ ਨਾਲ ਲੱਗੇ ਪਾਕਿਸਤਾਨ ਦੇ ਅਸ਼ਾਂਤ ਬਲੋਚਿਸਤਾਨ ਸੂਬੇ ਵਿਚ ਦੋ ਅਲਗ-ਅਲਗ ਘਟਨਾਵਾਂ ਵਿਚ ਅੱਤਵਾਦੀਆਂ ਨੇ ਪਾਕਿਸਤਾਨ.......
ਕਰਾਚੀ : ਇਰਾਨ ਸਰਹਦ ਨਾਲ ਲੱਗੇ ਪਾਕਿਸਤਾਨ ਦੇ ਅਸ਼ਾਂਤ ਬਲੋਚਿਸਤਾਨ ਸੂਬੇ ਵਿਚ ਦੋ ਅਲਗ-ਅਲਗ ਘਟਨਾਵਾਂ ਵਿਚ ਅੱਤਵਾਦੀਆਂ ਨੇ ਪਾਕਿਸਤਾਨ ਦੇ 6 ਸੈਨਿਕਾਂ ਦਾ ਕਤਲ ਕਰ ਦਿਤਾ। ਪਹਿਲੀ ਘਟਨਾ ਪਹਾੜੀ ਪੰਜਗੁਰ ਸੂਬੇ ਵਿਚ ਹੋਈ ਜਿਥੇ ਅੱਤਵਾਦੀਆਂ ਨੇ ਫ਼ਰੰਟੀਅਰ ਕੋਰ ਦੇ ਚਾਰ ਸੈਨਿਕਾਂ ਦਾ ਕਤਲ ਕਰ ਦਿਤਾ। ਇਸ ਘਟਨਾ ਤੋਂ ਕੁਝ ਘੰਟੇ ਪਹਿਲਾਂ ਈਰਾਨ ਸਰਹਦ ਨੇੜੇ ਲੋਰਾਈ 'ਚ ਐਫਸੀ ਦੇ ਦੋ ਸੈਨਿਕਾਂ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿਤੀ ਗਈ ਸੀ। ਬਲੋਚਿਸਤਾਨ ਦੇ ਮੁੱਖ ਮੰਤਰੀ ਜਾਮ ਮਦਾਦ ਖਾਨ ਨੇ ਕਿਹਾ ਕਿ ਅੱਤਵਾਦੀਆਂ ਨੇ ਉਸ ਵੇਲੇ ਹਮਲਾ ਕੀਤਾ ਜਦੋਂ ਸੀਮਾ ਚੌਂਕੀ 'ਤੇ ਗਾਰਡ ਬਦਲ ਰਹੇ ਸਨ।
ਬਲੂਚਿਸਤਾਨ ਸੂਬੇ ਦੀ ਸਰਹਦ ਇਰਾਨ ਅਤੇ ਅਫ਼ਗਾਨਿਸਤਾਨ ਨਾਲ ਲਗਦੀ ਹੈ। ਉਨ੍ਹਾਂ ਕਿਹਾ, ''ਇਹ ਬਲੂਚਿਸਤਾਨ ਅਤੇ ਇਥੇ ਚਲ ਰਹੀਆਂ ਵਿਕਾਸ ਯੋਜਨਾਵਾਂ ਵਿਰੁਧ ਇਕ ਸਾਜ਼ਿਸ਼ ਹੈ।'' ਇਰਾਨੀ ਰੈਵੋਲੀਉਸ਼ਨਰੀ ਗਾਰਡ ਦੇ ਪ੍ਰਮੁਖ ਮੇਜਰ ਜਨਰਲ ਮੁਹੰਮਦ ਅਲੀ ਜਾਫਰੀ ਨੇ ਪਿਛਲੇ ਦਿਨੀਂ ਪਾਕਿਸਤਾਨ ਨੂੰ ਕਿਹਾ ਸੀ ਕਿ ਉਹ ਉਸ ਪ੍ਰਮਿਬੰਧਤਾ ਅੱਤਵਾਦੀ ਸੰਗਠਨ ਵਿਰੁਧ ਕਾਰਵਾਈ ਕਰੇ, ਜਿਸਨੇ ਬਲੋਚਿਸਤਾਨ ਨਾਲ ਲਗਦੇ ਇਰਾਨ ਦੇ ਦਖਣੀ-ਪੂਰਬੀ ਖੇਤਰ ਵਿਚ 27 ਸੈਨਿਕਾਂ ਨੂੰ ਮਾਰ ਦਿਤਾ ਸੀ। ਪਾਕਿਸਤਾਨ ਵਿਦੇਸ਼ ਮੰਤਰਾਲੇ ਨੇ ਇਨ੍ਹਾਂ ਦੋਸ਼ਾਂ ਨੂੰ ਖਾਰਜ ਕਰ ਦਿਤਾ ਹੈ। (ਪੀਟੀਆਈ)
