ਇਹ ਸਮਾਰੋਹ ਸੋਮਵਾਰ ਸ਼ਾਮ ਨੂੰ ਵੈਸਟਮਿੰਸਟਰ ਪੈਲੇਸ ਦੇ ਅੰਦਰ ਸਥਿਤ ਸਪੀਕਰ ਹਾਊਸ ਦੇ ਸਟੇਟ ਰੂਮ ਵਿਚ ਆਯੋਜਿਤ ਕੀਤਾ ਗਿਆ ਸੀ।
ਲੰਡਨ: ਦੀਵਾਲੀ ਦੇ ਤਿਉਹਾਰ ਮੌਕੇ ਬਰਤਾਨੀਆ ਦੇ ਸੰਸਦ ਕੰਪਲੈਕਸ ਵਿਚ ਹਰੇ ਕ੍ਰਿਸ਼ਨ ਮੰਦਰ ਦੇ ਪੁਜਾਰੀਆਂ ਨੇ ਮੋਮਬੱਤੀਆਂ ਜਗਾਈਆਂ ਅਤੇ ਸ਼ਾਂਤੀ ਲਈ ਪ੍ਰਾਰਥਨਾਵਾਂ ਕੀਤੀਆਂ। ਇਹ ਸਮਾਰੋਹ ਸੋਮਵਾਰ ਸ਼ਾਮ ਨੂੰ ਵੈਸਟਮਿੰਸਟਰ ਪੈਲੇਸ ਦੇ ਅੰਦਰ ਸਥਿਤ ਸਪੀਕਰ ਹਾਊਸ ਦੇ ਸਟੇਟ ਰੂਮ ਵਿਚ ਆਯੋਜਿਤ ਕੀਤਾ ਗਿਆ ਸੀ।
ਸੰਸਦ ਕੰਪਲੈਕਸ ਵਿਚ ਆਯੋਜਿਤ ਦੀਵਾਲੀ ਪ੍ਰੋਗਰਾਮ ਵਿਚ ਵੱਖ-ਵੱਖ ਰਾਜਨੀਤਿਕ ਪਾਰਟੀਆਂ ਦੇ ਸੰਸਦ ਮੈਂਬਰਾਂ, ਡਿਪਲੋਮੈਟਾਂ, ਭਾਈਚਾਰੇ ਦੇ ਨੇਤਾਵਾਂ ਅਤੇ ਅੰਤਰਰਾਸ਼ਟਰੀ ਸੁਸਾਇਟੀ ਫਾਰ ਕ੍ਰਿਸ਼ਨਾ ਚੇਤਨਾ (ਇਸਕੋਨ) ਦੇ ਨੁਮਾਇੰਦਿਆਂ ਨੇ ਸ਼ਿਰਕਤ ਕੀਤੀ। ਕਾਮਨਜ਼ ਦੇ ਪ੍ਰਧਾਨ ਸਰ ਲਿੰਡਸੇ ਹੋਇਲ ਨੇ ਕਿਹਾ, "ਮੈਂ ਇੱਥੇ ਅਤੇ ਦੁਨੀਆ ਭਰ ਦੇ ਸਾਰੇ ਭਾਈਚਾਰਿਆਂ ਨੂੰ ਸ਼ਾਂਤੀ ਅਤੇ ਖੁਸ਼ੀ ਨਾਲ ਦੀਵਾਲੀ ਮਨਾਉਣ ਦੀ ਕਾਮਨਾ ਕਰਦਾ ਹਾਂ।"
ਵਿਰੋਧੀ ਲੇਬਰ ਪਾਰਟੀ ਦੇ ਨੇਤਾ ਸਰ ਕੀਰ ਸਟਾਰਮਰ, ਭਗਤੀਵੇਦਾਂਤ ਮਨੋਰ ਇਸਕੋਨ ਮੰਦਰ ਦੀ ਚੇਅਰਪਰਸਨ ਵਿਸ਼ਾਖਾ ਦਾਸੀ, ਭਾਰਤੀ ਮੂਲ ਦੇ ਲੇਬਰ ਸੰਸਦ ਵੀਰੇਂਦਰ ਸ਼ਰਮਾ ਅਤੇ ਲਿਬਰਲ ਡੈਮੋਕ੍ਰੇਟ ਹਾਊਸ ਆਫ ਲਾਰਡਸ ਦੇ ਸਹਿਯੋਗੀ ਨਵਨੀਤ ਢੋਲਕੀਆ ਨੇ ਪ੍ਰਾਰਥਨਾ ਨਾਲ ਮੋਮਬੱਤੀਆਂ ਜਗਾਈਆਂ।
ਭਾਰਤੀ ਮੂਲ ਦੇ ਕੰਜ਼ਰਵੇਟਿਵ ਪਾਰਟੀ ਦੇ ਸੰਸਦ ਮੈਂਬਰ ਅਤੇ ਸਮਾਗਮ ਦੇ ਸਹਿ-ਹੋਸਟ ਸ਼ੈਲੇਸ਼ ਵਾਰਾ ਨੇ ਕਿਹਾ, “ਸਪੀਕਰ ਦੇ ਸਟੇਟ ਰੂਮ ਵਿਚ ਆਉਣਾ ਸ਼ਾਨਦਾਰ ਹੈ। ਇਹ ਬ੍ਰਿਟੇਨ ਦੀ ਵਿਭਿੰਨਤਾ ਹੈ ਕਿ ਅਸੀਂ ਇੱਥੇ ਵੈਸਟਮਿੰਸਟਰ ਪੈਲੇਸ ਵਿਚ ਹਿੰਦੂ ਕੈਲੰਡਰ ਦਾ ਸਭ ਤੋਂ ਮਹੱਤਵਪੂਰਨ ਤਿਉਹਾਰ ਦੀਵਾਲੀ ਮਨਾ ਰਹੇ ਹਾਂ।" ਉਹਨਾਂ ਕਿਹਾ, “ਇੱਥੇ ਰਹਿੰਦੇ 1.6 ਮਿਲੀਅਨ ਬ੍ਰਿਟਿਸ਼-ਭਾਰਤੀਆਂ ਲਈ ਇਹ ਇਕ ਮਹੱਤਵਪੂਰਨ ਸੰਦੇਸ਼ ਹੈ। ਇਹ ਸਾਡੀ ਵਿਭਿੰਨਤਾ ਬਾਰੇ ਬਾਕੀ ਦੁਨੀਆ ਲਈ ਇਕ ਸੰਦੇਸ਼ ਵੀ ਹੈ।"
