representational Image
ਹਮਲੇ ’ਚ ਤਿੰਨ ਫ਼ੌਜੀਆਂ ਅਤੇ ਇਕ ਬੱਚੇ ਦੀ ਮੌਤ ਹੋ ਗਈ
ਪੇਸ਼ਾਵਰ: ਪਾਕਿਸਤਾਨ ਦੇ ਉਤਰੀ-ਪੂਰਬੀ ਹਿੱਸੇ ’ਚ ਸਥਿਤ ਇਕ ਸੁਰਖਿਆ ਚੌਕੀ ’ਤੇ ਬੁਧਵਾਰ ਨੂੰ ਹੋਏ ਖ਼ੁਦਕੁਸ਼ ਹਮਲੇ ’ਚ ਤਿੰਨ ਫ਼ੌਜੀਆਂ ਅਤੇ ਇਕ ਬੱਚੇ ਦੀ ਮੌਤ ਹੋ ਗਈ। ਪੁਲਿਸ ਨੇ ਇਹ ਜਾਣਕਾਰੀ ਦਿਤੀ। ਜ਼ਿਲ੍ਹਾ ਪੁਲਿਸ ਅਧਿਕਾਰੀ (ਡੀ.ਪੀ.ਓ.) ਸਲੀਮ ਰਿਆਜ਼ ਨੇ ਦਸਿਆ ਕਿ ਆਤਮਘਾਤੀ ਹਮਲਾ ਅਫ਼ਗਾਨਿਸਤਾਨ ਦੀ ਸਰਹੱਣ ਨਾਲ ਜੁੜੇ ਖੈਬਰ ਪਖਤੂਨਵਾ ਸੂਬੇ ਦੇ ਉੱਤਰੀ ਵਜ਼ੀਰੀਸਤਾਨ ਕਬੀਲਾਈ ਜ਼ਿਲ੍ਹੇ ਦੇ ਬਾਨੂ-ਮਿਰਾਨ ਸ਼ਾਹ ਰੋਡ ’ਤੇ ਸਥਿਤ ਹਮੀਦੁੱਲਾ ਸ਼ਹੀਦ ਸੁਰਖਿਆ ਚੌਕੀ ’ਤੇ ਹੋਇਆ।
ਉਨ੍ਹਾਂ ਕਿਹਾ ਕਿ ਆਤਮਘਾਤੀ ਹਮਲੇ ’ਚ ਸੁਰਖਿਆ ਚੌਕੀ ਪੂਰੀ ਤਰ੍ਹਾਂ ਤਬਾਹ ਹੋ ਗਈ ਅਤੇ ਨੀਮ-ਫੌਜੀ ਫ਼ੋਰਸ ਫਰੰਟੀਅਰ ਕੋਰ (ਐਫ਼.ਸੀ.) ਦੇ ਤਿੰਨ ਫ਼ੌਜੀ ਅਤੇ ਇਕ ਬੱਚੇ ਦੀ ਮੌਤ ਹੋ ਗਈ। ਹਮਲੇ ’ਚ 10 ਗ਼ੈਰਫ਼ੌਜੀ ਨਾਗਰਿਕ ਜ਼ਖ਼ਮੀ ਹੋਏ ਹਨ। ਅਜੇ ਤਕ ਕਿਸੇ ਜਥੇਬੰਦੀ ਨੇ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਸੁਰਖਿਆ ਫ਼ੋਰਸਾਂ ਨੇ ਜ਼ਿੰਮੇਵਾਰ ਲੋਕਾਂ ਦੀ ਭਾਲ ’ਚ ਮੁਹਿੰਮ ਸ਼ੁਰੂ ਕਰ ਦਿਤੀ ਹੈ।
