ਸੂਬਾ ਸਰਕਾਰਾਂ ਤੇ ਆਸਟਰੇਲੀਆਈ ਯੂਨੀਵਰਸਿਟੀਆਂ ਤੋਂ ਮਿਲੇਗੀ ਵਿੱਤੀ ਮਦਦ
ਪਰਥ, 30 ਅਪ੍ਰੈਲ (ਪਿਆਰਾ ਸਿੰਘ ਨਾਭਾ) : ਆਸਟਰੇਲੀਆ ਵਿਚ ਕੋਰੋਨਾ ਵਾਇਰਸ ਦਾ ਪ੍ਰਕੋਪ ਫੈਲਣ ਸਮੇਂ 565,000 ਤੋਂ ਵੱਧ ਕੌਮਾਂਤਰੀ ਵਿਦਿਆਰਥੀ ਸਨ, ਜਿਨ੍ਹਾਂ ਵਿਚੋਂ ਬਹੁਤ ਸਾਰੇ ਮਹਾਂਮਾਰੀ ਦੇ ਕਾਰਨ ਹੁਣ ਅਪਣੀ ਨੌਕਰੀ ਤੋਂ ਹੱਥ ਧੋ ਬੈਠੇ ਹਨ। ਉਨ੍ਹਾਂ ਨੂੰ ਸੰਘੀ ਸਰਕਾਰ ਦੇ ਜੌਬਕਿੱਪਰ ਅਤੇ ਜੌਬਸਿੱਕਰ ਦੀਆਂ ਅਦਾਇਗੀਆਂ ਤੋਂ ਬਾਹਰ ਕਰ ਦਿਤਾ ਗਿਆ ਸੀ। ਆਮਦਨੀ ਸਹਾਇਤਾ ਹੁਣ ਸੂਬਾ ਸਰਕਾਰਾਂ ਅਤੇ ਆਸਟਰੇਲੀਆਈ ਯੂਨੀਵਰਸਿਟੀਆਂ ਤੋਂ ਮਿਲਣੀ ਸ਼ੁਰੂ ਹੋ ਗਈ ਹੈ।
ਜੋ ਵਿਦਿਆਰਥੀ ਇਥੇ 12 ਮਹੀਨਿਆਂ ਤੋਂ ਵੱਧ ਸਮੇਂ ਤੋਂ ਰਹੇ ਹਨ , ਵਿੱਤੀ ਤੰਗੀ ਹੋਣ ਵੇਲੇ ਅਪਣਾ ਜਮਾਂ ਹੋਇਆ ਸੁਪਰ ਫੰਡ ਲੈ ਸਕਦੇ ਹਨ। ਕੁਝ ਰਾਜਾਂ ਨੇ ਕੌਮਾਂਤਰੀ ਵਿਦਿਆਰਥੀਆਂ ਲਈ ਐਮਰਜੈਂਸੀ ਗ੍ਰਾਂਟ, ਨੌਕਰੀਆਂ, ਮੁਫ਼ਤ ਸਿਖਲਾਈ ਅਤੇ ਸਿਹਤ ਮੁਆਫੀ ਦੀ ਪੇਸ਼ਕਸ਼ ਕੀਤੀ ਹੈ । ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ ਇਹ ਉਨ੍ਹਾਂ ਮਾਮਲਿਆਂ 'ਚ ਲਚਕਦਾਰ ਰਹੇਗੀ ਜਿਥੇ ਕੋਰੋਨਾ ਵਾਇਰਸ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀਆਂ ਵੀਜ਼ਾ ਸ਼ਰਤਾਂ ਪੂਰੀਆਂ ਕਰਨ ਤੋਂ ਰੋਕਿਆ ਹੈ, ਜਿਵੇਂ ਕਿ ਉਨ੍ਹਾਂ ਦੀਆਂ ਕਲਾਸਾਂ ਵਿਚ ਸ਼ਾਮਲ ਨਾ ਹੋਣਾ।
ਜੋ ਵਿਦਿਆਰਥੀ ਦਾਖ਼ਲੇ, ਫੀਸਾਂ ਜਾਂ ਉਹਨਾਂ ਦੇ ਅਧਿਐਨ ਨਾਲ ਜੁੜੇ ਹੋਰ ਮੁੱਦਿਆਂ ਬਾਰੇ ਚਿੰਤਤ ਹਨ ਉਹਨਾਂ ਦੇ ਸਿਖਿਆ ਪ੍ਰਦਾਤਾਵਾਂ ਨਾਲ ਸੰਪਰਕ ਕਰ ਸਕਦੇ ਹਨ। ਵਿਦੇਸ਼ੀ ਵਿਦਿਆਰਥੀ ਅਪਣੀ ਵੀਜ਼ਾ ਸ਼ਰਤਾਂ ਅਨੁਸਾਰ ਪ੍ਰਤੀ ਪੰਦਰਵਾੜੇ 40 ਘੰਟੇ ਕੰਮ ਕਰ ਸਕਦੇ ਹਨ। ਪਰ ਚੱਲ ਰਹੇ ਸੰਕਟ ਦੇ ਮੱਦੇਨਜ਼ਰ, ਸਰਕਾਰ ਨੇ ਬਜ਼ੁਰਗ ਦੇਖਭਾਲ ਵਿਚ ਕੰਮ ਕਰ ਰਹੇ ਵਿਦਿਆਰਥੀਆਂ ਲਈ ਨਰਸਾਂ ਵਜੋਂ ਅਤੇ ਅਪਾਹਜ ਦੇਖਭਾਲ ਪ੍ਰਦਾਤਾਵਾਂ ਵਾਲੇ ਨੌਕਰੀਆਂ ਲਈ ਦੇਸ਼ ਦੇ ਸਿਹਤ ਸੰਭਾਲ ਖੇਤਰ 'ਚ ਸਹਾਇਤਾ ਲਈ ਇਹ ਸਮਾਂ ਵਧਾ ਦਿਤਾ ਹੈ।
File photo
ਬਹੁਤੇ ਲੋਕ ਜੋ ਆਸਟਰੇਲੀਆ 'ਚ ਮੈਡੀਕੇਅਰ ਦੇ ਯੋਗ ਨਹੀਂ ਹਨ । ਜੇ ਉਹਨਾਂ ਕੋਲ ਸਿਹਤ ਜਾਂ ਯਾਤਰਾ ਬੀਮਾ ਕਵਰ ਨਹੀਂ ਹੈ, ਕੁਝ ਰਾਜਾਂ ਅਤੇ ਪ੍ਰਦੇਸ਼ਾਂ ਜਿਵੇਂ ਕਿ ਐਨ.ਐਸ.ਡਬਲਯੂ, ਵਿਕਟੋਰੀਆ ਅਤੇ ਡਬਲਯੂ.ਏ ਨੇ ਘੋਸ਼ਣਾ ਕੀਤੀ ਹੈ ਕਿ ਉਹ ਕੋਵਿਡ-19 ਨਾਲ ਜੁੜੇ ਸਿਹਤ ਦੇਖਭਾਲ ਦੇ ਖਰਚਿਆਂ ਨੂੰ ਮੁਆਫ ਕਰ ਦੇਣਗੇ। ਅੰਤਰਰਾਸ਼ਟਰੀ ਵਿਦਿਆਰਥੀ ਸਰਕਾਰੀ ਹਸਪਤਾਲ 'ਚ ਇਲਾਜ ਕਰਾਉਣ ਯੋਗ ਹੋਣਗੇ।
ਆਸਟਰੇਲੀਆ ਦੀਆਂ ਯੂਨੀਵਰਸਿਟੀਆਂ ਨੇ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਸਹਾਇਤਾ ਲਈ ਸੁਤੰਤਰ ਐਮਰਜੈਂਸੀ ਵਿੱਤੀ ਫੰਡਾਂ ਅਤੇ ਫੂਡ ਬੈਂਕ ਮੁਹੱਈਆ ਕਰਵਾਉਣ ਲਈ ਵੀ ਕਦਮ ਚੁੱਕੇ ਹਨ। ਅੱਜ ਤਕ, ਆਸਟਰੇਲੀਆ ਦੀਆਂ ਯੂਨੀਵਰਸਿਟੀਆਂ ਨੇ ਵਿਦਿਆਰਥੀਆਂ ਦੀ ਸਹਾਇਤਾ ਲਈ 110 ਮਿਲੀਅਨ ਡਾਲਰ ਦਾ ਸਹਾਇਤਾ ਪੈਕਜ ਦਿੱਤਾ ਹੈ ।
ਸਰਕਾਰ ਇਹ ਵੀ ਯਕੀਨੀ ਬਣਾਉਣ ਵਿੱਚ ਸਹਾਇਤਾ ਪ੍ਰਦਾਨ ਕਰ ਰਹੀ ਹੈ ਕਿ ਸੰਕਟ ਦੇ ਸਮੇਂ ਵਿਦਿਆਰਥੀਆਂ ਨੂੰ ਉਹਨਾਂ ਦੀ ਮਾਨਸਿਕ ਤੰਦਰੁਸਤੀ ਸਹਾਇਤਾ ਮਿਲੇ ਜਿਸਦੀ ਉਹਨਾਂ ਨੂੰ ਜ਼ਰੂਰਤ ਹੈ. ਮਾਨਸਿਕ ਸਿਹਤ ਸਹਾਇਤਾ ਦੀ ਜਰੂਰਤ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀ ਲਾਈਫਲਾਈਨ ਆਸਟਰੇਲੀਆ 13 11 14 , ਯੂਥ ਬਿਓਂਡ ਬਲੂ 1300 224 636 , ਅਤੇ ਹੈਡਸਪੇਸ 1800 650 890 , ਦੁਆਰਾ ਸਹਾਇਤਾ ਪ੍ਰਾਪਤ ਕਰ ਸਕਦੇ ਹਨ।
