ਭਾਰਤੀ ਕੁਸ਼ਤੀ ਫੈਡਰੇਸ਼ਨ ਦੀ ਮੁਅੱਤਲੀ ਵਾਪਸ ਲਈ, WFI ਮੁਖੀ ਸੰਜੇ ਸਿੰਘ ਨੇ ਜੇਤੂ ਕਮੇਟੀ ਨੂੰ ਕੌਮੀ ਫੈਡਰੇਸ਼ਨ ਚਲਾਉਣ ਦੀ ਜ਼ਿੰਮੇਵਾਰੀ ਦੇਣ ਲਈ IOA ਦਾ ਧੰਨਵਾਦ ਕੀਤਾ
ਨਵੀਂ ਦਿੱਲੀ: ਭਾਰਤੀ ਓਲੰਪਿਕ ਸੰਘ (ਆਈ.ਓ.ਏ.) ਨੇ ਭਾਰਤੀ ਕੁਸ਼ਤੀ ਫੈਡਰੇਸ਼ਨ (ਡਬਲਿਊ.ਐੱਫ.ਆਈ.) ਦੀ ਮੁਅੱਤਲੀ ਵਾਪਸ ਲੈਣ ਅਤੇ ਇਸ ਨੂੰ ਪੂਰਾ ਪ੍ਰਬੰਧਕੀ ਕੰਟਰੋਲ ਦੇਣ ਤੋਂ ਬਾਅਦ ਐਡਹਾਕ ਕੁਸ਼ਤੀ ਕਮੇਟੀ ਨੂੰ ਭੰਗ ਕਰ ਦਿਤਾ ਹੈ।
ਆਈ.ਓ.ਏ. ਨੇ ਕਿਹਾ ਕਿ ਕੌਮੀ ਫੈਡਰੇਸ਼ਨ ਵਲੋਂ ਮੁਅੱਤਲੀ ਹਟਾਏ ਜਾਣ ਤੋਂ ਬਾਅਦ ਖੇਡ ਨੂੰ ਚਲਾਉਣ ਲਈ ਐਡਹਾਕ ਕਮੇਟੀ ਦੀ ਕੋਈ ਲੋੜ ਨਹੀਂ ਹੈ। ਆਈ.ਓ.ਏ. ਨੇ ਕਿਹਾ ਕਿ ਐਡਹਾਕ ਕਮੇਟੀ ਨੇ ਡਬਲਿਊ.ਐੱਫ.ਆਈ. ਦੇ ਸਹਿਯੋਗ ਨਾਲ ਅਗਲੇ ਮਹੀਨੇ ਹੋਣ ਵਾਲੇ ਓਲੰਪਿਕ ਕੁਆਲੀਫਾਇੰਗ ਟੂਰਨਾਮੈਂਟ ਲਈ ਚੋਣ ਟਰਾਇਲ ਸਫਲਤਾਪੂਰਵਕ ਕੀਤੇ ਹਨ।
ਖੇਡ ਮੰਤਰਾਲੇ ਨੇ ਦਸੰਬਰ ਵਿਚ ਡਬਲਿਊ.ਐੱਫ.ਆਈ. ਨੂੰ ਮੁਅੱਤਲ ਕਰ ਦਿਤਾ ਸੀ ਅਤੇ ਐਡਹਾਕ ਕਮੇਟੀ ਦਾ ਗਠਨ ਕੀਤਾ ਸੀ। ਹਾਲਾਂਕਿ, ਉਸ ਦਾ ਦਾਅਵਾ ਉਸ ਸਮੇਂ ਉਲਟ ਗਿਆ ਜਦੋਂ ਖੇਡ ਦੀ ਗਲੋਬਲ ਸੰਸਥਾ ਯੂ.ਡਬਲਯੂ.ਡਬਲਯੂ. (ਯੂਨਾਈਟਿਡ ਵਰਲਡ ਰੈਸਲਿੰਗ) ਨੇ ਫ਼ਰਵਰੀ ’ਚ ਡਬਲਿਊ.ਐੱਫ.ਆਈ. ਤੋਂ ਮੁਅੱਤਲੀ ਹਟਾ ਦਿਤੀ।
ਆਈ.ਓ.ਏ. ਨੇ 10 ਮਾਰਚ ਨੂੰ ਜਾਰੀ ਹੁਕਮ ’ਚ ਕਿਹਾ ਕਿ ਐਡਹਾਕ ਕਮੇਟੀ ਨੂੰ ਭੰਗ ਕਰਨ ਦਾ ਫੈਸਲਾ ਮਾਣਯੋਗ ਦਿੱਲੀ ਹਾਈ ਕੋਰਟ ਦੀਆਂ ਹਦਾਇਤਾਂ ’ਤੇ ਡਬਲਿਊ.ਡਬਲਿਊ. ਵਲੋਂ ਭਾਰਤੀ ਕੁਸ਼ਤੀ ਫੈਡਰੇਸ਼ਨ ’ਤੇ ਲਗਾਈ ਗਈ ਪਾਬੰਦੀ ਹਟਾਉਣ ਅਤੇ ਆਈ.ਓ.ਏ. ਵਲੋਂ ਨਿਯੁਕਤ ਕਮੇਟੀ ਵਲੋਂ ਚੋਣ ਟਰਾਇਲ ਸਫਲਤਾਪੂਰਵਕ ਮੁਕੰਮਲ ਕਰਨ ਦੇ ਮੱਦੇਨਜ਼ਰ ਲਿਆ ਗਿਆ ਹੈ।
ਡਬਲਿਊ.ਐੱਫ.ਆਈ. ਦੇ ਮੁਖੀ ਸੰਜੇ ਸਿੰਘ ਨੇ ਜੇਤੂ ਕਮੇਟੀ ਨੂੰ ਕੌਮੀ ਫੈਡਰੇਸ਼ਨ ਚਲਾਉਣ ਦੀ ਜ਼ਿੰਮੇਵਾਰੀ ਦੇਣ ਲਈ ਆਈ.ਓ.ਏ. ਦਾ ਧੰਨਵਾਦ ਕੀਤਾ।
ਉਨ੍ਹਾਂ ਕਿਹਾ, ‘‘ਅਸੀਂ ਆਈ.ਓ.ਏ. ਦਾ ਧੰਨਵਾਦ ਕਰਦੇ ਹਾਂ ਕਿ ਉਨ੍ਹਾਂ ਨੇ ਸਾਨੂੰ ਡਬਲਿਊ.ਐੱਫ.ਆਈ. ਦਾ ਪੂਰਾ ਕੰਟਰੋਲ ਦਿਤਾ। ਅਸੀਂ ਭਲਵਾਨਾਂ ਨੂੰ ਸਾਰੀਆਂ ਸਹੂਲਤਾਂ ਦੇਵਾਂਗੇ। ਅਸੀਂ ਜਲਦੀ ਹੀ ਕੌਮੀ ਕੈਂਪ ਲਗਾਵਾਂਗੇ ਅਤੇ ਜੇਕਰ ਭਲਵਾਨ ਵਿਦੇਸ਼ ’ਚ ਸਿਖਲਾਈ ਕਰਨਾ ਚਾਹੁੰਦੇ ਹਨ ਤਾਂ ਅਸੀਂ ਸਹੂਲਤ ਪ੍ਰਦਾਨ ਕਰਾਂਗੇ। ਹੁਣ ਪੂਰਾ ਧਿਆਨ ਓਲੰਪਿਕ ’ਤੇ ਹੈ। ਅਸੀਂ 5-6 ਭਲਵਾਨਾਂ ਦੇ ਕੁਆਲੀਫਾਈ ਕਰਨ ਦੀ ਉਮੀਦ ਕਰ ਰਹੇ ਹਾਂ।’’
ਸੰਜੇ ਸਿੰਘ ਦੀ ਅਗਵਾਈ ਵਾਲੀ ਨਵੀਂ ਚੁਣੀ ਗਈ ਡਬਲਿਊ.ਐੱਫ.ਆਈ. ਵਲੋਂ ਨਿਯਮਾਂ ਦੀ ਉਲੰਘਣਾ ਕਰਨ ਤੋਂ ਬਾਅਦ 23 ਦਸੰਬਰ ਨੂੰ ਭੁਪਿੰਦਰ ਸਿੰਘ ਬਾਜਵਾ ਦੀ ਅਗਵਾਈ ’ਚ ਤਿੰਨ ਮੈਂਬਰੀ ਐਡਹਾਕ ਕਮੇਟੀ ਦਾ ਗਠਨ ਕੀਤਾ ਗਿਆ ਸੀ। ਇਸ ਮਹੀਨੇ ਦੀ ਸ਼ੁਰੂਆਤ ’ਚ ਐਡਹਾਕ ਕਮੇਟੀ ਨੇ ਅਪ੍ਰੈਲ ’ਚ ਕਿਰਗਿਸਤਾਨ ’ਚ ਹੋਣ ਵਾਲੀ ਏਸ਼ੀਅਨ ਚੈਂਪੀਅਨਸ਼ਿਪ ਅਤੇ ਏਸ਼ੀਆਈ ਓਲੰਪਿਕ ਕੁਆਲੀਫਾਇਰ ਲਈ ਟੀਮਾਂ ਦੀ ਚੋਣ ਲਈ ਟਰਾਇਲ ਕਰਵਾਏ ਸਨ।
ਵਿਨੇਸ਼ ਫੋਗਾਟ ਅਤੇ ਬਜਰੰਗ ਪੂਨੀਆ ਨੇ ਵੀ ਇਸ ਟ੍ਰਾਇਲ ’ਚ ਹਿੱਸਾ ਲਿਆ। ਵਿਨੇਸ਼ ਫੋਗਾਟ 50 ਕਿਲੋਗ੍ਰਾਮ ਵਰਗ ਵਿਚ ਓਲੰਪਿਕ ਕੁਆਲੀਫਾਇਰ ਜਿੱਤਣ ਵਿਚ ਕਾਮਯਾਬ ਰਹੀ ਪਰ ਬਜਰੰਗ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਟ੍ਰਾਇਲ ਸਫਲਤਾਪੂਰਵਕ ਪੂਰਾ ਹੋਣ ਤੋਂ ਬਾਅਦ ਖੇਡ ਦੀ ਵਾਗਡੋਰ ਡਬਲਿਊ.ਐੱਫ.ਆਈ. ਨੂੰ ਸੌਂਪ ਦਿਤੀ ਗਈ ਹੈ।
ਆਈ.ਓ.ਏ. ਨੇ ਡਬਲਿਊ.ਐੱਫ.ਆਈ. ਨੂੰ ਜਿਨਸੀ ਸੋਸ਼ਣ ਦੀਆਂ ਚਿੰਤਾਵਾਂ ਅਤੇ ਨਿਯਮਾਂ ਦੀ ਪਾਲਣਾ ਵਰਗੇ ਹੋਰ ਮੁੱਦਿਆਂ ਨੂੰ ਹੱਲ ਕਰਨ ਲਈ ‘ਸੁਰੱਖਿਆ ਕਮੇਟੀ ਅਧਿਕਾਰੀ’ ਨਿਯੁਕਤ ਕਰਨ ਦਾ ਹੁਕਮ ਦਿਤਾ।
ਇਸ ’ਚ ਕਿਹਾ ਗਿਆ ਹੈ, ‘‘ਯੂ.ਡਬਲਯੂ.ਡਬਲਯੂ. ਦੀਆਂ ਹਦਾਇਤਾਂ ਅਨੁਸਾਰ, ਇਹ ਜ਼ਰੂਰੀ ਹੈ ਕਿ ਡਬਲਿਊ.ਐੱਫ.ਆਈ. ਜਲਦੀ ਤੋਂ ਜਲਦੀ ਸੁਰੱਖਿਆ ਕਮੇਟੀ / ਸਕੱਤਰੇਤ ਨੂੰ ਮਿਲੇ ਤਾਂ ਜੋ ਦੁਰਵਿਵਹਾਰ ਅਤੇ ਪਰੇਸ਼ਾਨੀ ਦੀਆਂ ਚਿੰਤਾਵਾਂ ਨੂੰ ਦੂਰ ਕੀਤਾ ਜਾ ਸਕੇ ਅਤੇ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਨਿਯਮਾਂ ਅਤੇ ਦਿਸ਼ਾ ਨਿਰਦੇਸ਼ਾਂ ਦੀ ਪਾਲਣਾ ਕੀਤੀ ਜਾਵੇ। ਇਕ ਅਧਿਕਾਰੀ ਨਿਯੁਕਤ ਕਰੋ।’’
