ਓਡੀਸ਼ਾ ਦੇ ਕੇਂਦਰਪਾੜਾ ਜ਼ਿਲ੍ਹੇ 'ਚ ਚੱਕਰਵਾਤ 'ਅਮਫ਼ਾਨ' ਦੇ ਪ੍ਰਭਾਵ ਦਰਮਿਆਨ ਇਕ ਔਰਤ ਨੇ ਫ਼ਾਇਰ ਬ੍ਰਿਗੇਡ ਸੇਵਾ ਦੀ ਗੱਡੀ 'ਚ
ਕੇਂਦਰਪਾੜਾ, 20 ਮਈ : ਓਡੀਸ਼ਾ ਦੇ ਕੇਂਦਰਪਾੜਾ ਜ਼ਿਲ੍ਹੇ 'ਚ ਚੱਕਰਵਾਤ 'ਅਮਫ਼ਾਨ' ਦੇ ਪ੍ਰਭਾਵ ਦਰਮਿਆਨ ਇਕ ਔਰਤ ਨੇ ਫ਼ਾਇਰ ਬ੍ਰਿਗੇਡ ਸੇਵਾ ਦੀ ਗੱਡੀ 'ਚ ਬੁੱਧਵਾਰ ਨੂੰ ਇਕ ਬੱਚੀ ਨੂੰ ਜਨਮ ਦਿਤਾ। ਫ਼ਾਇਰ ਬ੍ਰਿਗੇਡ ਅਧਿਕਾਰੀ ਪੀ ਕੇ ਦਾਸ ਨੇ ਦਸਿਆ ਕਿ ਮਾਂ ਅਤੇ ਨਵਜਾਤ ਦੋਵੇਂ ਸਿਹਤਮੰਦ ਹਨ ਅਤੇ ਉਨ੍ਹਾਂ ਨੂੰ ਜ਼ਿਲ੍ਹੇ 'ਚ ਮਹਾਕਾਲਪਾੜਾ ਸਰਕਾਰੀ ਸਿਹਤ ਕੇਂਦਰ 'ਚ ਭਰਤੀ ਕਰਵਾਇਆ ਗਿਆ ਹੈ। ਦਾਸ ਨੇ ਦਸਿਆ ਕਿ ਜਾਨਕੀ ਸੇਠੀ (20) ਚੱਕਰਵਾਤੀ ਤੂਫ਼ਾਨ ਕਾਰਨ ਝਾਨਹਾੜਾ ਪਿੰਡ 'ਚ ਫਸ ਗਈ ਸੀ। ਉਨ੍ਹਾਂ ਦਸਿਆ,''ਸਾਨੂੰ ਸਵੇਰੇ ਕਰੀਬ 8 ਵਜੇ ਪਰਵਾਰ ਤੋਂ ਪ੍ਰੇਸ਼ਾਨੀ ਦੀ ਸੂਚਨਾ ਮਿਲੀ। ਪਿੰਡ ਜਾਣ ਵਾਲੇ ਰਸਤੇ 'ਤੇ ਚੱਕਰਵਾਤ ਕਾਰਨ 22 ਦਰੱਖ਼ਤ ਡਿੱਗੇ ਪਏ ਸਨ। ਖ਼ਰਾਬ ਮੌਸਮ ਅਤੇ ਤੇਜ਼ ਹਵਾਵਾਂ ਦਾ ਸਾਹਮਣਾ ਕਰਦੇ ਹੋਏ ਉਨ੍ਹਾਂ ਨੇ ਰਸਤਾ ਸਾਫ਼ ਕੀਤਾ ਅਤੇ ਔਰਤ ਨੂੰ ਗੱਡੀ 'ਚ ਬਿਠਾਇਆ।'' ਦਾਸ ਨੇ ਕਿਹਾ ਕਿ ਔਰਤ ਨੂੰ ਰਸਤੇ 'ਚ ਹੀ ਦਰਦ ਹੋਣ ਲੱਗੀ। ਫ਼ਾਇਰ ਬ੍ਰਿਗੇਡ ਕਰਮਚਾਰੀਆਂ ਨੇ ਉਸ ਦੀ ਮਦਦ ਕੀਤੀ ਅਤੇ ਉਸ ਨੇ ਬੱਚੀ ਨੂੰ ਜਨਮ ਦਿਤਾ। ਉਨ੍ਹਾਂ ਦਸਿਆ ਕਿ ਜੱਚਾ-ਬੱਚਾ ਠੀਕ-ਠਾਕ ਹਨ ਤੇ ਉਨ੍ਹਾਂ ਨੂੰ ਹਸਪਤਾਲ ਭਰਤੀ ਕਰਵਾ ਦਿਤਾ ਗਿਆ ਹੈ। (ਏਜੰਸੀ)
