ਚੋਰੀ ਕਰ ਕੇ ਅੱਗੇ ਸਸਤੇ ਭਾਅ 'ਤੇ ਵੇਚਦਾ ਸੀ ਮੁਲਜ਼ਮ
ਚੰਡੀਗੜ੍ਹ: ਸਥਾਨਕ ਸਰਕਾਰੀ ਹਸਪਤਾਲ ਵਿੱਚ 20 ਤੋਂ 40 ਹਜ਼ਾਰ ਰੁਪਏ ਦੇ ਟੀਕੇ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੇ ਗਿਰੋਹ ਦੇ ਇੱਕ ਮੈਂਬਰ ਨੂੰ ਹਸਪਤਾਲ ਦੇ ਸੁਰੱਖਿਆ ਮੁਲਾਜ਼ਮਾਂ ਨੇ ਰੰਗੇ ਹੱਥੀਂ ਕਾਬੂ ਕਰ ਲਿਆ ਹੈ। ਚੋਰੀ ਦੀ ਇਹ ਘਟਨਾ ਸੈਕਟਰ-16 ਸਥਿਤ ਸਰਕਾਰੀ ਮਲਟੀ ਸਪੈਸ਼ਲਿਟੀ ਹਸਪਤਾਲ (ਜੀਐਮਸੀਐਚ-16) ਦੀ ਹੈ। ਉਕਤ ਮੁਲਜ਼ਮ ਹਸਪਤਾਲ ਵਿੱਚੋਂ ਮਹਿੰਗੇ ਟੀਕੇ ਚੋਰੀ ਕਰਨ ਤੋਂ ਬਾਅਦ ਪ੍ਰਾਈਵੇਟ ਕੈਮਿਸਟ ਨੂੰ ਅੱਗੇ ਸਸਤੇ ਭਾਅ ਵੇਚ ਦਿੰਦੇ ਸਨ। ਉਹ ਪਿਛਲੇ ਕਈ ਦਿਨਾਂ ਤੋਂ ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਰਿਹਾ ਸੀ।
ਫੜੇ ਗਏ ਮੁਲਜ਼ਮ ਦੀ ਪਛਾਣ ਵਿਸ਼ਾਲ ਵਜੋਂ ਹੋਈ ਹੈ। ਮੁਲਜ਼ਮ ਮੁਹਾਲੀ ਦੇ ਸੈਕਟਰ-70 ਦਾ ਰਹਿਣ ਵਾਲਾ ਹੈ ਅਤੇ ਉਸ ਨੇ ਆਪਣਾ ਜੁਰਮ ਵੀ ਕਬੂਲ ਕਰ ਲਿਆ ਹੈ। ਉਸ ਦਾ ਕਹਿਣਾ ਹੈ ਕਿ ਵੱਖ-ਵੱਖ ਗਿਰੋਹ ਦੇ ਮੈਂਬਰ ਟੈਸਟ ਕਰਵਾਉਣ ਦੇ ਬਹਾਨੇ ਹਸਪਤਾਲ 'ਚ ਘੁਸਪੈਠ ਕਰ ਕੇ ਮਹਿੰਗੇ ਟੀਕੇ ਚੋਰੀ ਕਰਦੇ ਸਨ ਅਤੇ ਖੁੱਡਾ ਲਾਹੌਰਾ ਦੇ ਇਕ ਪ੍ਰਾਈਵੇਟ ਕੈਮਿਸਟ ਆਪ੍ਰੇਟਰ ਨੂੰ ਵੇਚ ਦਿੰਦੇ ਸਨ।
ਸੁਰੱਖਿਆ ਇੰਚਾਰਜ ਯਸ਼ਪਾਲ ਨੇ ਦੱਸਿਆ ਕਿ ਉਹ ਇੱਕ ਦਿਨ ਹਸਪਤਾਲ ਵਿੱਚ ਲੱਗੇ ਸੀਸੀਟੀਵੀ ਫੁਟੇਜ ਦਾ ਰਿਕਾਰਡ ਚੈੱਕ ਕਰ ਰਹੇ ਸਨ। ਇਸ ਦੌਰਾਨ ਜਦੋਂ ਉਨ੍ਹਾਂ ਨੇ 22 ਜੁਲਾਈ ਦੇ ਇੱਕ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਮੁਲਜ਼ਮ ਹਸਪਤਾਲ ਦੇ ਕੋਲਡ ਸਟੋਰੇਜ ਵਿੱਚ ਰੱਖੇ ਮਹਿੰਗੇ ਟੀਕੇ ਚੋਰੀ ਕਰ ਰਿਹਾ ਸੀ। ਯਸ਼ਪਾਲ ਨੇ ਦੱਸਿਆ ਕਿ ਉਸ ਨੇ ਦੋਸ਼ੀ ਦੀ ਫੁਟੇਜ ਸਾਰੇ ਸੁਰੱਖਿਆ ਮੁਲਾਜ਼ਮਾਂ ਨਾਲ ਸਾਂਝੀ ਕੀਤੀ ਅਤੇ ਉਨ੍ਹਾਂ ਨੂੰ ਉਕਤ ਵਿਅਕਤੀ 'ਤੇ ਨਜ਼ਰ ਰੱਖਣ ਲਈ ਕਿਹਾ। ਸੋਮਵਾਰ ਨੂੰ ਜਿਵੇਂ ਹੀ ਉਹ ਦੁਬਾਰਾ ਟੀਕਾ ਚੋਰੀ ਕਰਨ ਲਈ ਪਹੁੰਚਿਆ ਤਾਂ ਸੁਰੱਖਿਆ ਮੁਲਾਜ਼ਮਾਂ ਨੇ ਉਸ ਨੂੰ ਟੀਕਾ ਚੋਰੀ ਕਰਦੇ ਰੰਗੇ ਹੱਥੀਂ ਕਾਬੂ ਕਰ ਲਿਆ।
ਮੁਲਜ਼ਮ ਵਿਸ਼ਾਲ ਨੇ ਦੱਸਿਆ ਕਿ ਉਹ ਖੁੱਡਾ ਲਾਹੌਰਾ ਸਥਿਤ ਐਸਪੀ ਮੈਡੀਕਲ ਸਟੋਰ ਦੇ ਸੰਚਾਲਕ ਜਤਿੰਦਰ ਸਪਰਾ ਦੇ ਕਹਿਣ ’ਤੇ 50 ਮਿਲੀਗ੍ਰਾਮ ਅਤੇ 20 ਮਿਲੀਗ੍ਰਾਮ ਦੇ ਅਲਟੀਪਲੈੱਸ ਟੀਕੇ ਚੋਰੀ ਕਰਦਾ ਸੀ। 50mg Eplipless Injection ਦੀ ਬਾਜ਼ਾਰ ਵਿੱਚ ਕੀਮਤ 47,018 ਰੁਪਏ ਹੈ। ਜਦੋਂ ਕਿ 20 ਮਿਲੀਗ੍ਰਾਮ ਦੇ ਇਸ ਟੀਕੇ ਦੀ ਕੀਮਤ 22 ਹਜ਼ਾਰ ਰੁਪਏ ਹੈ। ਪੁਲਿਸ ਹੁਣ ਇਸ ਮਾਮਲੇ ਦੀ ਜਾਂਚ ਕਰੇਗੀ ਕਿ ਕੀ ਕੋਈ ਦੋਸ਼ੀ ਦੀ ਮਦਦ ਕਰ ਰਿਹਾ ਸੀ।
ਸਕਿਓਰਿਟੀ ਇੰਚਾਰਜ ਯਸ਼ਪਾਲ ਨੇ ਦੱਸਿਆ ਕਿ ਮੁਲਜ਼ਮ ਨੂੰ 66 ਹਜ਼ਾਰ ਰੁਪਏ ਦੀਆਂ ਦੋ ਟੀਕਿਆਂ ਦੀਆਂ ਸ਼ੀਸ਼ੀਆਂ ਚੋਰੀ ਕਰਦਿਆਂ ਰੰਗੇ ਹੱਥੀਂ ਕਾਬੂ ਕੀਤਾ ਗਿਆ। ਸੁਰੱਖਿਆ ਕਰਮੀਆਂ ਵੱਲੋਂ ਜਦੋਂ ਮੁਲਜ਼ਮ ਤੋਂ ਪੁੱਛਗਿੱਛ ਕੀਤੀ ਗਈ ਤਾਂ ਉਸ ਨੇ ਦੱਸਿਆ ਕਿ ਉਹ ਪਹਿਲਾਂ ਵੀ ਕੈਮਿਸਟ ਆਪ੍ਰੇਟਰ ਦੇ ਕਹਿਣ ’ਤੇ ਹਸਪਤਾਲ ਵਿੱਚ ਆ ਕੇ ਮਹਿੰਗੇ ਟੀਕੇ ਚੋਰੀ ਕਰ ਚੁੱਕਾ ਹੈ। ਜਿਸ ਨੂੰ ਉਸ ਨੇ ਖੁੱਡਾ ਲਾਹੌਰਾ ਦੇ ਕੈਮਿਸਟ ਆਪ੍ਰੇਟਰ ਨੂੰ ਪੰਜ ਹਜ਼ਾਰ ਰੁਪਏ ਵਿੱਚ ਵੇਚ ਦਿੱਤਾ ਹੈ।
ਸੁਰੱਖਿਆ ਇੰਚਾਰਜ ਯਸ਼ਪਾਲ ਨੇ ਬਿਆਨ ਲਿਖ ਕੇ ਮੁਲਜ਼ਮ ਨੂੰ ਥਾਣਾ ਜੀ.ਐਮ.ਐਸ.ਐਚ.-16 ਦੀ ਪੁਲਿਸ ਹਵਾਲੇ ਕਰ ਦਿੱਤਾ ਅਤੇ ਸ਼ਿਕਾਇਤ ’ਤੇ ਮਾਮਲਾ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਇਸ ਦੇ ਨਾਲ ਹੀ ਪੁਲਿਸ ਖੁੱਡਾ ਲਾਹੌਰਾ ਸਥਿਤ ਪ੍ਰਾਈਵੇਟ ਕੈਮਿਸਟ ਆਪ੍ਰੇਟਰ ਦਾ ਵੀ ਪਤਾ ਲਗਾ ਰਹੀ ਹੈ, ਜਿਸ ਦੇ ਇਸ਼ਾਰੇ 'ਤੇ ਮੁਲਜ਼ਮ ਵਿਸ਼ਾਲ ਜੀਐਮਐਸਐਚ-16 ਹਸਪਤਾਲ ਤੋਂ ਇਹ ਮਹਿੰਗੇ ਟੀਕੇ ਚੋਰੀ ਕਰਦਾ ਸੀ।
