ਐਡਵੈਂਨਚਰ ਤੇ ਫਿਟਨੈੱਸ ਦਾ ਸ਼ੌਂਕ ਰੱਖਣ ਵਾਲੇ ਅੰਕਿਤ ਨੇ ਚੰਡੀਗੜ੍ਹ ਤੋਂ ਕੰਨਿਆਕੁਮਾਰੀ ਤੱਕ ਸਾਈਕਲ ਦੀ ਯਾਤਰਾ ਵੀ ਕੀਤੀ ਹੈ
ਚੰਡੀਗੜ੍ਹ - ਐਡਵੈਂਚਰ ਦੇ ਸ਼ੌਕੀਨ ਲੋਕਾਂ ਲਈ ਮਾਊਂਟ ਐਵਰੈਸਟ 'ਤੇ ਚੜ੍ਹਨਾ ਸਭ ਤੋਂ ਖ਼ਤਰਨਾਕ ਮੰਨਿਆ ਜਾਂਦਾ ਹੈ। ਪਹਿਲਾਂ ਵੀ ਕਈ ਲੋਕਾਂ ਨੇ ਇਹ ਚੜ੍ਹਾਈ ਚੜ੍ਹ ਕੇ ਰਿਕਾਰਡ ਬਣਾਇਆ ਹੈ ਤੇ ਹੁਣ ਚੰਡੀਗੜ੍ਹ ਪੁਲਿਸ ਦੀ ਮਹਿਲਾ ਕਾਂਸਟੇਬਲ ਦੇ ਪੁੱਤ 'ਟਾਈਗਰ' ਨੇ ਐਵਰੈਸਟ ਦੇ ਬੇਸ ਕੈਂਪ ਤੱਕ 5364 ਮੀਟਰ ਦੀ ਉਚਾਈ ਸਿਰਫ਼ 23 ਘੰਟੇ 47 ਸੈਕਿੰਡ ਵਿਚ ਪੂਰੀ ਕੀਤੀ ਹੈ। ਸੈਕਟਰ 39 ਥਾਣੇ ਵਿਚ ਤਾਇਨਾਤ ਕਾਂਸਟੇਬਲ ਦੀਪਕ ਕੁਮਾਰੀ ਦਾ ਪੁੱਤਰ ਅੰਕਿਤ ਮਲਿਕ ਉਰਫ ਟਾਈਗਰ ਇਸ ਤੋਂ ਪਹਿਲਾਂ ਵੀ ਕਈ ਰਿਕਾਰਡ ਬਣਾ ਚੁੱਕਾ ਹੈ।
ਐਡਵੈਂਨਚਰ ਤੇ ਫਿਟਨੈੱਸ ਦਾ ਸ਼ੌਂਕ ਰੱਖਣ ਵਾਲੇ ਅੰਕਿਤ ਨੇ ਚੰਡੀਗੜ੍ਹ ਤੋਂ ਕੰਨਿਆਕੁਮਾਰੀ ਤੱਕ ਸਾਈਕਲ ਦੀ ਯਾਤਰਾ ਵੀ ਕੀਤੀ ਹੈ। ਦੂਜੇ ਪਾਸੇ ਰਾਜਸਥਾਨ ਦੇ ਥਾਰ ਰੇਗਿਸਤਾਨ ਤੋਂ ਗੁਜਰਾਤ ਦੇ ਕੱਛ ਦੇ ਸਫੇਦ ਮਾਰੂਥਲ ਖੇਤਰ ਤੱਕ ਚੱਲਦਾ ਹੋਇਆ ਮਲਿਕ ਗੁਜਰਾਤ-ਪਾਕਿਸਤਾਨ ਸਰਹੱਦ (ਨਾਡਾ ਬੇਟ) ਤੱਕ ਪਹੁੰਚ ਗਿਆ ਸੀ।
ਅੰਕਿਤ ਐਵਰੈਸਟ 'ਤੇ ਚੜ੍ਹਨ ਲਈ ਲੁਕਲਾ (ਨੇਪਾਲ) ਨਾਮਕ ਬਿੰਦੂ ਤੱਕ ਪੈਦਲ ਅਤੇ ਜਾਗਿੰਗ ਕਰਦਾ ਰਿਹਾ। ਯਾਤਰੀ ਅਕਸਰ ਹਵਾਈ ਸਫਰ ਰਾਹੀਂ ਇੱਥੇ ਪਹੁੰਚਦੇ ਹਨ। ਉਸ ਨੇ ਲੁਕਲਾ ਅਤੇ ਐਵਰੈਸਟ ਦੇ ਬੇਸ ਕੈਂਪ ਵਿਚਕਾਰ 64 ਕਿਲੋਮੀਟਰ ਦਾ ਸਫ਼ਰ ਇਕੱਲੇ ਹੀ ਕੀਤਾ। ਇਸ ਲਈ ਜ਼ਿਆਦਾ ਸਾਮਾਨ ਵੀ ਨਹੀਂ ਲੈ ਕੇ ਗਿਆ ਸੀ। ਉਸ ਨੇ ਇਹ ਯਾਤਰਾ ਸਵੇਰੇ 6:47 ਵਜੇ ਸ਼ੁਰੂ ਕੀਤੀ। 16 ਅਕਤੂਬਰ ਸਵੇਰੇ 6: 45 ਵਜੇ ਸਫ਼ਰ ਖ਼ਤਮ ਕੀਤਾ। ਜਦੋਂ ਅੰਕਿਤ ਬੇਸ ਕੈਂਪ ਤੱਕ ਪਹੁੰਚਿਆ ਤਾਂ ਉੱਥੇ ਤਾਪਮਾਨ 2 ਡਿਗਰੀ ਸੀ। ਇਸ ਦੇ ਨਾਲ ਹੀ ਰਾਤ ਦਾ ਤਾਪਮਾਨ -5 ਡਿਗਰੀ ਸੀ। ਇਸ ਦੌਰਾਨ ਉਹ ਰਸਤਾ ਵੀ ਭਟਕ ਗਿਆ ਸੀ।
ਹਾਲਾਂਕਿ, ਸਟਾਰ ਡਾਇਰੈਕਸ਼ਨ ਅਤੇ GPS ਟਰੈਕਰ ਦੀ ਮਦਦ ਨਾਲ ਰਸਤਾ ਲੱਭਿਆ। ਉਥੇ ਉਸ ਦਾ ਮੋਬਾਈਲ ਵੀ ਗੁੰਮ ਹੋ ਗਿਆ। ਉਹ ਬਹੁਤ ਘੱਟ ਆਕਸੀਜਨ ਵਿਚ ਰਾਤ ਕਰੀਬ 1.30 ਵਜੇ ਲੋਬੂਚੇ ਪਹੁੰਚਿਆ। ਇਹ ਸਥਾਨ 5 ਹਜ਼ਾਰ ਮੀਟਰ ਤੋਂ ਉੱਪਰ ਹੈ। ਐਵਰੈਸਟ ਬੇਸ ਕੈਂਪ ਇਸ ਤੋਂ 6 ਕਿਲੋਮੀਟਰ ਉੱਪਰ ਸੀ। -11 ਡਿਗਰੀ ਤਾਪਮਾਨ ਵਿਚ, ਉਹ ਗੋਡੇ ਦੀ ਸੱਟ ਅਤੇ ਥਕਾਵਟ ਦੀ ਪਰਵਾਹ ਨਾ ਕਰਦਿਆਂ ਵੀ ਚੜ੍ਹਦਾ ਗਿਆ। ਉਸ ਦਾ ਪੀਣ ਵਾਲਾ ਪਾਣੀ ਵੀ ਮੁੱਕ ਗਿਆ ਸੀ।
ਅੰਕਿਤ ਨੇ ਐਵਰੈਸਟ ਬੇਸ ਕੈਂਪ ਤੱਕ ਆਪਣੀ ਯਾਤਰਾ ਬਾਰੇ ਦੱਸਿਆ ਕਿ ਜਦੋਂ ਉਸ ਨੇ ਬੇਸ ਕੈਂਪ ਤੱਕ ਚੜ੍ਹਾਈ ਕਰਨੀ ਸ਼ੁਰੂ ਕੀਤੀ ਤਾਂ ਉਸ ਨੇ ਦਿਨ-ਰਾਤ ਆਪਣੀ ਯਾਤਰਾ ਜਾਰੀ ਰੱਖੀ ਅਤੇ ਰਿਕਾਰਡ ਕਰਨ ਵਾਲਾ ਕੋਈ ਨਹੀਂ ਸੀ। ਉਹ ਬੱਸ ਚੜ੍ਹਦਾ ਰਿਹਾ ਅਤੇ 24 ਘੰਟੇ ਤੋਂ ਪਹਿਲਾਂ ਬੇਸ ਕੈਂਪ ਪਹੁੰਚ ਗਿਆ। ਦੱਸ ਦਈਏ ਕਿ ਅਧਿਕਾਰਤ ਤੌਰ 'ਤੇ ਸਭ ਤੋਂ ਤੇਜ਼ ਸੋਲੋ ਟ੍ਰੈਕਰ ਵਜੋਂ ਬੇਸ ਕੈਂਪ ਤੱਕ ਚੜ੍ਹਨ ਦਾ ਰਿਕਾਰਡ ਵਿਸ਼ਾਖਾਪਟਨਮ ਦੇ ਪਰਬਤਾਰੋਹੀ ਐਸਵੀਐਨ ਸੁਰੇਸ਼ ਬਾਬੂ ਦਾ ਹੈ। ਉਸ ਨੇ ਇਹ ਚੜ੍ਹਾਈ ਪਿਛਲੇ ਸਾਲ ਦਸੰਬਰ ਵਿਚ 20 ਤੋਂ 24 ਦਸੰਬਰ ਤੱਕ 4 ਦਿਨਾਂ ਵਿੱਚ ਪੂਰੀ ਕੀਤੀ ਸੀ।
ਅੰਕਿਤ ਨੇ 14 ਅਕਤੂਬਰ ਨੂੰ ਆਪਣੇ ਜਨਮ ਦਿਨ ਦੌਰਾਨ ਮਾਊਂਟ ਐਵਰੈਸਟ 'ਤੇ ਚੜ੍ਹਨ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਸੀ। 15 ਅਕਤੂਬਰ ਨੂੰ ਯਾਤਰਾ ਸ਼ੁਰੂ ਕਰਨ ਦੇ ਦੋ ਦਿਨਾਂ ਦੇ ਅੰਦਰ ਹੀ ਉਹ ਬੇਸ ਕੈਂਪ ਤੋਂ ਵਾਪਸ ਆ ਗਿਆ ਅਤੇ ਨੇਪਾਲ ਦੀ ਯਾਤਰਾ ਲਈ ਰਵਾਨਾ ਹੋ ਗਏ। ਅੰਕਿਤ ਨੇ ਕਿਹਾ ਕਿ ਪਰਬਤਾਰੋਹੀ ਅਕਸਰ ਬੇਸ ਕੈਂਪ ਤੱਕ ਸੋਲੋ ਟ੍ਰੈਕਿੰਗ ਨਹੀਂ ਕਰਦੇ, ਪਰ ਉਸ ਨੇ ਬੇਸ ਕੈਂਪ ਤੱਕ ਇਕੱਲੇ ਹੀ ਚੜ੍ਹਨ ਬਾਰੇ ਸੋਚਿਆ। ਅੰਕਿਤ ਆਪਣੇ ਪਰਿਵਾਰ ਨਾਲ ਸੈਕਟਰ 26 ਵਿੱਚ ਰਹਿੰਦਾ ਹੈ ਅਤੇ ਜ਼ੀਰਕਪੁਰ ਵਿਚ ਇੱਕ ਜਿੰਮ ਚਲਾਉਂਦਾ ਹੈ। ਉਹ ਅਕਸਰ ਸਾਹਸੀ ਯਾਤਰਾ ਲਈ ਬਾਹਰ ਜਾਂਦਾ ਹੈ। ਇਸ ਦੌਰਾਨ ਸਾਈਕਲਿੰਗ, ਦੌੜਨਾ, ਤੈਰਾਕੀ ਆਦਿ ਵੀ ਲਗਾਤਾਰ ਜਾਰੀ ਰੱਖਦਾ ਹੈ।
