ਪਹਿਲਾਂ ਵੀ ਲਿਖਿਆ ਸੀ ਪੱਤਰ ਪਰ ਕਾਰਵਾਈ ਨਾ ਹੋਣ 'ਤੇ ਕੀਤੇ ਹੁਕਮ

ਮੁੱਖ ਮੰਤਰੀ ਨੇ ਅਪਣੀ ਸਕਿਊਰਿਟੀ ਘਟਾਉਣ ਲਈ ਮੁੜ ਕੀਤੇ ਡੀ.ਜੀ.ਪੀ. ਨੂੰ  ਹੁਕਮ

ਚੰਡੀਗੜ੍ਹ, 27  ਸਤੰਬਰ (ਭੁੱਲਰ) : ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਉਨ੍ਹਾਂ ਦੁਆਲੇ ਘੁਮਦੇ ਸਕਿਉਰਿਟੀ ਦੇ ਵੱਡੇ ਕਾਫ਼ਲੇ ਕਾਰਨ ਨਾਰਾਜ਼ ਹਨ | ਉਨ੍ਹਾਂ ਅੱਜ ਡੀ.ਜੀ.ਪੀ. ਇਕਬਾਲਪ੍ਰੀਤ ਸਿੰਘ ਸਹੋਤਾ ਨੂੰ  ਮੁੜ ਪੱਤਰ ਲਿਖ ਕੇ ਹੁਕਮ ਦਿਤੇ ਹਨ ਕਿ ਉਨ੍ਹਾਂ ਦੀ ਸਕਿਉਰਿਟੀ ਤੁਰਤ ਘਟਾਈ ਜਾਵੇ | ਉਨ੍ਹਾਂ ਡੀ.ਜੀ.ਪੀ. ਨੂੰ  ਲਖੇ ਪੱਤਰ 'ਚ ਕਿਹਾ ਮੇਰੇ ਵਲੋਂ 22 ਸਤੰਬਰ ਨੂੰ  ਕੀਤੀ ਹਦਾਇਤ ਦੇ ਬਾਵਜੂਦ ਮੇਰੀ ਸਕਿਉਰਿਟੀ 'ਚ ਤੈਨਾਤ ਅਮਲੇ ਨੂੰ  ਘਟਾਉਣ ਲਈ ਕਾਰਵਾਈ ਨਹੀਂ ਹੋਈ | ਵਰਨਣਯੋਗ ਹੈ ਕਿ ਜਲੰਧਰ ਦੌਰੇ ਸਮੇਂ ਵੀ ਪਿਛਲੇ ਦਿਨੀਂ ਮੁੱਖ ਮੰਤਰੀ ਚੰਨੀ ਨੇ ਉਨ੍ਹਾਂ ਨਾਲ ਤੈਨਾਤ ਸਕਿਉਰਿਟੀ ਦੀ ਵੱਡੀ ਫ਼ੌਜ ਤੈਨਾਤ ਹੋਣ ਬਾਰੇ ਟਿਪਣੀਆਂ ਕੀਤੀਆਂ ਸਨ | ਉਨ੍ਹਾਂ ਕਿਹਾ ਸੀ ਕਿ ਮੈਨੂੰ ਕਿਸੇ ਨੇ ਮਾਰ ਕੇ ਕੀ ਲੈਣਾ ਹੈ ਪਰ ਮੇਰੇ ਨਾਲ 1000 ਮੁਲਾਜ਼ਮਾਂ ਦੀ ਸਕਿਉਰਿਟੀ ਤੈਨਾਤ ਹੈ | ਉਨ੍ਹਾਂ ਕਿਹਾ ਸੀ 2-2 ਕਰੋੜ ਦੀ ਕਮਰੇ ਜਿੱਡੀ ਗੱਡੀ ਹੈ ਪਰ ਮੈਂ ਕੋਈ ਸੁਖਬੀਰ ਬਾਦਲ ਤਾਂ ਨਹੀਂ ਹਾਂ | ਉਨ੍ਹਾਂ ਉਸ ਸਮੇਂ ਵੀ ਕਿਹਾ ਸੀ ਕਿ ਮੈਂ ਅਪਣੀ ਸਕਿਉਰਿਟੀ ਘਟਾਉਣ ਲਈ ਉਚ ਅਧਿਕਾਰੀਆਂ ਨੂੰ  ਕਿਹਾ ਹੋਇਆ ਹੈ | ਇਸੇ ਦੌਰਾਨ ਅੱਜ ਕੈਬਨਿਟ ਮੀਟਿੰਗ ਦੌਰਾਨ ਮੁੱਖ ਮੰਤਰੀ ਨੇ ਅਪਣੇ ਸਾਥੀ ਮੰਤਰੀਆਂ ਨੂੰ  ਅਪਣੀ ਸਕਿਉਰਿਟੀ ਘੱਟ ਕਰਨ ਦੀ ਸਲਾਹ ਦਿਤੀ ਹੈ | ਉਨ੍ਹਾਂ ਕਿਹਾ ਕਿ ਇਸ ਨਾਲ ਆਮ ਲੋਕਾਂ ਨੂੰ  ਵੀ ਦਿੱਕਤਾਂ ਆਉਂਦੀਆਂ ਹਨ | ਵਾਧੂ ਸੁਰਖਿਆ ਹਟਾ ਕਿ ਅਸੀਂ ਉਨ੍ਹਾਂ ਨੂੰ  ਹੋਰ ਥਾਂ 'ਤੇ ਵਰਤੋਂ ਕਰ ਸਕਦੇ ਹਾਂ |