ਪੁਸਤਕ ਰਾਹੀਂ ਪਤੀ ਨੂੰ ਮਾਰਨ ਦਾ ਤਰੀਕਾ ਦੱਸਣ ਵਾਲੀ ਲੇਖਿਕਾ ਨੇ ਕੀਤਾ ਅਪਣੇ ਪਤੀ ਦਾ ਕਤਲ, ਦੋਸ਼ੀ ਕਰਾਰ
ਪੋਰਟਲੈਂਡ, 27 ਮਈ : ਅਮਰੀਕਾ ਦੇ ਸ਼ਹਿਰ ਪੋਰਟਲੈਂਡ ਵਿਚ ਇਕ ਜਿਊਰੀ ਨੇ ‘ਹਾਊ ਟੂ ਮਰਡਰ ਯੂਅਰ ਹਸਬੈਂਡ’ ਨਾਮਕ ਕਿਤਾਬ ਲਿਖਣ ਵਾਲੀ 71 ਸਾਲਾ ਨਾਵਲਕਾਰ ਨੈਨਸੀ ਕ੍ਰੈਂਪਟਨ-ਬ੍ਰੋਫ਼ੀ, ਨੂੰ ਅਪਣੇ ਪਤੀ ਦੇ ਕਤਲ ਦਾ ਦੋਸ਼ੀ ਠਹਿਰਾਇਆ ਹੈ। ਦਿ ਗਾਰਡੀਅਨ ਦੀ ਰਿਪੋਰਟ ਅਨੁਸਾਰ 12 ਵਿਅਕਤੀਆਂ ਦੀ ਜਿਊਰੀ ਨੇ 63 ਸਾਲਾ ਸ਼ੈਫ਼ ਡੈਨੀਅਲ ਬ੍ਰੋਫ਼ੀ ਦੀ ਮੌਤ ’ਤੇ 2 ਦਿਨਾਂ ਤਕ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਨੈਨਸੀ ਕ੍ਰੈਂਪਟਨ-ਬ੍ਰੋਫ਼ੀ ਨੂੰ ਦੂਜੇ ਦਰਜੇ ਦਾ ਦੋਸ਼ੀ ਪਾਇਆ। ਸ਼ੈਫ਼ ਡੈਨੀਅਲ ਬ੍ਰੋਫ਼ੀ ਜੂਨ 2018 ਵਿਚ ਅਮਰੀਕਾ ਦੇ ਓਰੇਗਨ ਕਿਉਲਿਨਰੀ ਇੰਸਟੀਚਿਊਟ ਦੇ ਅੰਦਰ ਮ੍ਰਿਤਕ ਪਾਏ ਗਏ ਸੀ, ਜਿਥੇ ਉਹ ਕੰਮ ਕਰਦੇ ਸਨ।
ਵਕੀਲਾਂ ਨੇ ਜਿਊਰੀ ਮੈਂਬਰਾਂ ਨੂੰ ਦਸਿਆ ਕਿ ਨੈਨਸੀ ਪੈਸੇ ਅਤੇ ਜੀਵਨ ਬੀਮਾ ਪਾਲਿਸੀ ਤੋਂ ਪ੍ਰੇਰਿਤ ਸੀ। ਹਾਲਾਂਕਿ ਨੈਨਸੀ ਨੇ ਅਪਣੇ ਪਤੀ ਦੇ ਕਤਲ ਪਿਛੇ ਕੋਈ ਕਾਰਨ ਹੋਣ ਤੋਂ ਇਨਕਾਰ ਕੀਤਾ ਹੈ। ਉਸ ਦਾ ਕਹਿਣਾ ਸੀ ਕਿ ਮਿਸਟਰ ਬ੍ਰੌਫ਼ੀ ਦੀ ਰਿਟਾਇਰਮੈਂਟ ਬੱਚਤ ਦੇ ਇਕ ਹਿੱਸੇ ਨੂੰ ਕੈਸ਼ ਇਨ ਕਰਨ ਨਾਲ ਉਸ ਦੀਆਂ ਵਿੱਤੀ ਸਮੱਸਿਆਵਾਂ ਦਾ ਕਾਫ਼ੀ ਹੱਦ ਤਕ ਹੱਲ ਹੋ ਗਿਆ ਸੀ। ਵਕੀਲਾਂ ਨੇ ਕਿਹਾ ਕਿ ਨੈਨਸੀ ਕੋਲ ਬੰਦੂਕ ਦਾ ਉਹੀ ਮੇਕ ਅਤੇ ਮਾਡਲ ਸੀ, ਜੋ ਉਸ ਦੇ ਪਤੀ ਨੂੰ ਮਾਰਨ ਲਈ ਵਰਤੀ ਗਈ ਸੀ। ਉਸ ਨੂੰ ਨਿਗਰਾਨੀ ਕੈਮਰੇ ਦੀ ਫ਼ੁਟੇਜ ਵਿਚ ਓਰੇਗਨ ਕਲਿਨਰੀ ਇੰਸਟੀਚਿਊਟ ਤੋਂ ਆਉਂਦੇ ਅਤੇ ਜਾਂਦੇ ਵੀ ਦੇਖਿਆ ਗਿਆ ਸੀ। (ਏਜੰਸੀ)
