ਮਾਪਿਆਂ ਦਾ ਇਕਲੌਤਾ ਪੁੱਤਰ ਸੀ ਮ੍ਰਿਤਕ ਨੌਜੁਆਨ
ਧਰਮਕੋਟ (ਦਵਿੰਦਰ ਸਿੰਘ ਬਿੱਟੂ) : ਬੀਤੀ ਸ਼ਾਮ ਧਰਮਕੋਟ ਦਾਣਾ ਮੰਡੀ ਵਿਖੇ ਮੁਹੱਲਾ ਖਾਈ ਦੇ ਰਹਿਣ ਵਾਲੇ ਨੌਜੁਆਨ ਕਾਰਤਿਕ (16) ਪੁੱਤਰ ਟੋਨੀ ਸਿੰਘ ਦੀ ਨਸ਼ੇ ਨਾਲ ਮੌਤ ਹੋ ਗਈ। ਮ੍ਰਿਤਕ ਕਾਰਤਿਕ ਦੇ ਚਾਚਾ ਤਰਸੇਮ ਸਿੰਘ ਨੇ ਦਸਿਆ ਕਿ ਕਾਰਤਿਕ ਬੀਤੀ ਸ਼ਾਮ ਪੰਜ ਵਜੇ ਘਰੋਂ ਪੈਦਲ ਹੀ ਗਿਆ ਸੀ। ਕਰੀਬ ਸਾਢੇ ਛੇ ਵਜੇ ਸ਼ਾਮ ਪਤਾ ਲੱਗਾ ਕੇ ਕਾਰਤਿਕ ਦਾਣਾ ਮੰਡੀ ਵਿਚ ਮ੍ਰਿਤਕ ਪਿਆ ਹੈ। ਮੰਡੀ ਵਿਚੋਂ ਗੁਜ਼ਰ ਰਹੇ ਰਾਹਗੀਰਾਂ ਨੇ ਮ੍ਰਿਤਕ ਕਾਰਤਿਕ ਨੂੰ ਚੁੱਕ ਕੇ ਘਰ ਲਿਆਂਦਾ।
ਕਾਰਤਿਕ ਮਾਂ-ਪਿਉ ਦਾ ਇਕਲੌਤਾ ਪੁੱਤਰ ਸੀ ਅਤੇ ਇਕ ਛੋਟੀ ਭੈਣ ਜੋ ਛੇਵੀਂ ਜਮਾਤ ਵਿਚ ਪੜ੍ਹਦੀ ਹੈ ਦਾ ਭਰਾ ਸੀ। ਕਾਰਤਿਕ ਮਜ਼ਦੂਰੀ ਕਰਦਾ ਸੀ ਅਤੇ ਮ੍ਰਿਤਕ ਦਾ ਪਿਤਾ ਟੋਨੀ ਸਿੰਘ ਵੀ ਮਜ਼ਦੂਰੀ ਕਰ ਕੇ ਅਪਣੇ ਘਰ ਦਾ ਗੁਜ਼ਾਰਾ ਚਲਾਉਂਦਾ ਸੀ।
ਮ੍ਰਿਤਕ ਕਾਰਤਿਕ ਦੇ ਪਿਤਾ ਟੋਨੀ ਸਿੰਘ ਨੇ ਨਮ ਅੱਖਾਂ ਨਾਲ ਅਪਣੇ ਪੁੱਤ ਨੂੰ ਯਾਦ ਕਰਦੇ ਸਰਕਾਰ ਨੂੰ ਅਪੀਲ ਕੀਤੀ ਕਿ ਚਿੱਟੇ ਦੇ ਨਸ਼ੇ ਤੇ ਪੰਜਾਬ ਵਿਚ ਠੱਲ੍ਹ ਪਾਈ ਜਾਵੇ ਨਹੀਂ ਤਾਂ ਆਉਣ ਵਾਲੇ ਸਮੇਂ ਵਿਚ ਹੋਰ ਵੀ ਮਾਵਾਂ ਦੇ ਪੁੱਤ ਨੂੰ ਚਿੱਟੇ ਦਾ ਨਸ਼ਾ ਖਾ ਜਾਵੇਗਾ ਅਤੇ ਪੰਜਾਬ ਦੀ ਜਵਾਨੀ ਨੂੰ ਖ਼ਤਮ ਕਰ ਦੇਵੇਗਾ।
