ਆਸਟ੍ਰੇਲੀਆ ’ਚ ਸਵਾਰੀਆਂ ਨੂੰ ਗੁਮਰਾਹ ਕਰਨ ਲਈ ਉਬੇਰ ਕਰੇਗਾ 1.9 ਕਰੋੜ ਡਾਲਰ ਦਾ ਭੁਗਤਾਨ

ਕੈਨਬਰਾ, 26 ਅਪ੍ਰੈਲ : ਅਮਰੀਕਾ ਦੀ ਐਪ ਅਧਾਰਤ ਕੈਬ ਸਰਵਿਸ ਕੰਪਨੀ ਉਬੇਰ ਆਸਟ੍ਰੇਲੀਆ ਵਿਚ ਸਵਾਰੀਆਂ ਨੂੰ ਗਲਤ ਚੇਤਾਵਨੀਆਂ ਦੇ ਕੇ ਗੁੰਮਰਾਹ ਕਰਨ ਲਈ 2.6 ਕਰੋੜ ਆਸਟ੍ਰੇਲੀਅਨ ਡਾਲਰ (1.9 ਕਰੋੜ ਅਮਰੀਕੀ ਡਾਲਰ) ਦਾ ਜੁਰਮਾਨਾ ਭਰਨ ’ਤੇ ਸਹਿਮਤ ਹੋ ਗਈ ਹੈ। ਕੰਪਨੀ ਅਤੇ ਆਸਟ੍ਰੇਲੀਆ ਦੇ ਖਪਤਕਾਰ ਮਾਮਲਿਆਂ ਦੇ ਰੈਗੂਲੇਟਰ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਕੰਪਨੀ ਨੇ ਸਵੀਕਾਰ ਕੀਤਾ ਕਿ ਉਸਨੇ ਕਈ ਸਵਾਰੀਆਂ ਨੂੰ ਉਨ੍ਹਾਂ ਦੀ ਆਪਣੀ ਗਲਤੀ ਦੇ ਬਿਨਾਂ ਰੱਦ ਕਰਨ ਦੀ ਫੀਸ ਦਾ ਭੁਗਤਾਨ ਕਰਨ ਲਈ ਚੇਤਾਵਨੀ ਦਿਤੀ।  ਆਸਟ੍ਰੇਲੀਅਨ ਕੰਪੀਟੀਸ਼ਨ ਐਂਡ ਕੰਜ਼ਿਊਮਰ ਕਮਿਸ਼ਨ ਨੇ ਇਕ ਬਿਆਨ ’ਚ ਕਿਹਾ ਕਿ ਸੈਨ ਫਰਾਂਸਿਸਕੋ ਸਥਿਤ ਉਬੇਰ ਤਕਨਾਲੋਜੀਜ਼ ਇੰਕ. ਦੀ ਨੀਦਰਲੈਂਡ ਦੀ ਸਹਾਇਕ ਕੰਪਨੀ ਉਬੇਰ ਬੀਵੀ ਨੇ ਮੰਨਿਆ ਕਿ ਇਸ ਨੇ ਆਪਣੀ ਐਪ ਵਿਚ ਗਲਤ ਜਾਂ ਗੁੰਮਰਾਹਕੁੰਨ ਬਿਆਨ ਦੇ ਕੇ ਆਸਟ੍ਰੇਲੀਆਈ ਖਪਤਕਾਰ ਕਾਨੂੰਨ ਦੀ ਉਲੰਘਣਾ ਕੀਤੀ। ਦਸੰਬਰ 2017 ਅਤੇ ਸਤੰਬਰ 2021 ਦੇ ਵਿਚਕਾਰ ਉਬੇਰ ਨੇ 20 ਲੱਖ ਆਸਟ੍ਰੇਲੀਆਈ ਖਪਤਕਾਰਾਂ ਨੂੰ ਚੇਤਾਵਨੀ ਦਿਤੀ, ਜਿਨ੍ਹਾਂ ਨੇ ਪੰਜ ਮਿੰਟਾਂ ਦੇ ਅੰਦਰ ਆਪਣੀ ਬੁਕਿੰਗ ਰੱਦ ਕਰਨ ਦੀ ਕੋਸ਼ਿਸ਼ ਕੀਤੀ। ਕੰਪਨੀ ਨੇ ਕਿਹਾ ਕਿ ਕਿਉਂਕਿ ਤੁਹਾਡਾ ਡਰਾਈਵਰ ਰਸਤੇ ਵਿਚ ਹੈ। ਇਸ ਲਈ ਤੁਹਾਡੇ ਤੋਂ ਇਕ ਛੋਟੀ ਰੱਦ ਕਰਨ ਦੀ ਫੀਸ ਲਈ ਜਾ ਸਕਦੀ ਹੈ।
ਉਬੇਰ ਨੇ ਇਕ ਬਿਆਨ ਵਿਚ ਕਿਹਾ ਕਿ ਲਗਭਗ ਸਾਰੀਆਂ ਸਵਾਰੀਆਂ ਨੇ ਚੇਤਾਵਨੀਆਂ ਦੇ ਬਾਵਜੂਦ ਆਪਣੀ ਯਾਤਰਾ ਨੂੰ ਰੱਦ ਕਰਨ ਦਾ ਫ਼ੈਸਲਾ ਕੀਤਾ। ਕਮਿਸ਼ਨ ਨੇ ਕਿਹਾ ਕਿ ਉਬੇਰ ਨੇ ਮੰਨਿਆ ਕਿ ਉਸਨੇ ਕਈ ਸਾਲਾਂ ਤਕ ਆਸਟ੍ਰੇਲੀਆਈ ਖਪਤਕਾਰਾਂ ਨੂੰ ਗੁੰਮਰਾਹ ਕੀਤਾ ਹੈ। ਕੰਪਨੀ ਨੇ ਕਿਹਾ ਕਿ ਉਸ ਦੌਰਾਨ ਉਨ੍ਹਾਂ ’ਚੋਂ ਕੁਝ ਨੇ ਰੱਦ ਕਰਨ ਦੀ ਚਿਤਾਵਨੀ ਮਿਲਣ ਤੋਂ ਬਾਅਦ ਵੀ ਆਪਣੀ ਰਾਈਡ ਰੱਦ ਨਾ ਕਰਨ ਦਾ ਫ਼ੈਸਲਾ ਕੀਤਾ ਹੋ ਸਕਦਾ ਹੈ।     (ਏਜੰਸੀ)