ਅਦਾਲਤੀ ਹੁਕਮਾਂ ਦੀ ਨਿੱਜੀ ਸਕੂਲ ਉਡਾ ਰਹੇ ਨੇ ਧੱਜੀਆਂ...
ਚੰਡੀਗੜ੍ਹ (ਹਰਦੀਪ ਸਿੰਘ ਭੋਗਲ): ਸਕੂਲਾਂ ਵਲੋਂ ਮਾਪਿਆਂ ਦੀ ਕਿਤਾਬਾਂ ’ਚ ਲੁੱਟ, ਹਰ ਸਾਲ ਦਾਖ਼ਲਾ ਫ਼ੀਸ ਦੀ ਲੁੱਟ, ਬਿਲਡਿੰਗ ਫ਼ੰਡ ਦੇ ਨਾਂ ’ਤੇ ਲੁੱਟ, ਸਾਲਾਨਾ ਫ਼ੰਡ ਦੇ ਨਾਮ ’ਤੇ ਲੁੱਟ, ਵਰਦੀਆਂ ’ਚ ਲੁੱਟ ਕੀਤੀ ਜਾ ਰਹੀ ਹੈ। ਲਾਕਡਾਊਨ ਦੌਰਾਨ ਬੰਦ ਰਹੇ ਨਿੱਜੀ ਸਕੂਲਾਂ ਦੇ ਪ੍ਰਬੰਧਕਾਂ ਵੱਲੋਂ ਬੱਚਿਆਂ ਦੇ ਮਾਪਿਆਂ ਤੋਂ ਫੀਸਾਂ ਵਸੂਲਣ ਦੇ ਮਾਮਲੇ ’ਤੇ ਬੱਚਿਆਂ ਅਤੇ ਮਾਪਿਆਂ ‘ਤੇ ਫੀਸਾਂ ਵਸੂਲਣ ਦਾ ਦਬਾਅ ਬਣਾਇਆ ਜਾ ਰਿਹਾ ਹੈ।
ਦੱਸ ਦਈਏ ਕਿ ਲਾਕਡਾਊਨ-ਕਰਫਿਊ ਦੇ ਤਿੰਨ ਮਹੀਨਿਆਂ ਦੌਰਾਨ ਸਕੂਲ ਬੰਦ ਰਹਿਣ ਕਾਰਨ ਬੱਚੇ ਆਪੋ ਆਪਣੇ ਘਰਾਂ ਵਿੱਚ ਹੀ ਬੰਦ ਰਹੇ ਸਨ ਅਤੇ ਇਸ ਦੌਰਾਨ ਬੱਚਿਆ ਦੇ ਮਾਪਿਆਂ ਦੇ ਕੰਮ ਕਾਜ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਸਨ। ਸਕੂਲ ਫੀਸਾਂ ਦੇ ਮਸਲੇ ਦੀ ਹਾਈਕੋਰਟ ਵਿਚ ਸੁਣਵਾਈ ਚੱਲ ਰਹੀ ਹੈ। ਇਸ ਦੌਰਾਨ ਸਪੋਕਸਮੈਨ ਟੀਵੀ ਦੇ ਸੀਨੀਅਰ ਪੱਤਰਕਾਰ ਹਰਦੀਪ ਸਿੰਘ ਭੋਗਲ ਨੇ ਸਕੂਲ ਫੀਸਾਂ ਦੇ ਮੁੱਦੇ ਨੂੰ ਲੈ ਕੇ ਐਡਵੋਕੇਟ ਚਰਨਪਾਲ ਸਿੰਘ ਬਾਗੜੀ ਨਾਲ ਵਿਸ਼ੇਸ਼ ਤੌਰ ‘ਤੇ ਗੱਲਬਾਤ ਕੀਤੀ।
Online Class
ਇਸ ਦੌਰਾਨ ਐਡਵੋਕੇਟ ਬਾਗੜੀ ਨੇ ਕਿਹਾ ਕਿ 1/10/2020 ਵਾਲੇ ਆਡਰ ਵਿਚ ਕੋਰਟ ਨੇ ਕਿਹਾ ਸੀ ਕਿ ਜਿਹੜੇ ਸਕੂਲ ਬੱਚਿਆਂ ਨੂੰ ਡੇਅ-ਟੂ-ਡੇਅ ਆਨਲਾਈਨ ਐਜੂਕੇਸ਼ਨ ਦੇ ਰਹੇ ਹਨ, ਉਹ ਟਿਊਸ਼ਨ ਫੀਸ ਲੈ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਜਿਹੜੇ ਸਕੂਲ ਬੱਚਿਆਂ ਨੂੰ ਵਟਸਅੱਪ ‘ਤੇ ਕੰਮ ਭੇਜ ਰਹੇ ਹਨ, ਉਹ ਸਕੂਲ ਬੱਚਿਆਂ ਤੋਂ ਟਿਊਸ਼ਨ ਫੀਸ ਜਾਂ ਟ੍ਰਾਂਸਪੋਰਟ ਫੀਸ ਨਹੀਂ ਲੈ ਸਕਦੇ। ਬਾਗੜੀ ਨੇ ਦੱਸਿਆ ਕਿ 1/10/20 ਸੁਣਵਾਈ ਤੋਂ ਬਾਅਦ ਸਕੂਲ ਵਾਲੇ ਰੀਕਾਲਿੰਗ ਲਈ ਕੋਰਟ ਗਏ ਸਨ ਤਾਂ ਉਹ ਡਵੀਜਨ ਬੈਂਚ ਵੱਲੋਂ ਡਿਸਮਿਸ ਕਰ ਦਿੱਤੀ ਗਈ ਸੀ।
Online Class
ਉਸਤੋਂ ਬਾਅਦ ਸਕੂਲ ਵਾਲੇ ਸੁਪਰੀਮ ਕੋਰਟ ਗਏ ਤਾਂ ਉਥੇ ਵੀ ਪੂਰਾ ਆਡਰ ਸਟੇਅ ਨਹੀਂ ਹੋ ਸਕਿਆ। ਬਾਗੜੀ ਨੇ ਦੱਸਿਆ ਕਿ ਮੇਰੇ ਕੋਲ ਮਾਪਿਆਂ ਦੀਆਂ ਕੰਪਲੇਟਸ ਵੀ ਆਉਂਦੀਆਂ ਰਹੀਆਂ ਕਿ ਸਕੂਲ ਵਾਲੇ ਸਾਥੋਂ ਸਲਾਨਾ ਖਰਚਾ ਵੀ ਮੰਗ ਰਹੇ ਹਨ ਕਿਉਂਕਿ ਸੈਸ਼ਨ ਬਦਲ ਰਿਹਾ ਹੈ ਅਤੇ ਬੱਚਿਆਂ ਦੇ ਮਾਪਿਆਂ ਉਤੇ ਵੱਖ-ਵੱਖ ਤਰ੍ਹਾਂ ਦਾ ਦਬਾਅ ਪਾਏ ਜਾ ਰਹੇ ਹਨ ਕਿ ਤੁਸੀਂ ਸਲਾਨਾ ਖਰਚਾ ਦਓ ਤਾਂ ਅਸੀਂ ਬੱਚਾ ਪ੍ਰਮੋਟ ਕਰਾਂਗੇ ਅਤੇ ਕਈਂ ਬੱਚਿਆਂ ਨੂੰ ਆਨਲਾਈਨ ਐਜੂਕੇਸ਼ਨ ਤੋਂ ਕੱਢ ਵੀ ਦਿੱਤਾ ਗਿਆ।
Private School
ਉਨ੍ਹਾਂ ਦੱਸਿਆ ਕਿ ਹੁਣ ਜਦੋਂ 10/2/2021 ਨੂੰ ਇਸ ਕੇਸ ਦੀ ਦੁਬਾਰਾ ਸੁਣਵਾਈ ਹੋਈ ਤਾਂ ਉਦੋਂ ਮੈਂ ਕੋਰਟ ਸਾਹਮਣੇ ਇਹ ਡਿਟੇਲਜ਼ ਰੱਖੀਆਂ ਕਿ ਤੁਹਾਡੇ ਹੀ ਆਡਰਾਂ ਦੀ ਤੋਹੀਨ ਹੋ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਸਕੂਲਾਂ ਵੱਲੋਂ ਪੰਜਾਬ ਸਰਕਾਰ ਦਾ ਆਡਰਾਂ ਦੀ ਵੀ ਤੋਹੀਨ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਦੇ ਰਿਕਾਰਡ ਅਨੁਸਾਰ ਪ੍ਰਾਈਵੇਟ ਸਕੂਲ ਹੋਰ ਖਰਚਿਆਂ ਤੋਂ ਬਿਨਾਂ ਮਾਪਿਆਂ ਤੋਂ ਟਿਊਸ਼ਨ ਫੀਸ ਲੈ ਕੇ ਵੀ ਲੱਖਾਂ ਰੁਪਏ ਦਾ ਲਾਭ ਕਮਾ ਰਹੇ ਹਨ।
