ਅਨਿਲ ਨੇ ਕਿਹਾ ਕਿ ਉਨ੍ਹਾਂ ਦਾ ਮਕਸਦ ਲੋਕਾਂ ਨੂੰ ਸਮੇਂ ਸਿਰ ਉਨ੍ਹਾਂ ਦੀ ਮੰਜ਼ਿਲ 'ਤੇ ਪਹੁੰਚਾਉਣਾ ਹੈ।
ਚੰਡੀਗੜ੍ਹ - ਚੰਡੀਗੜ੍ਹ ਵਿਚ ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਕਈ ਸੜਕਾਂ ਜਾਮ ਹੋ ਜਾਂਦੀਆਂ ਹਨ। ਚੰਡੀਗੜ੍ਹ ਟਰੈਫਿਕ ਪੁਲਿਸ ਹਰ ਥਾਂ ਜਾਮ ਨਹੀਂ ਖੋਲ੍ਹ ਸਕਦੀ। ਇਸ ਦੇ ਨਾਲ ਹੀ ਕਈ ਥਾਵਾਂ 'ਤੇ ਟਰੈਫਿਕ ਲਾਈਟਾਂ ਵੀ ਬੰਦ ਰਹਿੰਦੀਆਂ ਹਨ। ਅਜਿਹੇ 'ਚ ਚੰਡੀਗੜ੍ਹ ਦੇ ਇਕ ਆਟੋ ਚਾਲਕ ਨੇ ਇਸ ਦਾ ਬੀੜਾ ਚੁੱਕਿਆ ਹੈ। ਉਥੋਂ ਲੰਘਦੀਆਂ ਕਈ ਸੜਕਾਂ ’ਤੇ ਅਨਿਲ ਕੁਮਾਰ ਨਾਂ ਦਾ ਆਟੋ ਚਾਲਕ ਜਾਮ ਖੋਲ੍ਹ ਰਿਹਾ ਹੈ। ਇਸ ਦੇ ਨਾਲ ਹੀ ਉਸ ਨੇ ਟ੍ਰੈਫਿਕ ਪੁਲਿਸ ਵਾਂਗ ਹੀ ਸੀਟੀ, ਟਰੈਫਿਕ ਸੇਫਟੀ ਵੈਸਟ ਅਤੇ ਟਰੈਫਿਕ ਸੇਫਟੀ ਬੈਟਨ ਵੀ ਖਰੀਦਿਆ ਹੈ।
ਅਨਿਲ ਨੇ ਕਿਹਾ ਕਿ ਉਨ੍ਹਾਂ ਦਾ ਮਕਸਦ ਲੋਕਾਂ ਨੂੰ ਸਮੇਂ ਸਿਰ ਉਨ੍ਹਾਂ ਦੀ ਮੰਜ਼ਿਲ 'ਤੇ ਪਹੁੰਚਾਉਣਾ ਹੈ। ਪਿਛਲੇ ਦਿਨੀਂ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਦੀ ਚੰਡੀਗੜ੍ਹ ਫੇਰੀ ਦੌਰਾਨ ਅਨਿਲ ਨੇ ਸ਼ਾਮ ਨੂੰ ਸ਼ਹਿਰ ਵਿਚ ਜਾਮ ਖੋਲ੍ਹ ਦਿੱਤਾ ਸੀ। ਉਸ ਦਿਨ ਸ਼ਹਿਰ ਵਿਚ ਕਈ ਥਾਵਾਂ ’ਤੇ ਟਰੈਫਿਕ ਲਾਈਟਾਂ ਬੰਦ ਸਨ। ਦੱਸ ਦਈਏ ਕਿ ਅਨਿਲ ਪਿਛਲੇ ਕਈ ਸਾਲਾਂ ਤੋਂ ਚੰਡੀਗੜ੍ਹ ਵਿਚ ਸਮਾਜ ਭਲਾਈ ਦੇ ਕੰਮ ਕਰ ਰਹੇ ਹਨ।
ਅਨਿਲ ਨੇ ਦੱਸਿਆ ਕਿ ਉਸ ਨੇ ਚੰਡੀਗੜ੍ਹ ਟ੍ਰੈਫਿਕ ਪੁਲਿਸ ਨੂੰ ਕਈ ਵਾਰ ਬੇਨਤੀ ਕੀਤੀ ਸੀ ਕਿ ਉਹਨਾਂ ਨੂੰ ਇੱਕ ਸੇਫਟੀ ਵੈਸਟ ਅਤੇ ਇੱਕ ਸੇਫਟੀ ਬੈਟਨ ਜਾਂ ਹੱਥਾਂ ਨਾਲ ਇਸ਼ਾਰਾ ਕਰਨ ਵਾਲਾ ਪੰਜਾ ਦਿੱਤਾ ਜਾਵੇ ਤਾਂ ਜੋ ਟ੍ਰੈਫਿਕ ਨੂੰ ਹੱਥੀਂ ਕੰਟਰੋਲ ਕੀਤਾ ਜਾ ਸਕੇ। ਇਸ ਨਾਲ ਉਹ ਟ੍ਰੈਫਿਕ ਜਾਮ ਨੂੰ ਚੰਗੀ ਤਰ੍ਹਾਂ ਕੰਟਰੋਲ ਕਰ ਸਕੇਗਾ ਪਰ ਉਸ ਨੂੰ ਇਹ ਚੀਜ਼ਾਂ ਮੁਹੱਈਆ ਨਹੀਂ ਕਰਵਾਈਆਂ ਗਈਆਂ।
ਅਜਿਹੇ 'ਚ ਇਕ ਟ੍ਰੈਫਿਕ ਕਰਮਚਾਰੀ ਨੇ ਉਸ ਨੂੰ ਦੱਸਿਆ ਕਿ ਉਹ ਖੁਦ ਸੈਕਟਰ 29 ਦੀ ਇਕ ਦੁਕਾਨ ਤੋਂ ਇਹ ਸਾਮਾਨ ਖਰੀਦ ਸਕਦਾ ਹੈ। ਜਿਸ ਤੋਂ ਬਾਅਦ ਅਨਿਲ ਨੇ ਉਥੋਂ ਟ੍ਰੈਫਿਕ ਸੇਫਟੀ ਵੈਸਟ, ਸੀਟੀ ਅਤੇ ਸੇਫਟੀ ਬੈਟਨ ਖਰੀਦਿਆ। ਅਨਿਲ ਨੇ ਕਿਹਾ ਕਿ ਉਹ ਸ਼ਹਿਰ ਵਿਚ ਜਿੱਥੇ ਵੀ ਟ੍ਰੈਫਿਕ ਜਾਮ ਦੇਖਦੇ ਹਨ, ਉਹ ਇਨ੍ਹਾਂ ਚੀਜ਼ਾਂ ਦੀ ਮਦਦ ਨਾਲ ਇਸ ਨੂੰ ਖੋਲ੍ਹਣ ਦੀ ਕੋਸ਼ਿਸ਼ ਕਰਨਗੇ।
ਦੱਸ ਦਈਏ ਕਿ ਆਟੋ ਚਾਲਕ ਅਨਿਲ ਕੁਮਾਰ ਨੇ ਇਸ ਤੋਂ ਪਹਿਲਾਂ ਨੀਰਜ ਚੋਪੜਾ ਦੇ ਓਲੰਪਿਕ 'ਚ ਸੋਨ ਤਮਗਾ ਜਿੱਤਣ ਦੀ ਖੁਸ਼ੀ 'ਚ ਪੂਰਾ ਦਿਨ ਮੁਫ਼ਤ ਸਵਾਰੀਆਂ ਨੂੰ ਢੋਇਆ ਸੀ। ਇਸ ਦੇ ਨਾਲ ਹੀ ਉਹ ਫੌਜ ਦੇ ਜਵਾਨਾਂ ਅਤੇ ਗਰਭਵਤੀ ਔਰਤਾਂ ਲਈ ਵੀ ਮੁਫਤ ਸੇਵਾ ਪ੍ਰਦਾਨ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਪੁਲਵਾਮਾ ਹਮਲੇ ਦਾ ਪਾਕਿਸਤਾਨ ਤੋਂ ਬਦਲਾ ਲੈਣ ਦੀ ਖੁਸ਼ੀ 'ਚ ਉਸ ਨੇ ਇਕ ਮਹੀਨੇ ਤੱਕ ਸ਼ਹਿਰ 'ਚ ਮੁਫਤ ਆਟੋ ਚਲਾਇਆ ਸੀ।
ਅਨਿਲ ਨੇ ਆਪਣੇ ਆਟੋ 'ਤੇ ਮੁਫ਼ਤ ਆਟੋ ਸੇਵਾ ਦੇ ਬੈਨਰ ਵੀ ਲਗਾਏ ਹੋਏ ਤਾਂ ਜੋ ਲੋਕਾਂ ਨੂੰ ਇਸ ਬਾਰੇ ਜਾਣਕਾਰੀ ਮਿਲ ਸਕੇ। ਹੁਣ ਅਨਿਲ ਨੇ ਆਟੋ 'ਤੇ ਬੈਨਰ ਲਗਾ ਦਿੱਤਾ ਹੈ ਕਿ ਜੇਕਰ ਭਾਰਤ ਟੀ-20 ਵਿਸ਼ਵ ਕੱਪ ਕ੍ਰਿਕਟ ਟੂਰਨਾਮੈਂਟ 'ਚ ਪਾਕਿਸਤਾਨ ਨੂੰ ਹਰਾਉਂਦਾ ਹੈ ਤਾਂ ਅਗਲੇ ਦਿਨ ਉਹ ਮੁਫ਼ਤ ਰਾਈਡ ਦੇਣਗੇ। ਤਿੰਨ ਕਾਲੇ ਖੇਤੀ ਕਾਨੂੰਨਾਂ ਨੂੰ ਵਾਪਸ ਲੈਣ ਤੋਂ ਬਾਅਦ ਅਨਿਲ ਨੇ 10 ਦਿਨਾਂ ਲਈ ਮੁਫ਼ਤ ਰਾਈਡ ਦਿੱਤੀ। ਉਸ ਦਾ ਆਟੋ ਇੱਕ ਦਿਨ ਵਿਚ ਕਰੀਬ 150 ਕਿਲੋਮੀਟਰ ਚੱਲਦਾ ਹੈ।
ਹਾਲ ਹੀ ਵਿਚ ਆਟੋ ਵਿਚ ਇੱਕ ਯਾਤਰੀ ਦਾ ਬੈਗ ਰਹਿ ਗਿਆ ਸੀ।
ਸਵਾਰੀ ਤਿੰਨ ਦਿਨ ਤੱਕ ਪ੍ਰੇਸ਼ਾਨ ਰਹੀ। ਜਦੋਂ ਅਨਿਲ ਨੂੰ ਇਸ ਗੱਲ ਦਾ ਪਤਾ ਲੱਗਾ ਤਾਂ ਉਸ ਨੇ ਇਸ ਨੂੰ ਵਟਸਐਪ ਗਰੁੱਪ 'ਚ ਪਾ ਦਿੱਤਾ। ਇਸ ਨਾਲ ਸਬੰਧਤ ਆਟੋ ਚਾਲਕ ਨੂੰ ਫੋਨ ਆਇਆ ਕਿ ਉਸ ਦੇ ਆਟੋ ਦੇ ਟਰੰਕ 'ਚ ਬੈਗ ਪਿਆ ਹੋਇਆ ਹੈ। ਇਸ ਤੋਂ ਬਾਅਦ ਬੈਗ ਯਾਤਰੀ ਨੂੰ ਸੌਂਪ ਦਿੱਤਾ ਗਿਆ। ਅਨਿਲ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਪਹਿਲਾਂ ਵੀ ਵਾਪਰ ਚੁੱਕੀਆਂ ਹਨ ਅਤੇ ਸਾਮਾਨ ਵਾਪਸ ਕਰਵਾਉਣ ਲਈ ਉਨ੍ਹਾਂ ਦੀ ਪੂਰੀ ਕੋਸ਼ਿਸ਼ ਹੈ। ਇਸ ਲਈ ਚੰਡੀਗੜ੍ਹ ਪੁਲਿਸ ਨੇ ਉਸ ਨੂੰ ਸਨਮਾਨਿਤ ਵੀ ਕੀਤਾ ਸੀ।
ਸ਼ਹਿਰ 'ਚ ਕਈ ਵਾਰ ਵਾਪਰਨ ਵਾਲੇ ਸੜਕ ਹਾਦਸਿਆਂ 'ਤੇ ਆਮ ਲੋਕਾਂ ਵਾਂਗ ਦਰਸ਼ਕ ਬਣਨ ਦੀ ਬਜਾਏ ਅਨਿਲ ਜ਼ਖਮੀਆਂ ਨੂੰ ਤੁਰੰਤ ਆਪਣੇ ਆਟੋ 'ਚ ਬਿਠਾ ਕੇ ਹਸਪਤਾਲ ਲੈ ਜਾਂਦਾ ਹੈ। ਹਾਲ ਹੀ ਵਿਚ ਉਹ ਸੈਕਟਰ 26 ਦੇ ਹਾਦਸੇ ਵਿੱਚ ਜ਼ਖ਼ਮੀ ਹੋਏ ਦੋ ਛੋਟੇ ਬੱਚਿਆਂ ਨੂੰ ਸੈਕਟਰ 16 ਦੇ ਹਸਪਤਾਲ ਲੈ ਕੇ ਗਿਆ ਸੀ। ਉਹ ਚੰਡੀਗੜ੍ਹ ਆਟੋ ਯੂਨੀਅਨ ਦੇ ਪ੍ਰਧਾਨ ਵਜੋਂ ਸੇਵਾਵਾਂ ਨਿਭਾਅ ਰਹੇ ਹਨ।
