ਨੌਰਾ ਵਿਖੇ ਏ.ਟੀ.ਐਮ. ਭੰਨ ਕੇ ਲੱਖਾਂ ਦੀ ਲੁੱਟ
ਬੰਗਾ, 22 ਅਗੱਸਤ (ਮਨਜਿੰਦਰ ਸਿੰਘ): ਥਾਣਾ ਸਦਰ ਬੰਗਾ ਅਧੀਨ ਪੈਂਦੇ ਪਿੰਡ ਨੌਰਾ ਵਿਖੇ ਸਟੇਟ ਬੈਂਕ ਆਫ਼ ਇੰਡੀਆ ਦਾ ਏਟੀਐਮ ਭੰਨ ਕੇ ਕਰੀਬ ਚੌਦਾਂ ਲੱਖ ਰੁਪਏ ਲੁੱਟਣ ਦਾ ਸਮਾਚਾਰ ਮਿਲਿਆ ਹੈ। ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਬੰਗਾ ਸਬ ਡਵੀਜ਼ਨ ਦੇ ਡੀ ਐਸ ਪੀ ਗੁਰਿੰਦਰਪਾਲ ਸਿੰਘ ਨੇ ਦਸਿਆ ਕਿ ਸ਼ੁਕਰਵਾਰ ਰਾਤ 1.30 ਵਜੇ ਤਕ ਸਾਡੀ ਪੁਲਿਸ ਪਾਰਟੀ ਨੇ ਨੌਰਾ ਪਿੰਡ ਵਿਚ ਨਾਕਾ ਲਗਾਇਆ ਹੋਇਆ ਸੀ ਪੁਲਿਸ ਪਾਰਟੀ ਦੇ ਨਾਕਾ ਛੱਡ ਕੇ ਜਾਣ ਤੋਂ ਬਾਅਦ ਰਾਤ ਕਰੀਬ 2.30 ਮਿੰਟ ਤੇ ਇਹ ਵਾਰਦਾਤ ਹੋਈ ਹੈ। ਵਾਰਦਾਤ ਵਾਲੀ ਕਾਰ ਸੀ.ਸੀ.ਟੀ.ਵੀ. ਕੈਮਰੇ ਵਿਚ ਕੈਦ ਹੋ ਗਈ ਹੈ ਜਿਸ ਨੇ ਕਿ ਘਟਨਾ ਸਥਾਨ ਉਤੇ ਕਈ ਚੱਕਰ ਲਗਾਏ ਹਨ। ਫ਼ਿੰਗਰ ਪ੍ਰਿੰਟ ਅਤੇ ਡਾਗ ਸੁਕੈਡ ਦੀ ਸਹਾਇਤਾ ਨਾਲ ਇਸ ਦੀ ਛਾਣਬੀਨ ਕੀਤੀ ਜਾ ਰਹੀ ਹੈ। ਏਟੀਐਮ ਵਿਚ ਪੈਸੇ ਪਾਉਣ ਵਾਲੀ ਕੰਪਨੀ ਦੇ ਮੈਨੇਜਰ ਜਗਦੀਪ ਕੁਮਾਰ ਹੁਸ਼ਿਆਰਪੁਰ ਨੇ ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਸ਼ੁਕਰਵਾਰ ਵਾਲੇ ਦਿਨ ਇਸ ਵਿਚ ਅੱਠ ਲੱਖ ਰੁਪਏ ਪਾਏ ਗਏ ਸਨ ਅਤੇ ਛੇ ਲੱਖ ਦੇ ਕਰੀਬ ਪਹਿਲਾਂ ਹੀ ਇਸ ਏਟੀਐਮ ਵਿਚ ਮੌਜੂਦ ਸਨ। ਲੁੱਟ ਵਿਚ ਸਾਰੇ 14 ਲੱਖ ਦੇ ਕਰੀਬ ਲੁਟੇਰੇ ਲੁੱਟ ਕੇ ਲੈ ਗਏ। ਥਾਣਾ ਸਦਰ ਦੇ ਮੁਖੀ ਰਾਜੀਵ ਕੁਮਾਰ ਨੇ ਖ਼ਬਰ ਲਿਖਣ ਮੌਕੇ ਤਕ ਦਸਿਆ ਕਿ ਇਸ ਵਾਰਦਾਤ ਬਾਰੇ ਹੁਣ ਤਕ ਕੋਈ ਸੁਰਾਗ ਨਹੀਂ ਮਿਲ ਸਕਿਆ ਹੈ। ਇਸ ਮੌਕੇ ਵਜ਼ੀਰ ਸਿੰਘ ਖਹਿਰਾ ਐਸ ਪੀ ਅਤੇ ਡੀ ਐਸ ਪੀ ਹਰਜੀਤ ਸਿੰਘ ਪਹੁੰਚੇ ।
ਫੋਟੋ ਕੈਪਸ਼ਨ:- 22 ਐਨ ਐਸ ਆਰ 04
