ਤਾਲਿਬਾਨ ਨੇ ਦੁਨੀਆਂ ਨਾਲ ਫਿਰ ਕੀਤੀ ਵਾਅਦਾ-ਿਖ਼ਲਾਫ਼ੀ
ਮੁੰਡਿਆਂ ਦੇ ਸਕੂਲ ਖੁਲ੍ਹੇ, ਕੁੜੀਆਂ ਦੇ ਬੰਦ
ਕਾਬੁਲ, 18 ਸਤੰਬਰ : ਤਾਲਿਬਾਨ ਦੀ ਅਗਵਾਈ 'ਚ ਅਫ਼ਗ਼ਾਨਿਸਤਾਨ ਦੇ ਸਿਖਿਆ ਮੰਤਰਾਲੇ ਨੇ ਸਾਰੇ ਸੈਕੰਡਰੀ ਸਕੂਲਾਂ ਨੂੰ ਸਨਿਚਰਵਾਰ ਨੂੰ ਫਿਰ ਤੋਂ ਸ਼ੁਰੂ ਕਰਨ ਦਾ ਨਿਰਦੇਸ਼ ਦਿਤਾ | ਹਾਲਾਂਕਿ, ਨਿਰਦੇਸ਼ 'ਚ ਸਿਰਫ਼ ਲੜਕਿਆਂ ਦੇ ਹੀ ਸਕੂਲ 'ਚ ਜਾਣ ਦਾ ਜ਼ਿਕਰ ਕੀਤਾ ਗਿਆ ਹੈ | ਇਸ 'ਚ ਲੜਕੀਆਂ ਦੀ ਸਕੂਲਾਂ 'ਚ ਵਾਪਸੀ ਨੂੰ ਲੈ ਕੇ ਕੋਈ ਜਾਣਕਾਰੀ ਨਹੀਂ ਦਿਤੀ ਗਈ | ਤਾਲਿਬਾਨ ਸ਼ਾਸਨ ਦਾ ਇਹ ਫ਼ੈਸਲਾ ਪਿਛਲੇ ਮਹੀਨੇ ਕਾਬੁਲ 'ਚ ਸੱਤਾ ਸੰਭਾਲਣ ਤੋਂ ਬਾਅਦ ਕੀਤੇ ਗਏ ਵਾਅਦਿਆਂ ਦੇ ਉਲਟ ਹੈ | ਖਾਮਾ ਪ੍ਰੈੱਸ ਨੇ ਅਧਿਕਾਰਿਤ ਨਿਰਦੇਸ਼ ਦੇ ਹਵਾਲੇ ਨਾਲ ਕਿਹਾ ਕਿ ਸਾਰੇ ਨਿਜੀ ਤੇ ਸਰਕਾਰੀ ਸੈਕੰਡਰੀ, ਹਾਈ ਸਕੂਲਾਂ ਅਤੇ ਧਾਰਮਕ ਸਕੂਲਾਂ ਨੂੰ ਫਿਰ ਤੋਂ ਖੋਲਿ੍ਹਆ ਜਾਵੇਗਾ | ਇਸਦੇ ਤਹਿਤ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੂੰ ਸਕੂਲ ਜਾਣ ਦੀ ਆਗਿਆ ਦਿਤੀ ਗਈ ਹੈ | ਤਾਲਿਬਾਨ ਨੇ ਦੁਨੀਆ ਨਾਲ ਕੀਤੇ ਕਈ ਵਾਅਦਿਆਂ ਦੇ ਨਾਲ ਨਾਲ ਪਿਛਲੇ ਹਫ਼ਤੇ ਅਫ਼ਗ਼ਾਨਿਸਤਾਨ 'ਚ ਅੰਤਰਿਮ ਸਰਕਾਰ ਦਾ ਐਲਾਨ ਕੀਤਾ ਸੀ, ਜਿਸ 'ਚ ਪਿਛਲੇ ਤਾਲਿਬਾਨ ਸ਼ਾਸਨ (1996-2001) ਦੀਆਂ ਨੀਤੀਆਂ ਨੂੰ ਨਾ ਦੁਹਰਾਉਣ ਦਾ ਭਰੋਸਾ ਦਿਤਾ ਗਿਆ ਸੀ | ਮੀਡੀਆ ਰੀਪੋਰਟਾਂ ਅਨੁਸਾਰ, ਔਰਤਾਂ ਨੂੰ ਕੰਮ 'ਤੇ ਜਾਣ ਤੋਂ ਰੋਕਿਆ ਜਾ ਰਿਹਾ ਹੈ | ਕਈ ਔਰਤਾਂ ਰੁਜ਼ਗਾਰ ਅਤੇ ਸਿਖਿਆ ਦੇ ਅਪਣੇ ਅਧਿਕਾਰਾਂ ਦੀ ਮੰਗ ਨੂੰ ਲੈ ਕੇ ਪੂਰੇ ਅਫ਼ਗ਼ਾਨਿਸਤਾਨ 'ਚ ਪ੍ਰਦਰਸ਼ਨ ਕਰ ਰਹੀਆਂ ਹਨ | (ਏਜੰਸੀ)
