ਸਰਕਾਰ ਨੇ ਅਪਣੇ ਸਿਆਸੀ ਮੁਫਾਦਾਂ ਲਈ ਡੇਰਾ ਮੁਖੀ ਨੂੰ ਦਿਤੀ ਪੈਰੋਲ : ਅੰਸ਼ੁਲ ਛਤਰਪਤੀ
ਸਿਰਸਾ, 18 ਜੂਨ (ਸੁਰਿੰਦਰ ਪਾਲ ਸਿੰਘ) : ਇਕ ਪਾਸੇ ਅਪਣੀਆਂ ਸਜ਼ਾਵਾਂ ਪੂਰੀਆਂ ਕਰ ਚੁਕੇ ਅਨੇਕਾਂ ਬੰਦੀ ਭਾਰਤ ਦੀਆਂ ਜੇਲਾਂ ਵਿਚ ਤੜਫ ਰਹੇ ਹਨ ਪਰ ਸਰਕਾਰ ਦੇ ਕੰਨ ਤੇ ਜ਼ੂੰ ਨਹੀ ਸਰਕ ਰਹੀ ਤੇ ਦੂਜੇ ਪਾਸੇ ਅਪਣੇ ਅਸਰ ਰਾਸੂਖ ਨਾਲ ਜਦੋ ਚਾਹੇ ਸਰਕਾਰ ਖਤਰਨਾਕ ਅਪਰਾਧੀਆਂ ਨੂੰ ਜੇਲ ਤੋ ਬਾਹਰ ਲਿਆ ਕੇ ਅਪਣੇ ਸਿਆਸੀ ਮੁਫਾਦਾਂ ਲਈ ਵਰਤ ਸਕਦੀ ਹੈ। ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਦੇ ਬੇਟੇ ਅੰਸੁਲ ਛੱਤਰਪਤੀ ਨੇ ਡੇਰਾ ਮੁਖੀ ਨੂੰ ਵਾਰ ਵਾਰ ਦਿਤੀ ਜਾ ਰਹੀ ਪੈਰੋਲ ਦਾ ਵਿਰੋਧ ਕਰਦਿਆਂ ਇਸ ਪੈਰੋਲ ਨੂੰ ਲੈ ਕੇ ਸਰਕਾਰ ’ਤੇ ਗੰਭੀਰ ਸਵਾਲ ਖੜੇ ਕੀਤੇ ਹਨ।
ਐਡਵੋਕੇਟ ਛੱਤਰਪਤੀ ਨੇ ਕਿਹਾ ਕਿ ਉਨ੍ਹਾਂ ਦੇ ਪਿਤਾ ਦੀ ਹਤਿਆਂ ਦੇ ਮਾਮਲੇ ਵਿਚ ਸਿਰਸਾ ਡੇਰਾ ਮੁਖੀ ਨੂੰ ਅਸਾਨੀ ਨਾਲ ਤੀਜੀ ਵਾਰ 30 ਦਿਨਾਂ ਦੀ ਪੈਰੋਲ ਮਿਲ ਗਈ ਹੈ। ਉਨ੍ਹਾਂ ਕਿਹਾ ਕਿ ਡੇਰਾ ਮੁਖੀ ਬਲਾਤਕਾਰ ਅਤੇ ਕਤਲ ਕੇਸ ਵਿਚ ਅਪਰਾਧੀ ਕਿਸਮ ਦਾ ਕੈਦੀ ਹੈ ਫਿਰ ਸਰਕਾਰ ਵਲੋਂ ਉਸਨੂੰ ਇਹ ਲਾਭ ਕਿਉਂ ਦਿਤਾ ਜਾ ਰਿਹਾ ਹੈ? ਉਨ੍ਹਾਂ ਕਿਹਾ ਕਿ ਉਹ ਜਲਦੀ ਹੀ ਸਰਕਾਰ ਦੇ ਇਸ ਫ਼ੈਸਲੇ ਵਿਰੁਧ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਪਟੀਸ਼ਨ ਦਾਇਰ ਕਰਨਗੇ।
ਅੰਸੁਲ ਛੱਤਰਪਤੀ ਨੇ ਕਿਹਾ ਕਿ ਸਰਕਾਰ ਨੇ ਅਪਣੇ ਸਿਆਸੀ ਮੁਫਾਦ ਲਈ ਗੁਰਮੀਤ ਸਿੰਘ ਨੂੰ ਪੈਰੋਲ ਦਿਤੀ ਹੈ ਅਤੇ ਇਸਤੋਂ ਪਹਿਲਾਂ ਵੀ ਪੈਰੋਲ ਦਿਤੀ ਸੀ ਤੇ ਹੁਣ ਨਵਾਂ ਤਰੀਕਾ ਬਣਾ ਕੇ ਉਸ ਨੂੰ ਪੈਰੋਲ ਦਿਤੀ ਗਈ ਹੈ।
ਤਸਵੀਰ-ਅੰਸ਼ੁਲ ਛੱਤਰਪਤੀ
