ਕਜੌਲੀ ਵਾਟਰ ਵਰਕਸ ਤੋਂ 30 ਅਪ੍ਰੈਲ ਤਕ ਹੋਰ ਪਾਣੀ ਦੀ ਸਪਲਾਈ ਲਈ ਡੈਡਲਾਈਨ ਖ਼ਤਮ

ਮਿਊਂਸਪਲ ਕਾਰਪੋਰੇਸ਼ਨ ਚੰਡੀਗੜ੍ਹ ਵਲੋਂ ਸਮਾਰਟ ਸਿਟੀ ਪ੍ਰਾਜੈਕਟ ਅਧੀਨ ਸ਼ਹਿਰ ਵਿਚ ਅਗਲੇ ਮਹੀਨਿਆਂ ਮਈ-ਜੂਨ ਵਿਚ ਪਾਣੀ ਦੇ ਗੰਭੀਰ ਸੰਕਟ ਦੇ ਹੱਲ ਲਈ 30 ਅਪ੍ਰੈਲ ਤਕ ਹੋਰ ਵਾਧੂ ਪਾਣੀ ਭਾਖੜਾ ਮੇਨ ਲਾਈਨ ਤੋਂ ਲਿਆਉਣ ਦਾ ਸ਼ਹਿਰ ਦੀ ਜਨਤਾ ਨਾਲ ਮੇਅਰ ਦਿਵੇਸ਼ ਮੋਦਗਿਲ ਵਲੋਂ ਵਾਅਦਾ ਕੀਤਾ ਸੀ। 100 ਕਰੋੜ ਦੇ ਕਰੀਬ ਖ਼ਰਚ ਕਰਨ ਮਗਰੋਂ ਵੀ 5ਵੇਂ ਅਤੇ 6ਵੇਂ ਫੇਜ਼ ਦੀ ਸਪਲਾਈ ਲਈ ਪਾਣੀ ਅਜੇ ਤਕ ਕਾਜੌਲੀ ਵਾਟਰ ਵਰਕਸ ਤਕ ਨਹੀਂ ਪੁੱਜਾ। ਜ਼ਿਕਰਯੋਗ ਹੈ ਕਿ ਇਸ ਵੇਲੇ ਮਿਊਂਸਪਲ ਕਾਰਪੋਰੇਸ਼ਨ ਚੰਡੀਗੜ੍ਹ ਵਲੋਂ ਸ਼ਹਿਰ ਵਿਚ ਕੁਲ 87 ਮਿਲੀਅਨ ਗੈਲਨ ਡੇਲੀ (ਐਮ.ਜੀ.ਡੀ.) ਪਾਣੀ ਸਪਲਾਈ ਕੀਤਾ ਜਾਂਦਾ ਹੈ, ਜਿਸ ਵਿਚ 67 ਐਮ.ਜੀ.ਡੀ. ਭਾਖੜਾ ਨਹਿਰ ਤੋਂ ਪਾਣੀ ਸਪਲਾਈ ਹੁੰਦਾ ਹੈ ਜਦਕਿ 20 ਐਮ.ਜੀ.ਡੀ. ਪਾਣੀ ਨਗਰ ਨਿਗਮ ਵਲੋਂ ਲਗਾਏ ਗਏ ਟਿਊਬਵੈੱਲਾਂ ਤੋਂ ਹੁੰਦਾ ਹੈ। ਚੰਡੀਗੜ੍ਹ 'ਚ ਭਰ ਗਰਤੀਆਂ ਦੇ ਦਿਨਾਂ ਵਿਚ ਪੀਣ ਵਾਲੇ ਪਾਣੀ ਦਾ ਸੰਕਟ ਗੰਭੀਰ ਹੋ ਜਾਂਦਾ ਹੈ ਅਤੇ ਸੈਕਟਰਾਂ, ਪਿੰਡਾਂ ਤੇ ਕਾਲੋਨੀਆਂ ਵਿਚ ਪਾਣੀ ਦੀ ਮੰਗ 115 ਐਮ.ਜੀ.ਡੀ. ਤਕ ਪਹੁੰਚ ਜਾਂਦੀ ਹੈ। ਗਰਮੀਆਂ ਦੇ ਦਿਨਾਂ ਵਿਚ ਸ਼ਹਿਰ ਦੀਆਂ ਕੋਠੀਆਂ ਦੀਆਂ ਉਪਰਲੀਆਂ ਮੰਜ਼ਲਾਂ 'ਤੇ ਪਾਣੀ ਨਹੀਂ ਪੁੱਜਦਾ। ਤਿੰਨ ਮੇਅਰ ਬਣੇ ਪਰ ਸੰਕਟ ਜਿਉਂ ਦਾ ਤਿਉ : ਚੰਡੀਗੜ੍ਹ 'ਚ ਪਿਛਲੇ ਕਈ ਸਾਲਾਂ ਤੋਂ ਗਰਮੀਆਂ ਦੇ ਦਿਨਾਂ ਵਿਚ ਪੀਣ ਵਾਲੇ ਪਾਣੀ ਦਾ ਸੰਕਟ ਬਰਕਰਾਰ ਹੈ।

Water

ਸ਼ਹਿਰ ਲਈ ਵਾਧੂ ਪਾਣੀ ਲਿਆਉਣ ਲਈ ਕਾਂਗਰਸੀ ਮੇਅਰ ਪੂਨਮ ਸ਼ਰਮਾ ਦੇ ਕਾਰਜਕਾਲ 2015 ਵਿਚ ਮੁੱਢ ਬਝਿਆ ਸੀ। ਇਸ ਮਗਰੋਂ ਭਾਜਪਾ ਸੱਤਾ ਵਿਚ ਆ ਗਈ, ਉਸ ਵੇਲੇ (2016) ਦੇ ਮੇਅਰ ਅਰੁਣ ਸੂਦ ਨੇ ਯੂ.ਟੀ. ਪ੍ਰਸ਼ਾਸਕ ਰਾਹੀਂ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰਖਿਆ। ਇਸ ਮਗਰੋਂ ਭਾਜਪਾ ਦੀ ਹੀ ਮੇਅਰ ਆਸ਼ਾ ਜੈਸਵਾਲ ਨੇ 2017 ਵਿਚ ਪੀਣ ਵਾਲੇ ਪਾਣੀ ਦੀ ਸਪਲਾਈ ਯਕੀਨੀ ਬਣਾਉਣ ਲਈ ਲੋਕਾਂ ਨਾਲ ਵਾਅਦਾ ਕੀਤਾ ਪਰ ਅਸਫ਼ਲ ਰਹੀ। ਹੁਣ 2018 ਵਿਚ ਮੇਅਰ ਦਿਵੇਸ਼ ਮੋਦਗਿਲ ਨੇ ਯੂ.ਟੀ. ਪ੍ਰਸ਼ਾਸਕ ਵੀ.ਪੀ. ਸਿੰਘ ਬਦਨੌਰ ਦੇ ਭਾਸ਼ਣ ਨਾਲ ਅਪਣਾ ਮੇਅਰ ਦਾ ਕਾਰਜਕਾਲ ਅਰੰਭ ਕਰਦਿਆਂ ਸ਼ਹਿਰ ਵਾਸੀਆਂ ਨਾਲ 30 ਅਪ੍ਰੈਲ ਤਕ ਹੋਰ ਪਾਣੀ ਸ਼ਹਿਰ ਵਿਚ ਪੁੱਜਦਾ ਕਰਨ ਦਾ ਭਰੋਸਾ ਦਿਤਾ ਸੀ ਪਰ ਹਾਲੇ ਤਕ ਪਾਈਪ ਲਾਈਨਾਂ ਤੇ ਪੰਪਿੰਗ ਮਸ਼ੀਨਰੀ ਲਗਾਉਣ ਦਾ ਪ੍ਰਾਜੈਕਟ ਅੱਧ-ਵਿਚਾਲੇ ਹੀ ਲਟਕ ਰਿਹਾ ਹੈ। ਨਗਰ ਨਿਗਮ ਦੀ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ ਸ਼ਹਿਰ ਵਿਚ ਪੀਣ ਵਾਲੇ ਪਾਣੀ ਦਾ ਸੰਕਟ ਬਰਕਰਾਰ ਹੈ ਪਰ ਕਾਜੋਲੀ ਵਾਟਰ ਵਰਕਸ ਤਕ ਪੁੱਜਣ ਲਈ ਹਾਲੇ ਹੋਰ ਸਮਾਂ ਲੱਗੇਗਾ।ਦੱਸਣਯੋਗ ਹੈ ਕਿ ਚੰਡੀਗੜ੍ਹ ਸ਼ਹਿਰ ਦਾ ਸਮਾਰਟ ਸਿਟੀ ਪ੍ਰਾਜੈਕਟ ਅਧੀਨ ਸੱਭ ਤੋਂ ਪਹਿਲਾਂ ਚਾਰ ਸੈਕਟਰਾਂ-ਸੈਕਟਰ 17, 22, 35 ਅਤੇ 43 ਵਿਚ 24*7 ਘੰਟੇ ਪੀਣ ਵਾਲੇ ਪਾਣੀ ਦੀ ਸਪਲਾਈ ਸ਼ੁਰੂ ਹੋਵੇਗੀ ਜਦਕਿ ਪੂਰੇ ਚੰਡੀਗੜ੍ਹ ਸ਼ਹਿਰ ਲਈ ਘੱਟੋ-ਘੱਟ 2021 ਤਕ ਸਮਾਂ ਲੱਗ ਜਾਵੇਗਾ।